Atuagaq kalaallisooq atuakkiortunut nersornaammut innersuunneqartoq
Pilu-mik nukappiaraq imaanut tissukartinneqartoq angerlamut aqqutaa nassaariniarlugu oqaluttuaq maanna Nordisk Råds meeqqanut inuusuttunullu atuakkiat nersornaasiuttagaanut 2025-imut innersuunneqarpoq.
Uilu Pedersenip atuakkiaa siulleq “Pilu” 2024-mi novembarip 28-ani saqqummerpoq.
Assi: Leiff Josefsen
Uilu Pedersenip atuakkiaa “Pilu” Nunat Avannarliit Siunnersuisoqatigiivisa meeqqanut inuusuttunullu atuakkianut nersornaasiuttagaannut 2025-mut innersuunneqarpoq.
Nunat avannarliit siunnersuisoqatigiivi nittartakkaminni taama allapput.
Meeqqat summiiffimmut ilisimasaqarfiginngisamut angalanissamik imminullu ajugaaffiginissamut sapiissuseqalernissaat atuakkami sammineqarput.
Oqaluttuaq Kalaallit Nunaanni pivoq, kalaallillu oqaluttuatoqaannut assingussuteqarluinnarpoq. Nukappiaraq Pilu angumminik sunngiffimmini qajartoqateqartartoq pillugu oqaluttuaavoq. Taakku qaannamik kinngusaarnermik sungiusartarput.
Angalaneq unammillernartoq
Pilup ataataa allamut samminerata nalaani Pilu sarfagussaavoq nunamullu ungasissorujussuanngorluni. Imaanut millugunneqarpoq immallu naqqaniit silarsuarmut allamut pilluni.
Angalaneq unammilligassaq aallartippoq, taannami angerlarniarsarilerpoq. Aqqutaani aataaliannguaq uumasullu allat naapippai.
“Pilu” Uilu Pedersenip atuakkiaani siullersaavoq. Aasianni peroriartorpoq maannalu Nuummi najugaqarluni, tassanilu tarnip pissusiinik ilisimasalitut sulilluni.
Atuagaq Susanne Jensenimit, Nuummi peroriartortumit najugaqartumillu, assiliartalersugaavoq. Taanna assilialiornermik meeqqanut ilinniartitsisuuvoq.
