Angakkup nuliani marluk erinarsorfigigai

Angakkup qilaatersortartullu Kunnak Eqeeqqup qallunaaq oqaatsinik ilisimatusartoq inuup inuiaqatigiillu pissusiinik aamma ilinniagartuujusoq William Thalbitzer (1873-1958) niuertoqarfimmi Angmagssalimmi ukiileruttornerani 1906-imi upernaap aasallu akornanni tikeraarpaa.

Kunnak Tunumi inngerutinik katersuinermi immiussinermilu pingaarutilinnik paasissutisseeqataasarsimavoq.

Thalbitzerilu assiliisartuusimavoq pikkorissoq, taassumalu assilisimasaata ilarpassuisa taamanikkut ukiut aqqaneq-marluinnaat sioqqullugit niuertoqarfiulersimasumi inuusaatsimik ersersitsisuupput.

Thalbitzerillu Kunnak nuliaminut marlunnut meerarpassuamilu ilaannut marlunnut Tasiilami qaqqat ilaata saavani seqinnarissuup ataani 1906-imi aggustip ulluisa ilaanni qilaatersuleruttortoq assilisimavai. Thalbitzerip assilisami tallimaasut aqqi tamarmik ullorsiutiminut allattorsimavai, ukuusut: Kunnak Eqeeqqu (1849-1913), nuliai marluk Qivi (1872-1915) aamma Natseq (1859-1910), paniilu Qianianngaaq (1902-25) aamma Miladdeeq (1887-1921).

Angakkoq taanna Tunumi Kunnakkunt siuaasaraat. (Kinguaariit taakku atertik ullumikkut ilaatigut ima allattarpaat: Kúnak, Kunnaaq aamma Kunak).

Thomas Nedergaard Krabbe (1861-1936), Th. N. Krabbemik aamma taaneqartartoq Tunup sineriaanut 1900-kkut aallartinneranni tikittunut aamma ilaavoq. Taanna nakorsatut Nuummi 1891-imiit 1901-ip tungaanut atorfeqarsimavoq, Danmarkimullu utereernermi kingorna inuusaatsinik Peqqinnissaqarfimmit paasiniaajartortitatut sisamariarluni nunatsinni 1904-p 1909-illu akornanni angalasimavoq; pingasoriarluni Tasiilamut ataasiarlunilu Thuletoqqamut. Krabbelu assiliisartumik pikkorissumik taamanikkut aamma angalaqateqarpoq, assiliisartullu taassuma assilisimasaani torrallataanerpaat atuakkami »Grønland - dets natur, beboere og historie«-mi 1929-meersumi naqitanngortinneqarput.

William Thalbitzerip aamma Th. N. Krabbep assit katersaat ilaatigut Københavnimi Arktisk Institutip allagaateqarfissuaniipput, taakkunanngalu digitalinngortitat nittartagaaniillutik: https://www.arktiskebilleder.dk/pages/search.php 

Tasiilamit assitoqqat toqqarai

Allakkerivik frimærkinik marlunnik inuiaat oqaluttuarisaanerannut tunngasunik assiliartalersukkanik sapaatip akunnerani matumani saqqummersitsivoq.

– Frimærkinik tulleriaanik Kalaallit Nunaanni inuiaat oqaluttuassartaannik ilisimatusarnermi assilisatoqqanik assiliartalersukkanik saqqummersitsinissaq qangali kissaataavoq, frimærkilerinermi pisortaq Allan Pertti Frandsen oqarpoq.

Eqqumiitsuliortoq Ina Rosing, 1965-imi inunngortoq, frimærkinut saqqummersitanut assiliartalersuisuuvoq, taassumalu assitoqqat qalipaateqanngitsut assiliartassatut toqqakkani nammineq qalipaasersorsimavai.

– Assitoqqat assitaliussassatut toqqakkama taamanikkut inuusaatsimik ersersitsilluinnartuunerat takorluuisitsisuunerallu attanniarlugit allanngortinngikkaluarlugit qalipaasersulaarlugit suliaraakka, Ina Rosing nassuiaavoq.

Ina Rosingip Tasiilami inuiaat oqaluttuassartaannik ilisimatusarnermit assitoqqat marluk frimærkini tulleriaani siullertut saqqummersinneqartussani assitaliussassatut toqqarpai:

1) Ilaqutariit Kunnakkut assingat William Thalbitzerimit 1906-imi assilisaq aamma 2) Arnarpaat aasivimmi toqqip saavaniittut assingat Th. N. Krabbemit 1904-mi assilisaq.