Timmisartup aquttarfianiit ilisimatusartut silarsuaannut

Apriili. Seqineq inimi qaammaqqutaallualereerpoq, suli ullaaralaannguugaluartoq. Tamatuma ersersippaa aasaq arriikkaluamik qanilliartulersimasoq.

Pissangalaarluni, taamaattorli annertuunik naatsorsuuteqarnani, Mitdlarak naartunerluni misiliummik puiaalerpoq. Qaammatit marluk matuma siorna Danmarkimiippoq, qitornartaarusulluni passutsippoq. Pingajussaanik.

Uffarfik matuneqarpoq.

Suli uernaraluarpoq, taamaattorli pisussaasutut misigivoq naartulersimanermut misiliut misilittariaqarlugu. Arlaatigut misilittariaqarlugu.

Errorfiup eqqaanut misiliut Mitdlaaqqap ilivaa siniffimmullu ingerlaannaq innariartoqqilluni.

Nulia Tuperna pissangalluni uffarfimmukartarpoq misiliutillu inernissaa utaqqitillugu. Ukiut tallimat matuma siorna katernaajugamilli meerartaarnissartik oqaluuserisarsimavaat.

Misiliummi titarnerit marluk erseriartulerput, taannalu naartulersimasinnaanermut aalajangiisuusarpoq.

Tupernap nuliani nuannaarluni pissangallunilu qaaqquaa.

Naartulersimapput. Pingajussaanik misiliinerminni iluatsitsipput.

Kiisamilu kissaatigeqisimasaminnik meerartaartussanngorput.

Mitdlarak Lennert kalaallit ilisimatuut akornanni maluginiarnartuuvoq inuusuttunullu amerlasuunut isumassarsisitsisartuulluni, pingaartumik ilinniartitaanermut tunngasunut. Ph.d.-itut ilinniagaqarnini atorlugu nunatsinni meeqqat atuarfianni ilinniartitaanerup ilusaa misissuiffigisimavaa. 

Siusissukkut immikkut ittumik ilinniagaqarnerminik soqutiginninnini takutippaa ukiullu marluk ingerlanerinnaanni inuiaqatigiilerinermi bacheloritut ilinniakkani naammassisimallugu. Tamanna ilisimatuussutsikkut nukittuneranut uppernarsaataavoq.

Mitdlaqqalli inuunermini angalanera allaanerulluinnartumik aallartippoq: meeraalluni nunarsuaq silaannarmit isigisinnaajumallugu timmisartumilu aquttutut sulilernissani takorloorsimavaa.

Inuunerulli allamut saatsissimavaa, tassa ilisimatusarnermut ilinniarnermullu sangutillugu ingerlagami, ullumikkullu ilisimatuussutsikkut suliani ingerlalluarfigilerpai.

Arnaq taanna atuakkanik ilinniarnermut atugassanik arlalinnik saqqummersitsimasoq ilisarisimalluarnerujumallugu sammilaassavarput.

Mitdlarak Lennert maajip aappaani 1988-imi inunngorpoq Sisimiuni peroriartorluni. Angajoqqaarivai Lis Pedersen Lennert, peqqinnissaqarfimmi ikiorti, aamma Gunnar Lennert, aalisartoq. Mitdlarak Lennert nukaqarpoq.

- Ukiunik marlunnik nukara nukarliuvoq. Mumingariilluinnartutut oqaatigineqarsinnaagaluarluta immitsinnut qanittuararsuuvugut. Taanna sanasuuvoq assamminillu suliaqarneq nuannarilluinnarlugu, uangalu atuakkanut tunngasut nuannarineruakka, Mitdlarak Lennert oqaluttuarpoq.

Qimusseq Wendylu

Meeraanermi sisoraatinik arpanneq, qimusserneq umiartornerlu initungaatsiarsimapput.

- Tallimat missaannik ukioqarlunga sisoraatinik arpattartalerama nuannareqaara. Iligiiaarluni timersuutiunngitsoq silamiluunniit ingerlanneqarmat, tamannalu uannut tulluarpoq, Mitdlarak Lennert oqarpoq.

Aasakkut umiatsiartarput tuttunniartarlutillu, ukiukkullu ilaqutariit qimusserlutik angalasarput.

