Qiiaamminartut, quianartut sammisallu itisuut

Laura, Ivaana, Nadja Enalu tasioqatigiipput.

Filmiliaat ”Kaperlak” Nuummi kulturip illorsuani Katuami Hans Lyngep Inersuani takutinneqalerpoq. Nivissat taakku ullumi peqataasinnaajumallutik, Sisimiuni ilinniarnertuunngorniarfimmit maanga tikissimapput.

GUX-imi filmfestivalertitsisoqarpoq, tassanilu inuusuttut Nuummi, Aasianni Sisimiunilu GUX-imeersut filmiliornermik najoqqutassamik allannermik, killuinermik isiginnaartitsinermilu periaatsinik sivisuumik ilinniareerlutik unnummut katersuupput.

Aappassaannik GUX-filmfestivalertitsisoqarpoq, siorna siullermeerluni GUX-filmfestivalertitsisoqarmat oqariartuutigineqarpoq siunertarineqaartoq „inuusuttut isiginnaagassiaminnik takutitsinissaannut ikiorneqarnissaat, filmiliaminnillu naatsumik takutitseqqaarnerminni immikkuullarissutut misigitinneqartarnissaat“.

Filmini naatsuni arfiniliusuni siullertut “Kaperlak” takutinneqarpoq.

Filmeriartut allat akornanni ilorrisimaarlunga issiavunga. Suna tamarmi taartuinnanngorpoq.

Umiarsualiviup eqqaaniippugut. Aasaavoq, qaqqallu kusanartut immap sinaaniittut skærmi tamakkerlugu takutinneqarlutik. Misigisimaneq: Oqitsorsiorneq, qaamaneq aamma nuannaarneq.

Maluginiarneqarsinnaasumik filmip kaperlak aallaavigaa. Qaamanerup kingorna seqineq tarrippoq sunalu tamarmi taartuinnanngorluni. Niviarsiannguaq inuusuttoq festernermi assortuutereernermi tammarsimavoq, nassaarineqaranilu.

- Inuusuttut ullutsinni ajornartorsiutaat filmimi naatsumi sammineqarput. Inuusuttut qanoq sanngiitsigisinnaanerat, taakkuninngalu soqutiginninnerunissaq sammineqarlutik, Ena Kleist 18-inik ukiulik oqarpoq.

Taassuma Laura Larsen, Ivaana Zeeb aamma Nadja Ingemann Larsen filmilioqatigai.

Filmi tulliuttoq „Viinu“, inunnut allanut attaveqarnermi annilaangasarneq pillugu filmiliaavoq.

- Filmiliara nammineq inunnut allanut attaveqarnermi annilaangasarninnik misigisimasakka tunngavigalugit filmiliaraara, tamatumani inuit allat pillugit isumakuluuteqartarnera pingaarnertut isumassarsissutiginerpaavara. Tamatumani najoqqutarineqarlutik nipinik tusaasaqartarneq, nammineq pilluni oqallisigineqarnermik tusaasaqartutut misigisimanerit, Mikael Kristiansen GUX Aasianneersoq festivalimi apeqqarissaartoqarnerani oqarpoq.

Isiginnaartut ilaat niaqquminik anngaavoq, filmiliortorlu malinnaaffigeqqissaarlugu.

Ersitoorujussuaq

Filmit naatsut pingajuat takutinneqarpoq. Taanna piviusulersaarutaavoq taaguuteqartoq ”Qanorluunniit atugaqaraluaruma”. Oqariartuutigineqartoq: Inuuneq qanorluunniit ilungersunartigigaluaraangat, sulluliap isuani qaamaneqartuaannarpoq.

Isiginnaariat qimerloorpakka, imminullu qungujuutigalunga. Imminut naammagisimaarlunga, suullu tamarmik ajunngitsumik ingerlajumaartut misigisimavunga. Nuan.

Qungujulanera amiilaarninnguukkumaartoq nalullugu, filmi naatsoq tulleq aallartilermat ingilluartiterpunga. Filmit naatsut kingulliit pingasut ersinartulersaarutaapput.

Filmit qiiaamminartut nuannarisarinngilakka, kisiannili isiginnaarusuttuaannarlugit. Tamatumunnga patsisaagunarluni ulluinnarni ajornartorsiutinni annilaarnartut ima amerlatigisut takusimagakkit filmerlugit isiginnaartariaqannginnakkit. Quiasaarniakujunneq tassunga killeriarlugu, kiinara minutsini tulliuttuni qulini 15-iniluunniit assannik assersimavara.

Uagut kalaallit qiiaamminartunik oqaluttuat nuannarilluartuuavut, tamannalu aamma filmimik isiginnaartunit tusaasinnaavara. Annilaangalluni nillianerit illarnerillu meeqqat atuarfianni paarlattaasunik ilinniartitsisoqartarnitsinnut eqqaasaqalersippaannga. Paarlattaallutik ilinniartitsisuusartut ersinartulersaarutinik oqaluttuallaqqinnerpaasarput.

Torsuusat takisuut, naqqup atai taartuinnaat aamma arnat aliortukkatut isikkullit, taartunik takisuunik nujallit takutinneqaqattaartut isigisinnaajunnaangajattarpakka. Eeq.

Tassanngaannarlu uaajeertartut marluk qitillutik takkuteriasaarput. Illarneq alutorsarnerlu inimi tusarsaalluarput. Kaar, uaajeerluni qanoq quiasaarisoqarsinnaanersoq tamannalu namminermut qanoq sunniuteqarsinnaanersoq malugalugit nuanneqaaq.

Ersineq quiasunnerlu ataatsikkut. Tassa aatsaat.

Ajugaasullu tassaapput...

Ajugaasunillu toqqaasussat kikkut akissarsitinneqassanersut aalajangertussanngorpaat: ”Ersinartulersaarutit pitsaanersaat” aamma ”oqaluttualiullaqqinnerpaanut killuillaqqinnerpaanullu” akissarsititsisoqassalluni. Oqaluttualiullaqqinnerpaatut killuillaqqinnerpaatullu filmi naatsoq ”Kaperlak” toqqarneqarpoq.

Filmiliornermi iliuuseqarluarsimanerput nuannaarutigeqaara, Nuan!

Inuit filmimit ilikkagaqarsimassasut neriuutigaara tassa tamanut inissaqarneranut tunngasumik, inoqatitsinnut inussiarnernerusariaqartugut allanillu eqqartuussinata asannittuliornerusariaqarnitsinnik, filmfestivalip kingorna Ena Kleist nuannaaqaluni oqarpoq.

Qiiaamminartoq ”Malippakkit” qiiaamminartut pitsaanersaattut toqqarneqarpoq.

Oqiliallassimasutut, kulturikkut pisuunnguallassimasutut nuannaarlungalu Katuamit anivunga. GUX-imut qujanaq.