Inuuneq siulittorneqarsinnaanngilaq

Pia Brobergip Nuup immikkoortuani Qinngorpumi angerlarsimaffiani billeti mikisoq qernertoq nerrivimmiippoq.

Angerlarsimaffiani ini qaamasoq akerliusumik taartunik qalipataallunilu alutornartunik pequtsersugaavoq.

Nipaannera immamullu isikkivia takorannersoq toqqissisimanarlunilu nuannerpoq.

Billetimi qernertumi franskit ilisarnaataat Eiffelip napasuliaa takuneqarsinnaavoq.

Piap billeti tupitut ilusiligaq talerpimminik tigullugu isigaa. Qungujuppoq.

Assiliatut aalasuliatut isiginnaartuusillugu utersaarpoq.

- Anaana takuuk, Sikki arfinilinnik ukiulik Parisimi illorsuarnut portusuulianut oqaluttuarisaanermullu ilisarnaataasunut tikkuarpoq.

Anaana aanaalu qiviarput. Sikkip piumasaatoqqissaaq. Ikasarporli. Soqanngilaq. Kiinarsorlunilu mitaarpai.

Pia uumitsakujuppoq, aanaalli tissigiinnaramiuk qungujuppoq. Tassa taamaattuuvoq, ilagalugu oqittorsiornarlunilu qungujulajuaannartoq. Ilaqutariinnittaaq katersuutsitsisarpoq. Ilaqutariinnik atatitsisuusoq.

Sikki anaanani Pia aananilu Juliane ilagalugit Parisimiippoq, pingasuinnaalluni Disneylandimiinnissaq Parisillu qeqqani takornariarnissaq siunertaavoq.

Aanaa Juliane tassaavoq Piap ullumikkut assigerusutaa. Inuunermini naleqartitaasa tamanna ilagaat. Ilaqutariittut ataqatigiinneq, aamma meeraaraallunili misigisarsimasaa.

Pia Broberg 1980-imi decembarip 30-ani Nuummi inunngorpoq. Arnaa tassaavoq Juliane Noahsen Frederiksen, Qeqertarsuatsiaaneersoq. Allaffimmiutut ilinniarsimavoq.

- Anaanaga ukiut pingasut napparsimareerluni qaammatit pingasut matuma siorna kræfterluni toquvoq, oqaluttuarpoq.

Ataataa tassaavoq John Frederiksen. Nuummioq. Tusassimi ukiuni 50-ini sulinikuullunilu oqarasuaatinik attaviliisartutut ilinniarsimasuuvoq.

- Tele-Postimi peroriartornikuusunga oqartoqarsinnaavoq, tassami meeraallunga ataataga sulisoq ilagiuartarnikuuara, oqarpoq.

Pia Broberg marlunnik aqqaloqarpoq. Palle Amosilu.

Eqqaamasaani siulleq tassaavoq aqqalortaaqqaarsimatsiarluni pisoq.

- Kikkunnit tamanit sammineqarlunilu isigineqaannarmat sinngagaara. Nuannarinngilara, Pia Broberg kingumut eqqaakuluppoq.

Piap pingasunik ukiullip aqqaluni inoorlaaq sofamiittoq iipilimik milorpaa.

- Aqqalugalu marluulluta qiasupilussuusugut anaanama saammarsaraatigut eqqaamavara. Iliuusera tupaallaatigigunarlugu uangattaaq qiagama, illarpoq.

Nunaqarfimmiuuneq

Pia Brobergip inunngorneraniit ukioq ataaseq qaangiuttoq ilaqutariit Qeqertarsuatsiaanut nuupput, tassanilu ukiut arfineq-marluk najugaqarput.

- Piffissaq taanna meeraaninni eqqaamasanni nuannernerpaagunarpoq. Nunaqarfimmi toqqissisimaqqissaarlunga meeraavunga. Nuannareqaara, oqaluttuarpoq.

Qeqertarsuatsiaaniinnerminni silamiingaatsiartarput, ilaqutariillu pinngortitamiittaqaat. Sulereeraangamik pinngortitami nerisassiorlutilluunniit ukiussamut pilisarput. Inuuneq pisariunngitsoq pilersaarusiorfiunngitsorlu.

Meeqqalli atuarfiani atualertussanngormat ilaqutariit Nuummut nooqqipput. Piavaqqamut allanngornerujussuaq.

- Toqqissisimaffigisamiit illoqarfimmut anginerujussuarmut nuunneq nuanninngeqaaq. Maanna suna tamaat pilersaarusiortussanngorparput, aammalu meeqqat nutaat naapillugillu atualertussanngorpugut, eqqaamasalersaarpoq.

Ataataalli suliartortussanngormat ilaqutariit sorlaqarfitik qimallugit Aasiannut nuummata kulturikkut tupatsitaasimaneq oqinnerulaalerpoq. Pitsaaneroqaaq. Illoqarfik mikinerusoq inuillu ikinnerusut.

Ukiut marluk Qeqertarsuup Tunuata kimmut kujasissortaaneereerlutik Nuummut uterput. 1990-imi.

Aqqalortaqalersimallutik.

Pia meeqqat atuarfianni Atuarfik Samuel Kleinschmidtimi atualerpoq. Oqaasilerineq nuannareqalugulu kisitsisilerineq fysikkilu nuannarinngilluinnarpai.

Angisuunngoruni timmisartoqarfimmi billetinik tigooraasoorusuppoq. Taakku sullisillit.