- Eqqaamavara ataatagalu Sisimiunit Kangerlussuarmut qimussimik angalaarluta, tassanilu nammineq qimusseqarpunga, taanna oqaluttuarpoq.

Mitdlarak Lennertip meeraallunili atuarneq nuannaraa, siullermik atuakkiat titartakkat Anders Andit aamma hestit pillugit atuagassiaaraq Wendy atuartarlugit.

- Arriitsumik atuakkanut nuukkiartuaarpunga. Atuagaq siullerpaaq akkannit tunissutisiaraara. Taanna tassaavoq ”Hobbitten“, atuakkiat tulleriaat Ringenes Herre aallarniutaat, taanna oqaluttuarpoq.

Meeqqat atuarfianiinnera, Minngortuunnguup Atuarfiani, ingerlalluarsimavoq, atuarneralu ajornanngitsumik ingerlarsorluni.

2005-imi 11. klassini naammassigami USA-mi Mainemiittumut AFS-imi ilinniartussatut aallarpoq — silarsuarmut sungiusimasaminit allaanerulluinnartumut pilluni.

- Angajoqqaarsiakka uppertuupput, sapaatillu tamaasa atisarissaarlunga naalagiaqataasarpunga. Tamanna sungiusimasaniit allaanerujussuuvoq, taanna oqaluttuarpoq.

Pinngortitarsuaq kusanaqisoq allanngoraqisorlu Mainep sineriaani qaqqarsuit avatangiiserilerpai, naaralaartitsiviit aalisartullu nunaqarfeeraat tassani aamma takussaapput. Mitdlarak Lennert tassani ukiivoq, amerikamiut juullisiortarnerat misigalugu minnerunngitsumillu sisoraatigaluni ooqattaasarneq nuannarilluinnagaanut ilaavoq.

OL-imut anngukkusuttoq

- Ilaqutariit Slettemarkikkut Juniorit VM-erneranni peqataanissannut neqeroorfigimmannga ooqattaasarluni sisorarnermik sungiusartalerpunga, Mitdlarak Lennert oqaluttuarpoq.

Mitdlarak Lennert qatanngutissani Mainemeersoq peqatigalugu inuusuttut nunarsuarmi pissartanngorniunneranni taamaalilluni peqataavoq.

- Sisoraatinik ooqattaasarneq assut nuannarilerpara, AFS-imiillu Norgemi ilinniarnertuunngorniarfimmi sisoraatinik ooqattaasarnermik sungiusaatigiffiusumi ilinniarlunga aallartippunga, Mitdlarak Lennert oqarpoq.

Taamaalillunilu amerikami ulluinnaat Tromsømi, “Avannaata Parisiani”, ulluinnarni inuuneq arsarnernik pinngortitamillu taarserneqarpoq.

Tassani Mitdlarak Lennert 1. g-mi atuarpoq, tamatumalu kingorna ilinniarnertuunngorniarfimmi atuarnini naammassiniarlugu Sverigemut nuulluni. Ulluinnarni sungiusarneq atuaqqissaarnerlu ulapputigisarpai. Tassami Europami pissartanngorniunnerni, nunarsuarmi pissartanngorniunnerni Europa Cupimilu unammisarsimavoq, ilaatigut Italiami, Korea Kujallermi Canadamilu.

Mitdlarak Lennert 2009-mi ilinniarnertuunngorami ukiumi ataatsimi sungiusarniarluni sulinngiffeqalerpoq.

- Taamaaliorpunga OL-imut peqataarusukkama, oqarpoq.

Taamaattorli silarsuaq allaanerusumik pilersaaruteqarpoq. Mitdlarak Lennert saarngit nagguatigut aseruuttoornermik, ajoqusernerup kingunerisaanik aseruuttoorpoq.

- Sverigemi anngunniunnermi peqataassallunga angumerivara, aseruuttoornerali ima annertutigisimavoq pilatsittariaqalerlunga, Mitdlarak Lennert oqaluttuarpoq, taannalu Kalaallit Nunaannut uterpoq sungiusaqqittariaqarluni.

Taamaalinerani ilinniarfimmut kissaatigisaminut qinnuteqarnissamut piffissaalluarpoq, Danmarkimilu timmisartortartutut misilitsippoq.

- Ilinnialernissannulli akuerineqanngilanga tullianilu misileeqqeqqullunga kaammattorneqarpunga. Taannalu pilersaarutinni sallernut tullinngorpoq, taanna oqaluttuarpoq.

