MOTOORI
Suliffeqarfiup biilinik attartortitsisarneq angallassisarnerlu aallukkai
Nuummi biilinik attartortitsisartut ukiuni kingullerni amerliartoraluartut, illoqarfimmi suliniutinut atatillugu suliffeqarfiit inuillu piffissami sivikitsumi sivisunerusumilu biilinik attartornissamik pisariaqartitsisut amerliartuinnarput. Neqerooruteqartut nutaat ilagaat Nuuk Rental, maannalu aamma angallassisarnissamik neqerooruteqalerlutik
- Ingerlalluartorujussuuvoq, Nuuk Rentalsimik piginnittoq Nick Olsen oqarpoq. Taanna Looqi Sandgreenilu immikkoortortaqarfimmik pilersinneqaqqammersumut Shuttle.gl-imik pilersitseqqammerpoq. Biilinik aquttulerluni attartorfiusoq.
Nuuk Rental 2023-mi aallartittoq ineriartuinnavippoq. Suliffeqarfik 2023-mi qulinik biiliuteqarpoq, maannalu 50-it sinnerlugit peqarluni. Taakku nunaqavissunit takornarianiillu attartorneqartarput.
Aammattaaq biilinik angallassinissamik pisariaqartitsisoqarpoq - tassa aquttoqarluni biilinik attartorneq.
- Ingerlalluartorujussuuvoq, Nick Olsen oqarpoq, taannalu Manu-Malik Kreutzmann Petersen aamma Ville Nikolaj Olsen peqatigalugit Nuuk Rentalimik aamma Shuttle.gl-imik piginneqataavoq.
Nuuk Rental maanna immikkoortortaqarfimmik nutaamik pilersitsivoq, shuttle.gl-imik taaguutilimmik. Tassani biilinik aquttulerluni attartortoqarsinnaavoq.
Assi: Nuuk Rental
Assartuinermut aaqqiissutit pitsaasut
Nuummi mittarfik 2024-mi novembarimi ammarneqarmat Nuuk Rentalip inunnik angallassinissamik, pitsaanerusunik kiffartuussinissamik pisortatigoortumillu tikeraartunut atatillugu angallassinissamik amigaateqartut amerliartortut maluginiarpaa.
– Taamaattumik maannakkut suliffeqarfimmik nutaamik pilersitsivugut, Shuttle.gl-imik, taannalu kiffartuussinermik ingerlatsiviuvoq pitsaasunik assartuinermut aaqqiissutinik ukkataqartoq. Siunissami biilinik attartortitsisinnaallutalu angallassisarnissassamik neqerooruteqarlissaagut, assersuutigalugu umiarsuarnut takornariartaatinut, pisortatigoortumik tikeraartunut, aallartitanut kiisalu eqimattanik amerlanerusunik angallassinissamik. Aamma biilinik attartornissamik pisariaqartitsisunut, Nick Olsen oqarpoq, nangillunilu:
– Aamma suliffeqarfinnut Nuummut tikeraartunut pitsaasunik biilinik atuerusuttunik neqerooruteqarpugut, oqarpoq.
Nuuk Rentalsip biilitaasa amerlanersaat innaallagiartortuullutillu hybridiupput.
Assi: Nuuk Rental
Namminneq timmisartuminnik tikittunik kiffartuussineq
Nuuk Rental pisortatigoortumik tikeraartunut kiisalu aallartitanut eqimattanulluunniit Nuummut tikinnerminni biilinik amerlanerusunik pisariaqartitsisunut arlaleriarluni kiffartuussisareerpoq.
- Tamatuma saniatigut piffissap ingerlanerani timmisartoqarfimmut angallassisarpugut aamma sullitatsinnut akimasuunut biilinik angallassisarluta, ilaatigut namminneq timmisartuminnik tikittunut.
Bussit inuppassuarnik angallassisinnaasut
Ingerlatseqatigiiffiup biilinik angallassisarnermik saniatigut timmisartoqarfimmiit Mercedes-Benz EQV arfinilinnut inissalik atorlugu angallassisarpoq, aamma biilit akisuut attartorneqarsinnaasut Mercedes GLE 400e pisiarineqarnikuupput.
– Aamma bussinik marlunnik pisinikuuvugut, taakkulu maajip aallartinnerani tikissapput. Taakku tassaapput Mercedes-Benz Sprinterit tamarmik immikkut 22-nik ilaasoqarsinnaasut. Ilaatigut inuppassuarnut angallassissutaasassallutik, soorlu umiarsuarmik takornarianut angalasunullu amerlanerusunut, Nick Olsen oqarpoq.
