Folketingip ataatsimiittarfianiittut akornanni uaajeertoq perngaammik angalaarunarpoq.
Kalaallit Nunaat pillugu Ataatsimiititaliaq sisamanngormat ualikkut juullerpalaartitsimmat tamanna pivoq, tassani peqataasut quilertapput, illarsaarneqarput minnerunngitsumillu qaninniarfigineqarlutik.
Folketingip ataatsimiittarfianiittut akornanni uaajeertoq perngaammik angalaarunarpoq.
Kalaallit Nunaat pillugu Ataatsimiititaliaq sisamanngormat ualikkut juullerpalaartitsimmat tamanna pivoq, tassani peqataasut quilertapput, illarsaarneqarput minnerunngitsumillu qaninniarfigineqarlutik.
Josepha Lauth Thomsenip Arctic Childimeersup uaajeernerata saniatigut nipilersoqatigiit INUANIMA-kkut Aviaja Lumholt Igor Radolu, Uummannami Meeqqat Angerlarsimaffianneersut Karina Møllerilu appisimaarput. Aamma oqalugiartoqarpoq, orpik kaavinneqarluni naggasiinermilu Aavaakkut erinarsoqatigineqarlutik.
Uaajeertartoq Josepha Lauth Thomsen
Assiliisoq: Trine Juncher Jørgensen
Politikkimut sulianut isumassarsiat
Kalaallit Nunaat pillugu Ataatsimiititaliap tusagassiutillu suut ukkatarisinnaaneraat peqataasut isumassarsiaminnik aamma anngussivigisinnaavaat. Periarfissaq amerlasuunit atorneqarpoq.
Koldingimi ilinniarnertuunngorniaq Aviaya Andersen siunnersuuteqartut ilagaat:
– Danmarkimi ammip qalipaataa aallaavigalugu kalaallinut immikkoortitsisarnermut assigiinngisitsisarnermullu iliuusissatut pilersaarut ujartorpara. Pilersaarut qanittukkut tamanut saqqummiunneqassasoq kissaatigaara, atuutilersinneqarniassammammi, Aviaya Andersen oqarpoq. Taassuma ikinngutini Nuummeersoq Christiansborgimut ilagai, qatanngutigiit Ellen Klara Jeppesenilu aamma Magda-Maria Treur.
Saamerlermiit Klara Jeppesen, Magda-Maria Treur, Ellen Jeppesen aamma Aviaya Andersen
Assiliisoq: Trine Juncher Jørgensen
Pingaarnersiugassat ukkatarineqartussallu pillugit eqqaasinneqarneq
Inuit Ataqatigiinneersoq Aaja Chemnitz aaqqissuussisuuvoq, taassumalu tapersersuineq annertooq aamma Kalaallit Nunaat pillugu ataatsimiititaliamut tusagassiuutinullu isumassarsiarpassuaqarnera nuannaarutigaa.
– Tusagassiuutinut tunngasut DR-imut TV2-mullu ingerlateqqissavakka. Kalaallit Nunaat pillugu ataatsimiititaliamut siunnersuutit tamaasa allattortarpavut ataatsimiititaliamilu ilaasortanut tamanut nassiutissallugit. Ammip qalipaataa aallaavigalugu kalaallinut immikkoortitsisarnermut assigiinngisitsisarnermullu iliuusissatut pilersaarummut tunngatillugu pilersaarut qanoq ingerlanersoq pillugu marlunngornermi oqallisigisussaavarput. Taamaattumik siunnersuutit ilaannut suliat ingerlapput, allalli isiginnittaasaat tusarlugit pitsaasarpoq. Siunnersuuterpassuit Kalaallit Nunaat pillugu ataatsimiititaliami sunik ukkataqarnitsinnik pingaarnersiuisariaqarnitsinnillu eqqaasitsissutitut isigaakka, Aaja Chemnitz oqarpoq.
