Avannaata Qimussersua: Sukkaniunneq, ileqqutoqaq ataatsimoornerlu naapikkaangata

Sisimiuni sukkaniuttoqarnerani inuit sisamat assigiinngeqqissaartut naapitatta Avannaata Qimussersua qanoq misiginerlugu oqauttuarput. Assigiinngikkaluarlutillu isumaqatigiiffeqarput: Nuannanneq ataatsimoornerlu tamani misigisassaapput.

Avannaata Qimussersua tassaaginnanngilaq qimussimik sukkaniunnersuaq. Aaqqissuussaq taanna meeqqaniit utoqqarnut ataatsimoorfigiuarneqartarpoq. Ukiorpassuarni peqataasarsimagaanni, imaluunniit aatsaat siullermeerluni isiginnaartuugaanni ataatsimoorneq nuannisarnerlu misigisassanut ilaasut naapitatta oqaluttuaraat. 

79-inik ukiulik qimussersuaasarsimasorlu Ville Siegstad isiginnaartunut ilaavoq. Itinnguninilu oqaluttuaraa.

- Ajunngilaq, immaqa ilungersoqatigigaluarukkit nuannernerussagaluarpoq maani nikorfaninniit.

Ville Siegstad qimussimik sukkaniunneq ukiuni 50-ini misilittagaqarfigaa. Peqataannginnamilu allanik maluginiagaqarpoq.

- Isiginnaarlugit uanga tupigisarpakka taama sukkatigisumik ingerlasinnaasut. Akornaniilluni malunnarpiarneq ajorpoq qanoq sukkatigaluni, kisianni avataaneerluni qimussit taama sukkatigisut tupinnarlutillu nuannersorujuupput isigalugit,

Sukkaniunnermi peqataatilluni peqataanngikkaluarluniluunniit aalajangersimasumik misigisaqartuartarpoq.

- Qimussit aallaraangata kikkut tamaavimmik tussunngusarput, malugisarpara aamma uanga. Avataaniillunga isiginnaarlunga aamma tussunngusartorujuuvunga.

Sisimiuni Avannaata Qimussersuartoqarnerani naapitagut tamarmik Ville Siegstaditulli qimussimik sukkaniunnerup iluani misilittagartuujunngillat. Avannaata Qimussersuanik siullermeerluni isiginnaartut ilagaat politikommissæri Kim Nørgaard.

Kim Nørgaardip politiillu allat Usha Vancep Sisimiuni Avannaata Qimussersuaqarnerani innuttaasunut toqqissisimatitsiniarlutik suliaqartussaagaluarput. Amerikamili præsidentip tullersortaata nuliata tikeraarnissani taamaatiinnarpaA. Politillu suliassaraluatik suliarisariaqarunnaarpaat. Taamaakkaluartoq nuannisarput.

- Assorsuaq nuannerpoq, inuillu nuannateqaat. Aammami taamaattussaasoq ilisimatinneqareerpugut. Inuit nuannaarput, aamma politiit nuannaarput. Innuttaasut sukkaniunnermut nuannerluinnartumut isiginnaariat oqaloqatigillattaavagut, Kim Nørgaard taama oqarpoq.

Kim Nørgaardili qimminut tunngatillugu misilittagaqalaareerpoq.

- Nammineerlunga Danmarkimi sulinermi atugassanik qimmeqartarnikuuvunga, taamaammat uumasut nuannareqaakka. Sukkaniuunneq taamaattoq takussallugu assut immikkuullarippoq, aamma inuit nuannateqataanerat assut alutornarpoq.

Qimussersuit 27-t isiginnaartunit qiimmassaasussaaleqinngillat. Anna Dahl Qasigiannguaneerpoq, Sisimiunulli nuunnerulluni. Avannaata Qimussersua ukiuni arlalinni malinnaaffigisarsimallugu tamatumuuna illoqarfimmini aamma misigiinnaqaa.

- Nuanneq, tussunngunaq aallartut. Tulluusimaarnaq.

Avannaatalu Qimussersua aalajangersimasumik ilisarnaateqarpoq.

- Ataatsimoorneq, kalaaliussuseq, kinaassuseq. Inupparpassuulluta maaniippugut tamatta illersuilluta tassa ilisarnaataa.

Sukkaniuunneq Upernavimmiit Sisimiunut peqataaffigineqartoq avannaamiuunerusunit pingaartinneqartarpoq. Avannaamiut ilaat sukkaniuttut aallarfiata nalaanni naapitarput Ane Magdaline W. Kruse aliannaarpoq.

- Nuanneq, ataatsimoortut pissangasut akornaniilluni. Avannaanut assorujuk eqqaanartippara massakkut ataatsimoorrattut inuit. Uanga Uummannap eqqaaninnganneerama, soorlulimi Uummannap eqqaani qimussimut anngunniuttut imaluunniit qimussersuartut akornaniilluni.

Ataatsimilli Uummannamiit allaanerusoqarpoq.

- Inoqanaarpara, assorujuk inoqarpoq.