Nuummi biilinik attartortitsineq annertusiartupiloortoq

Deres Auto ukiut tallimat matuma siorna biilinik 15-nik attartortitsisarpoq. Ullumikkullu 100-t missaannik peqarput.

– Aalliartupiloorpugut, aamma unammillerteqaleraluarattaluunniit, Deres Automi pisortaq Michael Østergaard, taassumalu Nuummiut ukiuni kingullerni biilisinatik attartorusunnerusartut malugaa. – Inuiaqatigiinni toqqissisimanngitsoqarnera malugisinnaavarput, taamaattoqarneratalu inuit illusinissamut, biilisinissamut angallatisinissamullu mianersornerulaalernerat kinguneraa, taamaammallu attartornissaq toqqartarpaat. 

Biilit biilertullit 

2025-mi qaammatit pingasut siulliit Amerikamiut præsidentiata Kalaallit Nunaannik soqutiginninnerata kinguneranik immikkut ulapiffiupput. Taamaattoqarneranimi tusagassiortut filmiliortullu nunarsuup sinneraneersut Nuummukaapput, taakkunanilu amerlasuut biilinik pisariaqartitsipput. Tamatuma saniatigut Amerikamiut vicepræsidentiata J.D. Vancep Nuummut tikeraarnissamik pilersaaruteqarnera sioqqullugu isumannaallisaanikkut annertuumik suliaqartoqarpoq. – Ukiup qaammataani siullerni biilinik attartugassanik annertuumik pisariaqartitsisoqarpoq. Filmiliortut, tusagassiortut kiisalu atorfilittarpassuit isumannaallisaanermillu suliaqartorpassuit biilinik attartorumapput. Taakkulu saniatigut Vancep tikeraarnissaa sioqqullugu biilinik ingerlatitsisulinnik qulingiluanik kiisalu sulisunut biilissanik 10-15-nik inniminniisoqarpoq. Ulapinnavippoq, Michael Østergaard oqaluttuarpoq.

Nuuk Rental siuariartorpoq 

Deres Autop saniatigut ullumikkut Nuummi sisamanik biilinik attartortitsisoqarpoq. Taakku tassaapput Biludlejning.gl, Nuuk Biludlejning, LP-udlejning kiisalu Nuuk Rental. Nuuk Rental,2023-mi pilersinneqartoq, siuariartuinnavippoq. 2023-mi qulinik biileqarput. Ullumikkullu 32-nik biileqarput. – Biilit nuannarilluagarisimavagut, biilinillu attartortitsisartutut misileerusussimavugut, taamaammallu 2023-mi misiliivugut, Manu-Malik Kreutzmann Petersen, illooqqani Nick Karl Olsen kiisalu Nikolaj Olsen peqatigalugit Nuuk Rentalimik piginnttoq oqaluttuarpoq.

Taakku pingasuullutik Qinngorpumi ininut Suzuki Swiftinik qulinik pisillutik aallartipput. Kingorna meqqit modelillu arlallit pigilerpaat, tassani Kia Sportage aamma Picanto, Subaru Levorg kiisalu XV, Mitsubishi aammalu Tesla Model Y ataatsit. Manu-Malik Kreutzmannilu naapertorlugu taakku nuannarineqartorujussuupput. Taamattaarlu trailerinik ammasunik qulisanillu attartortoqarsinnaavoq. 

Sullitat piffimmeersut 

Sullitat piffimmeersuunerupput, taakkulu saniatigut takornariat suliffeqarfiillu nittartakkakkut quppernermi toqqaannartumik biilinik inniminniisarput. 

– Piffimmeersut sullitat piffissami sivikinnerusumi sivisunerusumilu biilinik attartortarput. Taakkulu saniatigut sineriammit tikeraat Nuummiinnissaminni biilinik pisariaqartitsisarput, taamatullu aamma takornariat illoqarfimmik annertunerusumik takunnikkusuttut. Suliffeqarfiillu aamma sulisuminnut biilinik attartortarput, Manu-Malik Kreutzmann Petersen oqaluttuarpoq, taassumalu biilit attartugassat silaannaap pissusaanut Nuummilu aqqusinernut naleqquttut toqqartarpai. – Ukiukkut biiliutitta tamarmik pigdækeqarnissaat soorunami isumagisarparput, soorunamilu aamma sermiiaatinik atortunillu allanik atugassanngortitsisarpugut Manu-Malik Kreutzmann Petersen oqaluttuarpoq, taassumalumi attartortut quaattoorsimasut apummit amunissaat aamma misilissimagujaa.

– Tamakkuli akuttusuunik pisarput. Amerlanerit biilerluartarput, ataatsimullu isigalugu sullissagut biilinik tunniussinitsinni biilillu utertinneranni eqaatsumik periuseqarnerput iluarisimaartorujussuuaat. Amerlasuut biilit mittarfimmi utertikkusuttarpaat, tamannalumi aamma periarfissaavoq, Manu-Malik Kreutzmann Petersen oqarpoq, taannalu sullitanit sullinneqarnermik iluarisimaarinnittunit arlaleriarluni sukkulaannattarpoq.

 – Taamaalillunilu arlalitsigut ingerlalluarpugut, taanna oqarpoq.

Biilit asanneri isumaginerilu 

Taamattaaq Nuuk Rentalip biilinik asaaneq isumaginninnerlu naliginnaanngitsoq neqeroorutigaa. Biilinik asaaneq minutsit 45 nalunaaquttallu akunnerit marluk akornanni sivisussuseqartarpoq, tassani biilit qaavisa, iluisa taakkuluunniit tamaasa pineqarnerat apeqqutaatillugu. Tamatuma saniatigut Ozonbehandlingimik taaneqartoq toqqarneqarsinnaavoq, taannalu tassaavoq biilit iluanni tipaarsaallunilu bakteriaajaaneq. Asaanerup nalaani biilit allat atorneqarsinnaapput. Manu-Malik Kreutzmann Petersen naapertorlugu biilinik asaanermik sullissinerit piumaneqarluarput, mannalu tikillugu 700-t sinnerlugit inniminniisoqareerpoq.

Siunissami qaninnermi biilit attartugassat amerlineqassagunarput. Nuuk Rentalilumi ukioq manna biilinik arlalialunnik tikittuussaaq. – Suliffeqarfiup allilernissaa sammivarput, peqatigisaanillu sullitatta iluarisimaarnerat attanniaannartussaavarput, Manu-Malik Kreutzmann Petersen naggasiivoq.

Allaaserisaq Motoorimi saqqummersinneqarpoq. Motoori uani atuarneqarsinnaavoq