Utaqqiisaami taava suna sammissavaa? Mmh, eqqarsartariaqarpoq. Ajunngilaq, Ilimmarfimmi inuiaqatigiilerinermi ilinnialernissaminik pilersaalerpoq.

-“Utaqqiisaarutigiinnarlugu”, eqqarsarpoq.

Naluaa tamanna soqutigisaqalernissaminut kingusinnerusukkullu sulilernissaminut iluaqutaangaarumaartoq.

 Ukiuni marlunni bacheloritut ilinniagaqarneq

Atuakkat, allanneq misissuinerlu timmisartortartutut pilersaarutigisaraluanut ajugaapput.

Mitdlarak Lennert 2010-mi inuiaqatigiilerinermi bachelorinngorniarluni aallartippoq, ukiullu marluk qaangiummata naammassilluni.

- Ukiut marluk ingerlaneranni bachelorinngorniarluni naammassisoqarsinnaanersoq paaserusussimavara, taanna oqarpoq.

- Sisoraatinik ooqattaasarnermi misigisimasakka nuannarisakka anguniagaqarnikkullu nukikka atuakkanut saatinneqarput, Mitdlarak Lennert oqarpoq.

Ukiuni marlunni bacheloritut ilinniakkaminik ingerlatsinermi nalaani Mitdlarak Lennert USA-mut uterpoq, tamatumuuna Dartmouth Collegemi semesteri ataaseq ilinniassalluni. Taanna tassaavoq Ivy League-institution, tassaallunilu USA-p avannaata kangiani universitetit arfineq-pingasut ataqqisaanerpaat pitsaanerpaallu ilaattut ilinniartitsisarnertik pissutigalugu akuerineqartartut ilaattut ilisimaneqartoq. Tassani semesterimi ataatsimi atuarnini naammassivaa.

2016-imi meeqqat atuarfii pillugit ph.d.-nngorniarluni allaaserisaqarpoq.

- USA-miinninni, Sverigemiinninni Norgemiinninnilu nunatsinnut sanilliullugu misilitsittarnernut periutsit allaanerusut maluginiarnikuuakka. Sooq ilinniartitaaneq taama aaqqissuunneqarnersoq paaserusutsappara, Mitdlarak Lennert oqaluttuarpoq.

Ilisimatusarfimmi Ph.d.-nngorniarneq marlunnik neqerooruteqarpoq, aappaa nalinginnaasumik ukiuni pingasuni ingerlanneqartartoq aappaalu adjunktitut ukiuni arfinilinni ingerlanneqartartoq.

Mitdlarak Lennert ph.d.-nngorniarluni ilinniagaqarpoq, adjunktitut ingerlasussaalluni, tassa ukiut arfinillit iluini naammassisinnaagaluarluni ukiut sisamaannaat qaangiummata naammassilluni.

Paarlakaallutik naartusassasut

Mitdlarak Lennert ilaatigut MIO-mi siunnersortitut sulisareerluni ukiunilu marlunni namminersortutut sulisareerluni Ilisimatusarfimmut maanna utereersimalerpoq.

Naartunera ulluinnarni inuuneranut sunniuteqangaatsiarpoq.

- Piffissangaatsiaq atorlugu arlarput naartussanersoq aalajangerniarsaraarput, aalajangerpugullu uanga naartussasunga. Kissaatigigatsigulu arlalinnik qitornaqassalluta, taava nuliara tulliani naartussasoq siunnerfigaarput, taanna oqaluttuarpoq.

- Ajornanngippat aamma paarlakaajaalluta milutsitsiniarpugut, Mitdlarak Lennert oqarpoq.

Nuummi pineqaatissinneqarsimasunut inissiisarfiup nutaap suli sananeqalinnginnerata nalaani pisuttuarnerminni Tupernamut nuliarsarpoq.

- Qimmitta qilerniusaanut assammioq qilerutsiullugu inissinnikuuara, maluginngilaali. Minutsit 30-it ingerlapput, sulilu tassa takunagu. Haha, kiisami aatsaat takuaa! Mitdlarak Lennert oqaluttuarpoq.

Katissimasutut aappariinnerminni maanna ukiut sisamassaat inooqatigiipput.