Takornariartitsiveeraq USA-mi isumaqatigiissuteqartoq

Jûnârak’ Mikaelsen Qasigiannguani takornariartitsivik Mikami Guest Housemeersoq takornarialerinermik USA-mi nunap immikkoortuani Coloradomi illoqarfiit pingaarnersaanni Denverimi maajimi nittarsaassinersuarmi – tassa Adventure Elevate North America 2025-mi peqataavoq.

Taanna USA-mik ilisimaarinnippallaanngilaq, tasamanili pisut pissutsillu nutaarsiassatigut, inoqatinut nittartakkakkut attaveqaatitigut podcastimillu tusarnaagassiatigut malinnaaffigilluartuullugit. Taamaammat Denveriliarnissaminut isumaaluppoq.

USA-miinninili naatsorsuutigisaminit ajunnginaarnerusimagini, taanna tasamaneereernermini oqaluttuarpoq. Tassalu takornarialerinermik nittarsaassinersuarmi Adventure Elvatetut ittumi aamma peqataarngaarpoq.

Taanna peqataareernermini ima oqarpoq:

– Angalanera nuannerpoq. Mikami Guest Housemeersutut namminerlu pissarsiaqaatigeqaara, nunarpummi, tassa Kalaallit Nunaat soqutigineqaqimmat.

Isumaqatigiissuteqarfeqarluartoq

Jûnârak’ Mikaelsenip USA-miitilluni oqaloqatigisaata amerlanersaat, Qasigiannguani Mikami Guest Housep takornarianut illoqarfimmi asimilu unnuiffissaasinnaasutut neqeroorutaanut soqutiginnittupilussuupput. Aamma toqqinik attartornissamut umiatsimillu angallissinissamut allanillu assigiinngitsunik misigisassarsiortitsinissamut neqeroorutaanut.

Mikami Guest House takornariartitsivinnik annerumaanik minnerumaanillu, Ilulissani mittarfissuassaq atoriaannanngorluni piareeriarpat, Qasigiannguanut ukiuni aggersuni takornariartitsinermik neqerooruteqartalerusuttunik isumaqatigiissuteqarfeqarpoq.

Tassa takornarialerinermik nittarsaassinermi peqataasuni Amerikameersut Kalaallit Nunaannik soqutiginnittorujussuupput.

– Oqaloqatigisama tamarmik præsidentimik Kalaallit Nunaat pillugu oqaasii pillugit utoqqatsineq aallarniutigisarpaat, oqarfigisarlungalu USA-mi amerlanerussuteqartut præsidentimik Kalaallit Nunaat pillugu oqaasii isumaqatiginngilluinnartaraat, Jûnârak’ Mikaelsen oqarpoq.

 Taamaammat Denverimiinnini iluatsilluaqisoq, taanna isumaqarpoq.

Siunissamut isumalluartoq

Siunissaq qanoq takorluugaqarfigaajuk?

- Takornariartitsineq Ilulissani mittarfissuassaq 2026-mi naammassineqassangatinneqartoq atoriaannanngorluni piareeriarpat neriunaateqarnerulissangarpasippoq. Denverimi oqaloqatigisatta attavigisattalu tamatuma Ilulissani mittarfissuassap 2026-mi aasakkut ammareernerani ilorraap tungaanukarfiunissaanut isumallualersippaatigut. Takornariaqarnerusalernissatsinnut piareersalereerpugut qilanaarlutalu, Jûnârak’ Mikaelsen Sermitsiamut oqarpoq nangillunilu. 

Takornariarpassuaqalernissaa anguniagarinngikkaat

Takornariarpassuaqalernissaa Qasigiannguani takornariartitsiveeqqap kulturitsinnik pinngortitamillu qitiutitsisup kissaatiginngilaa.

– Takornarialerinerup ineriartornera pissanganartuaannarpoq – ingammik uagutsinnut Qeqertarsuup Tunuani illoqarfinni minnerusuni najugalinnut. Takornariarpassuaqalernissaa kissaatiginngilarput, mingutsitsinngitsumilli, piviusorsiorpalaartumik, pilertunngitsumik taavalu kulturerput pinngortitarlu qitiutillugit takornariartitsisarnissarput kissaatigaarput.

Mikami Guest Housemeersut Kalaallisut oqaasinnaavut – ”Ajunngilaq” – “ajornavianngilaq” aamma “eqqissilluta” – piviusunik, nipaalluinnartumi imaannaanngitsunillu misigisassarsioriartorlutik takornarianik tikilluaqqusinerminni najoqqutarisarpaat.

– Tuaviupilunnissarput pisariaqartinngilarput. Nunatsinnimi pinngortitaq nunarsuarmi pinngortitani alutornarnerpaanut eqqissisimanarnerpaanullu ilaavoq. Nunatsinnimi isorartoqisumi, silaannareqisumi nipaaqisumilu eqqissillutik misigisassarsiorsinnaanissaat pingaartipparput, Qasigiannguani takornarialerisoq takornarialerinermik USA-mi nittarsaassinermi peqataanermi kingorna oqarpoq.