ESANI A/S pisortartaartoq

Nunatsinni kommunit sisamaasup eqqagassalerineq pillugu ingerlatseqatigiiffiutaanni, ESANI A/S-imi pisortaq, Frank Rasmussen, ingerlatseqatigiiffimmi pisortaajunnaarpoq.

Tamanna suliffeqarfiit pillugit paasissutissanik nalunaarsuiffiup, CVR-ip, nittartagaani allassimavoq.

Paasissutissanik nalunaarsuiffiup paasissutissat pigisai naapertorlugit Frank Rasmussen, ukioq manna maajip aallaqqaataanit pisortaajunnaarpoq. Frank Rasmussen ingerlatseqatigiiffimmi 2019-imit pisortaavoq.

Pisortaq nutaaq

ESANI A/S-imi ukiuni kingullerni arfineq-marlunni pisortaasoq pisortaajunnaarmat suliffeqarfik nutaamik pisortartaarpoq. 

Siulersuisuni siusinnerusukkut siulittaasuusoq, aamma Kommune Qeqertalimmi aningaasaqarnermut pisortaasimasoq, Nicolai Odgaard Jensen, pisortanngortoq, suliffeqarfiit pillugit paasissutissanik nalunaarsuiffiup nittartagaani allassimavoq.

Sermitsiap suliami qanorpiaq pisoqarsimanera paasiniarlugu ESANI A/S-imi siulersuisut siulittaasuat, Søren Sohn Krog Pedersen, aamma suliffeqarfimmi pisortatut atorfinitsinneqartoq, Nicolai Odgaard Jensen, attaveqarfigigaluarpai. Allaaserisalli suliarineqarnerani taakkunaninngaannit qisuariartoqanngilaq.   

ESANI A/S kommuninit ukuninnga pigineqarpoq: Kommune Kujalleq, Kommuneqarfik Sermersooq, Qeqqata Kommunia aamma Kommune Qeqertalik.