- Nuannaartorersuaarpakka! Atorfiat qanoq taaguuteqarnersoq naluara, taakkuli sullisigisariaqarpakka, oqarpoq.

Billetiniit kigutinut

Pia inuusuttuaranngorsimasoq meeqqat atuarfiat naammassereeramiuk siullermik namminersortumut efterskoleriarluni Danmarkiliarpoq, taannalu kingusinnerusukkut akiliisinnaajunnaartutut nalunaarutigineqarpoq.

Angajoqqaavisa marlunnik toqqagassippaat, angerlarsinnaasoq imaluunniit atuarfimmik allamik ujaasissutissanerlugu.

- Angerlarseraluaqalunga Danmarkimiiginnassallunga toqqarpara. Qallunaatut ilinniarusuppunga, taamanikkummi ilinniaqqissagaanni taamaaliortariaqarpoq, Pia Broberg oqaluttuarpoq.

Pia ukioq ataaseq Danmarkimeereerluni nutaamik ilinniagaqarusulersimalluni 19-inik ukioqarluni Nuummut uterpoq. Kigutinut nakorsanngorusuppoq. Taamaammat Nuummi ilinniarnertuunngorniarfimmi atualerpoq.

- Nuanneqaaq. Festertaqaagut, sunaaffalu inuunerma sinnerani ikinngutigisassannik ikinngutitaarpunga, oqarpoq.

Ilinniarnera unammillernarpoq, tassami kigutinut nakorsanngorniaraanni kisitsisilerineq fysikkilu qaffasissumik ilikkarsimasariaqarput. Fagit Piap nuannarerpianngisai.

Ilinniarnertuunngorami karakteriisa agguaqatigiisinneri kigutinut nakorsanngorniarnermut naammanngitsuulaarput. Immikkulli qinnuteqarnikkut Københavnip Ilisimatusarfiani ilinnialernissaminut akuerisaavoq. Pialli inuunera taamaattussaasimanngilaq.

- Septembarimi aallartussaavunga, angutaatitaarpungali. Nuummiiginnarniarlunga aalajangerpunga. Ilaannikkut uggorilaartarpara, taamanili uummatiga malikkakku tamanna pingaarnerusoq isumaqarpunga, oqarpoq.

Piap taamaalilluni meeraanermini takorloortarsimasani piviusunngortissinnaalerpaa. Air Greenlandip angallannermi ikiortitut ilinniartitsinermi ilinniartussarsiorneranut ussassaarut takuaa.

- Soorlu tassa katitigassat inissittut. Tassaneeqqissaartussaavunga. Taamaalillunga ukiut qulingiluat Air Greenlandimi sulivunga, Pia Broberg oqaluttuarpoq.

Piap Air Greenlandimiinnermini uissani Aningo Broberg naapippaa.

- Ukiup affaa peerareereerluta isertorluta kommunemi katillutalu Sikki 2005-imi ernertaaraarput, oqarpoq.

Aappariit ukiut aqqaneq-marluk affarlu katisimareerlutik kateqqipput, tamatumuuna oqaluffimmi.

Inuuneq siulittorneqarsinnaanngitsoq

Piap aamma Aningo Brobergip takornariaqarnermut suliffeqarfiutertik Sumut Greenland ukiut marluk matuma siorna 2023-mi aallartippaat. Umiatsiartitsinermut ingerlatseqatigiiffik kangerlummi umiatsiaassinernik angallassinernillu assigiinngitsunik neqerooruteqarpoq.

Suliffeqarfimmik nammineq aallarniinissamik eqqartuineq Atlantiku qulaallugu timmisartuussisunut mittarfittaarnissaq eqqartorneqalermat aallartippoq.

- Anaanagalu napparsimalereersoq inuuneq siulittorneqarsinnaanngissorigatsigu kingusinaannginnitsinnilu misileraaniassagatta pimoorussilerpugut, Pia Broberg oqaluttuarpoq.

Aallarnisaasoorusullunilu nunatsinni takornariaqarnerup siuarsarnissaanut peqataarusukkami siunissami inuuniutigerusullugu takorloorpaa.

Tassunga pinngortitaq pingaarnerpaavoq. Pinngortitamiinneq pinngitsoorsinnaanngilaa.

- Meeraaninni pinngortitamiittarnikuunera peqqutaaqataagunarpoq. Tassani toqqissisimallungalu nukissanik katersisarpunga, oqarpoq.

Sunngiffimmi aamma pinngortitamiittarpoq, aqisserniarneq nuannareqaa.

- Ukioq naallugu aqisserniarfiugaluarpat ukioq naallugu piniartassagaluarpunga, illarpoq.

Aqisserniarluni takisuumut pisunneq aqissimillu takulluni aallaagaanni ilukkut pissangaammerneq Piap silarsuaani nuannernerpaavoq.

Pinialunngikkaangami nuersaajutaa peqquserlunnerit pillugit oqaloqatigiilluni piviusulersaarusiat tusarnaartarpai.

Arnami toqoreernerata kingorna allatut ulluinnaqaqqilernissaq ilikkariartorpaa. Soorlu tassa kinaassusimi ilaa annaasimagaa.

- Toqoreermat qanoq nukittutigisinnaallunga paasilerpara. Aliasunneq nukinnguukkiartortoq malugisinnaavara. Soorunami aliasullungalu maqaasisaqaara, maqaasinerulli inooqatiginissaa ilikkalerpara, Pia Broberg oqarpoq.