Marriortoq aamma eqqumiitsuliortoq Kristine Spore Kreutzmann Nuummilu eqqumiitsuliortut allat peqatigalugit aallarnisaasunut illuliorniarput, ”Eqqumiitsuliorneq qitiutillugu” taaguutigalugu, tassani tamarmik immikkut illumik qisummik sanaamik illuliorniarput, sullivissanik, saqqummersitsivissanik imaluunniit pisiniarfissanik 20, 25 imaluunniit 40 kvadratmeterisut annertussusilinnik.
- Uanga illuutiga sulliviussaaq saqqummersitsivilik aamma pisiniarfittalik. Illumut iseraanni pisiniarfimmi pisiarineqarsinnaasunik saqqummersitaqassaaq, ilorpasinnerulaartumilu tunisassiorfimmik sulliveqassalluni, marriortoq Kristine Spore Kreutzmann, sanaartornissamut akuersissummik qinnuteqarniarluni qinnuteqaatinik piareersimatitaqartoq taama oqarpoq.
Marriortoq aamma eqqumiitsuliortoq Kristine Spore Kreutzmann Nuummilu eqqumiitsuliortut allat peqatigalugit aallarnisaasunut illuliorniarput, ”Eqqumiitsuliorneq qitiutillugu” taaguutigalugu, tassani tamarmik immikkut illumik qisummik sanaamik illuliorniarput, sullivissanik, saqqummersitsivissanik imaluunniit pisiniarfissanik 20, 25 imaluunniit 40 kvadratmeterisut annertussusilinnik.
- Uanga illuutiga sulliviussaaq saqqummersitsivilik aamma pisiniarfittalik. Illumut iseraanni pisiniarfimmi pisiarineqarsinnaasunik saqqummersitaqassaaq, ilorpasinnerulaartumilu tunisassiorfimmik sulliveqassalluni, marriortoq Kristine Spore Kreutzmann, sanaartornissamut akuersissummik qinnuteqarniarluni qinnuteqaatinik piareersimatitaqartoq taama oqarpoq.
Eqqumiitsuliortut sanasunut assigiinngitsunut sanaartortitsinissamut neqeroortitsiniarput, illullu piareeqqasut nuunneqarsinnaasut siullermik Kulturip Illorsuata Katuap, kommunip allaffeqarfiata, blok 2-p aamma Nuuk Centerip akornanni biilit unittarfiannut inissinneqassapput.
- Neriuppugut decembarimut piareersinnaassasut, juullimut tuniniaaneq angumerisinnaaniassagatsigu, kisianni ukiortaami aatsaat pisinnaassagunarpoq, Kristine Spore Kreutzmann oqarpoq.
Namminersortut ataatsimoortut
Nadja Arnaaraq Kreutzmann aamma ”Eqqumiitsuliorneq qitiutillugu”-mi illutaassaaq, tassani kuultinik pinnersaasiornermut sulliveqarlunilu pisiniarfeqassaaq.
Assi: Oscar Carl Scott
Kuultimik pinnersaasiortartoq Nadja Arnaaraq Kreutzman, maannamut Tuapannguani inissiamini sulisartoq, ”Eqqumiitsuliorneq qitiutillugu” illutaasa piareernissaannut qilanaarpoq, tassani eqqumiitsuliortut allat namminersortut qanimut ataatsimooqatigisinnaassagamigit.
- Illut taakku pingasut sisamat piareerpata toqqissisimatitsillutillu illoqarfimmut nuannersaataassapput. Taakku pitsaalluinnartumik suliaqarfiussapput. Juulleriartornerani illut akornanni qulleqartassaaq, najugaqartunut aamma takornarianut illoqarfiup qeqqani cementimik sanaajusut akornanni kalaallit illuinik mikisunik qisunnik sanaanik peqalernissaa nuannaarutaassaaq, kuultinik pinnersaasiortartoq Nadja Arnaaraq Kreutzmann, 25 kvadratmeterisut angissusilimmik illoqalersussaq oqarpoq, taanna kuultinik pinnersaasiorfittaqarlunilu pisiniarfittaqassaaq.
