Ilulissat, Uummannap Upernaviullu akornanni aqqut nutaaq Ilulissani mittarfissamut 2026-mi ammarneqartussamut piareersaataasumik pilersinneqarpoq, Naleraq Sea Safarip pisortaa Heidi Jensen oqaluttuarpoq.
- Ilulissat mittarfissuartaangajalerpoq, tamannalu Ilulissanuunnaanngitsoq aammali Avannaanut takornariartitsisalernissamut piareersaataavoq. Aqqut taanna Uummannamut Upernavimmullu angalanissamut ilassutaavoq, Heidi Jensen oqarpoq.
Ilulissat, Uummannap Upernaviullu akornanni aqqut nutaaq Ilulissani mittarfissamut 2026-mi ammarneqartussamut piareersaataasumik pilersinneqarpoq, Naleraq Sea Safarip pisortaa Heidi Jensen oqaluttuarpoq.
- Ilulissat mittarfissuartaangajalerpoq, tamannalu Ilulissanuunnaanngitsoq aammali Avannaanut takornariartitsisalernissamut piareersaataavoq. Aqqut taanna Uummannamut Upernavimmullu angalanissamut ilassutaavoq, Heidi Jensen oqarpoq.
Targa Nanunnguaq aqqaneq-marlunnik ilaasoqarsinnaasoq Ilulissaniit Upernavimmut sapaatip-akunnerani kingullermi ataasinngornermi angalaqqaarpoq. Ilaasut Upernavimmiit Uummannamut nunaqarfinnullu Ukkusissanut, Saattunut Ikerasamullu angalapput, Sarfaq Ittummullu kujataanut ingerlaartussamut ikillutik.
- Sarfaq Ittuk Uummannami naapittassavarput, ilaasullu Sarfaq Ittummut ilaallutik kujataaniit avannamut Nanunnguamik angalasinnaapput. Uummannaq ingerlaqqiffiussaaq, Heidi Jensen oqarpoq, taassumalu nuannaarutigaa Arctic Umiaq Line suleqatigalugu Nanunnguaq inniminniinermut systemimut ilanngunneqarsinnaammat.
- Aqqut taanna Uummannamut Upernavimmullu angalanissamut ilassutaavoq, Heidi Jensen oqarpoq.
Foto: Privat
- Nuanneqaaq periarfissaammat. Aamma Arctic Umiaq Linemit tatiginninneruvoq, piareersimavugullu angallatigullu atorsinnaallutik. Ilulissani, eqqaani avannaanilu pinngortitaq misigisassat allanut ingerlateqqikkusuppagut, taamaattumik inniminniinermut systemimut ilaanerput nuannaarutigeqaarput. Inuit qanoq tigussagaat pissangassutigaarput, Heidi Jensen oqarpoq.
Angalasut nutaamik periarfissanipput Nanunnguaq siullermeerluni Upernavimmiit Uummannamut angalanerani ikittunnguit ilaasuupput, tamannalu aqqut nutaaq pillugu ussassaarisoqannginneranik pissuteqarsimasinnaavoq.
- Angalanissamut inniminniisut amerlasimanngillat, angalanissamut inniminniinissamut ussassaarinerlunnitsinnik pissuteqartumik, Heidi Jensen oqarpoq.
Pissutsit ilinniarfigereerlugit maanna angalanissamut inniminniinissamut allagartaasivinnut tamanut ussassaaruteqarput.
Naleraq Sea Safarisip pilersaarutaa malillugu Nanunnguaq ataasinngornerit allortarlugit Uummannamut aqqusaarluni Ilulissanit Upernavimmukartassaaq, tassani Arctic Umiaq Linep inniminniinermut atortuatigut billitsisisoqarsinnaalluni. Nanunnguaq Ilulissaniit Uummannamut akunnerit arfineq marluk Uummannamillu Upernavimmut akunnerit arfinillit ingerlasarpoq.
- Maannakkut inniminniisoqarsinnaavoq. Arfininngormat misissorsimavarput aqqut nalilersorniarlugu naleqqussarlugulu. Ilulissaniit Upernavimmut isorartoorujussuuvoq, inuillu Uummannaq aqqusaarlugu angalarusupput. Arctic Umiaq Line suleqatigalugu aqqut Ilulissaniit aallartarpoq Uummannamut Upernavimmullu ingerlaarluni, Uummannami unillatsiarluni avannamut ingerlaqqittarpoq, Heidi Jensen oqarpoq. Aqqullu angalaffigalugu kusanarnerpaanut ilaasoq eqqaallugu.
- Arlaleriarlunga angalaffiginikuuara, Ilulissaniillu aallaraangatta Qullissat, illoqarfik matuneqarsimasoq, Vajgatimiittoq qanittuaraallugu sanioqqullugu Nuussuarmut ingerlaqqittarpugut. Qaqqat portusuut iluliarsuarnillu ulikkaartoq. Ilulissat Kangerluani iluliarsuit siornatigutut angitigiunnaarsimapput, iluliarsuarnilli angallatilluni pinngortitarsuaq alutornangaartoq takussallugu tupinnaqaaq. Avannamukartilluni nipaassuaq aamma eqqissinermik tunisisarpoq, Heidi Jensen oqarpoq.
Misiliut Avannaani ilaasunik angallassineq eqqarsaatigalugu sumiginnarneqartartoq Naleraq Sea Safarimi pisortaq isumaqarpoq. Ingammik timmisartuussinerit taamaatiinnarneqaraangata, taamaattumik Arctic Umiaq Line suleqatigalugu ilaasunik angallassinermik pilersitsineq misiliutaavoq.
- Misiliutaavoq, misilinngikkutsigumi siuariartorunnanngilagut. Tusartarparput Qaarsuniit Uummannamut timmisartuussinerit amerlasuut taamaatiinnarneqartartut, qulimiguulik ajornartorsiorneranit. Maannali periarfissaqalerpoq illoqarfimmiut takornariallu Nanunnguamik ingerlaqqissinnaalernissaat, timmisartumik aallarnissartik anguniarnagu. Uummannamiit Sarfaq Ittummut nuussinnaallutik, Heidi Jensen oqarpoq. Taassuma Naleraq Sea Safari siunissaq ungasinnerusoq eqqarsaatigalugu kiffartuussinissamik isumaqatigiissusiorsinnaassasoq neriuutigaa.
- Neriuppugut kiffartuussinissamut isumaqatigiissut periarfissaalissasoq, aamma akisussaasut oqaloqatiginiarsarivavut ataasiinnaanngitsumik kiffartuussinissamut isumaqatigiissuteqartoqarsinnaanissaa pillugu. Amerlanerillu taamaaliorsinnaanissaat, taamaalillutalu siunissami aningaasaliisoqarnissaa qulakkeerlugu, Heidi Jensen oqarpoq.
