Qaanaami apriilimiit maajimut takornariaqarnerpaasarpoq, tamanna piniartut saniatigut isertitaqarnissaminnut periarfissaqarfigisarpaat. Angallannikkullu pitsanngorsaasoqarnissaa takornarialerisunit kissaatigineqarpoq.
Ileqqutoqqanik
misigisaqarniarluni takornariartarneq, tuluttut ”authentic experience”-mik
taaneqartartoq, nunarsuarmi soqutigineqaleraluttuinnartoq Qaanaami aamma malugineqarsinnaasoq, takornarialerinermik suliffeqarfiutilik oqarpoq.
Qaanaami apriilimiit maajimut takornariaqarnerpaasarpoq, tamanna piniartut saniatigut isertitaqarnissaminnut periarfissaqarfigisarpaat. Angallannikkullu pitsanngorsaasoqarnissaa takornarialerisunit kissaatigineqarpoq.
Qaanaamut timmisartukkut angallassineq (2025)
Air Greenland 144-riarluni Qaanaamiit
Qaanaamullu timmisartuussisimavoq.
Angalanissat 94-sit taamaatiinnarneqarput.
Angalanissanik taamaatitsiinnarnerup
kingunerisaanik immikkut ittumik 40-riarluni timmisartuussisoqarpoq.
Qaanaamut angallassinermi unammillernartut:
- Silap pissusiata allanngorarnera
- Pisariaqartillugu angalanerup nalaani marlunnik
miffissaqarsinnaaneq
- Pituffik Space Base-p ammaneranik pinngitsuuisinnaannginneq
- Timmisartup orsussaqarnerunissamik pisariaqartitsisarnera
timmisartumi inissanik killeqartitsisarnera
Taamaatitsiinnarnermi periarfissiissutigineqartartut
- Angalasut timmisartumut angalasussamut siullermut
inniminniissunneqartarput
Air Greenland makkuninnga periarfissiisarpoq:
· Kinguaattoornermi
nerisaqartitsineq
· Unnuisarfinni
unnuisitsineq.
Najoqqutaq: www.airgreenland.gl
Ileqqutoqqanik
misigisaqarniarluni takornariartarneq, tuluttut ”authentic experience”-mik
taaneqartartoq, nunarsuarmi soqutigineqaleraluttuinnartoq Qaanaami aamma malugineqarsinnaasoq, takornarialerinermik suliffeqarfiutilik oqarpoq.
- Ileqqutoqqanik
misigisassarsiorniarluni takornariaqarneq (Authentic experience tourism, aaqq.) nuannarineqaleraluttuinnarpoq tamannalu takornarialerinermi siunissaavoq. Takornarissat amerlasuut allaanerusumik
kulturimik misigisaqarnissartik soqutigisorujussuuaat, tamannalu Qaanaami
misigineqarsinnaavoq, Saki Daorana takornarialerinermik suliffeqarfiutilik oqarpoq.
Qaanaami
piniartut takornarianik qimussimik angallassinissamik misilittagaqarluarput.
- Piniartut tuluttut qallunaatulluunniit
oqalussinnaanngikkaluarlutik pikkorissorujussuupput. Takornariap qimussimik angalaareerluni
orninnikuuaanga oqaluttuullunga, aatsaat taama pitsaatigisumik nuannertigisumillu
nunarsuarmi assissaqanngitsumik misigisaqarsimalluni, Saki Daorana
oqaluttuarpoq.
Qimussimik angallassineq
Qaanaamiit
Siorapalummut Qeqertanullu, sermersuakkut itivinnertalerlugu qimussimik
takornarissanik angallassisoqartarpoq.
- Qimussimik angalaaruttarpagut
nunaqarfinnut marlunnut, Qeqertanut Siorapalummullu, arlaat takorusunneraat
apeqqutaalluni. Kangerluarsukkut Iterlassuarmut sermikkut itivissullugit
qimussiuttarpagut, takornarissat alutorinerpaasarpaat sermikkut
itivinnertik, Adolf Simigaq piniartoq qimussimik angallassisartoq oqaluttuarpoq.
Takornarissat Siorapalummut Qeqertanulluunniit sermikkut ituinnertalerlugu qimussimik angallanneqartarput.
Assi: Masauna Peary
Takornariat nunanit assigiinngitsuneersut tikittarput.
- Assiliisut,
filmiliortut ilisimatusartullu tikittarput, qimusseriartorlutik, imaluunniit
sikup sinaani qilalugarniarnermik misigisaqarusullutik, Saki Daorana
nassuiaavoq.