Marriortoq Kristine Spore Kreutzmann ullumikkut Nuuk Centerimi IQ Naasut ineeraani sulliveqarpoq, namminerlu sulliveqalernissaminut qilanaarpoq.
- Nammineq sulliveqalernissatsinnut tamatta qilanaarpugut. Taarsigassarsiavut akilereeriarutsigit tamakkiisumik nammineq sullivigilissavavut. Init nammineq aalajangiiffigisinnaalissavavut, sulliviillu sumulluunniit nuunneqarsinnaassallutik.
Marriat, pinnersaasiat aamma eqqumiitsuliat Kristine Spore Kreutzmann Illorsuarnit aamma Kangerlussuarmit sioqqanik aamma qajuusaasanik ilaatigullu qeqqussanik, marriaminik silaannamik putuliortitsinermut imaluunniit ilisarnartunik qalipaasiinermut ilusiliilluni naqitsinermut atuisartoq, nammineq pisiniarfiuteqalernissaminut qilanaarpoq.
- Tiitorfinnik, puugutarsuarnik aamma soyamut kuitsivinnik allanillu marrianik tuniniaasassaanga. Aamma nerinermut atortussiakka ”Takanna-nik assitallit” tuninialissavakka, Kristine Spore Kreutzmann oqaluttuarpoq.
Assitai iganermut ilitsersuummi atuakkami ”Takanna”-meersuusut Milik Publishingimit saqqummersinneqartumit, aamma arnaata Nina Spore Kreutzmannip assiliartalersugaaneersuusut, taanna nassuiaavoq.
- Taakku ”Takanna”-meersut inuit utaqqimaaraat ilimagaara, tassami misiliutit siulliit inuit attaveqaqatigiittarfiini assinginik saqqummiussaqarnikuuvunga, Kristine Spore Kreutzmann oqarpoq.
Kuultinik pinnersaasiortartup Nadja Arnaaraq Kreutzmannip unnukkut akunnerit amerlanngitsut atorlugit pinnersaasianik tunisassiornissamut isumassarsiortarpoq, taakku pisiniarfiani aalajangersimasumik pisiassanngussapput.
- Sorpassuit mikisut tuniniarneqassapput, assersuutigalugu pinnersaasiat arfermit isumassarsiorluni suliat uninngasuutikka. Maanna tajanut imaluunniit ujamminut attatanik assigiinngitsunik mikisunik suliaqarpunga, Nadja Arnaaraq Kreutzmann, immikkut inniminnikkanik suliaqartartoq oqaluttuarpoq, taakku kalaallit kuultiannik aamma ujaraataannik pinnersaasianik piumasarput.
Allat tikilluaqqusaapput
Illu qisummik sanaaq aallarnisaasut sullivissaannut ilaasoq Kristine Spore Kreutzmannimut aningaasaliinerussaaq.
- Uagutsinnut aningaasaliinerussaaq, naggataatigullu illu nammineq pigilerlugu ininik allanut attartornermut akiliuteqarunnaassaagut, taanna oqarpoq.
Maannamut eqqumiitsuliortut pingasut ataatsimoorput, allallu aamma namminneq sanaartortitsillutik suliniummut ”Eqqumiitsuliorneq qitiutillugu”-mut peqataasinnaanerat takorloorneqarpoq.
- Annertunerulersinnaasoq takorloorpara, illoqarfeeranngorsinnaavoq sullivilik kaffinik annissassanik pisiniarfilik, aamma allanik soqutiginartunik ineriartortitsiffiusinnaasoq. Allat illumik sanatitserusukkunik Peter Oluf Meyer, titartagaatilik aamma suliniuteqartoq attaveqarfigisinnaavaat, Kristine Spore Kreutzmann oqarpoq.
Illut Grønlandsbankenip Inuussutissarsiortunut aningaasaateqarfianit, Nalik Venturesimit, aamma nammineq ileqqaakkanit, aningaaserivimmiillu taarsigassarsianit aningaasalerneqarput.