Takornariaqarneq
piniartut aningaasanik isertitsinissaannut pingaaruteqarpoq
Qaanaami
aalisartunut piniartunullu qaleralinnik mattannillu tunitsivimmut tunisineq
annerusumik aningaasatigut isertitsissutaasarpoq.
- Aningaasarsiornissamut
periarfissat ikittuararsuupput. Piniartut kulturikkut ingerlatsillutik saniatigut
takornariaqarnikkut isertitaqarnissaanni suleqataanera tulluusimaarutigaara,
Saki Daorana oqarpoq.
Piniartut takornarianik
angallassinissaminnut pilernguttarput.
- Piniartut qimmeqartuusugut
aningaasanik isertitsilaarnissarput pingaartittarparput, ilaanni qimussiusserusulluta
piumaneqqusaattutut ittarpugut, Adolf Simigaq oqaluttuarpoq.
Angallannerup pitsaanerulernissaa kissaatigineqarpoq
Air Greenlandip Qaanaamut angalanissamut akigititai
Ulloq 24. april
2026 Air Greenlandip nittartagaatigut Qaanaamut 11.-21. maj 2026 inummut ataatsimut
angalanissamik pisigaanni illoqarfinniit ukunaniit imatut akeqarput:
Københavnimiit
Qaanaamut uterlugulu: 30.275,00 koruunit.
Nuummiit
Qaanaamut uterlugulu: 24.570,00 koruunit.
Ilulissaniit Qaanaamut uterlugulu: 15.928,00 koruunit.
Najoqqutaq: www.airgreenland.gl
Silarlutsillugu angalasoqarsinaannginnera takornarissat paasisinnaasarpaat, silagissisimatilluguli angallassisoqartannginnera paasiuminaatsinneqartarluni.
- Takornariat paasisinnaasarpaat sila pissutigalugu kinguaattoornertik. Silagissisimatilluguli timmisartukkut angallassisoqartannginnera takornarianit paasiuminaatsinneqartarpoq, Saki Daorana oqarpoq.
Taamaattoqarneralu takornariat pakatsissutigisarpaat.
- Qaanaamut takornariarniaraluarluni tikinngitsoorsimasup oqarfiginikuuaanga, sooq nunarsuarmi akisunerpaamik billetsisilluni angalalluni taamatut misigisaqartinneqassanerluni, Saki Daorana oqaluttuarpoq.
Qaanaami kulturimik
imaluunniit mongoliamiut kulturiannik misigisassarsiornissaq takornarianit toqqarneqartarpoq.
Takornarissanik qimussiussinermit assilisaq.
Assi: Saki Daorana.
- Nunatsinni angallannerup
akisunerujussua angallannermillu taamaatitsiinnartarneq pissutigalugu
takornarissat Qaanaaliassanerlutik Mongoliamukassanerlutilluunniit
aalajangertariaqartarput. Mongolialu toqqarneqartarpoq tikikkuminarnerummat,
taamaalilluni aningaasat nunatsinnut isertitsissutaasussat annaaneqartarlutik,
Saki Daorana oqarpoq.
Kingulliunneqartarnerminnik naammagiliisut
Sila pissutigalugu angallannikkut kinguaattoortoqarsimatillugu Qaanaamut angalasut kingulliunneqartarnerat aaqqiivigineqartariaqartoq takornarialerisup kissaatigaa.
- Immikkoortitsineruvoq.
Nuummi silarluppat timmisartukkut angallassinissaq taamaatiinnarneqartarpoq, silagissippallu
ingerlaannaq angalasussat angalatinneqartarlutik. Qaanaamiit Qaanaamullu
angalasussat ullut marluk, pingasut, tallimat allaat sapaatip-akunnera
utaqqitinneqartarput, isumaqarpungalu sumiiffiit assigiimmik atugassaqartinneqartariaqarput, Saki Daorana
oqarpoq.
Piniartup Qaanaamut
Tunumullu angallannerup kingulliunneqartarnera timmisartut amerlineqarnerisigut
ajornartorsiut aaqqinneqarsinnaasoraa.
- Kitaani
kinguaattoortoqarsimatillugu Qaanaamut timmisartoq angalasussaagaluartoq kitaani
atorneqartarpoq, taamaalilluni Qaanaamut angalasussat kinguarujussuartarlutik. Timmisartut
amerlineqarpata ajornartorsiut aaqqinneqarsinnaasoq eqqarsaatigisarpara, Adolf
Simigaq oqarpoq.
