Isiginnaartitsisartoq, ilitsersuisoq, manuskriptimillu allattartoq Anders Glud Jensen isiginnaartitsisarfinnut qiiaamminartuliortarnermik misilittagaqarpoq, ilaatigut isiginnaartitsissut Clara Sarah-lu aaqqutigalugu.
Aatsaalli siullermeerluni kalaallinut isiginnaagassiamik allappoq. Isiginnaartartut qallunaanut sanilliullutik oqaluttuatoqqanik sungiusimannittut:
Isiginnaartitsisartoq, ilitsersuisoq, manuskriptimillu allattartoq Anders Glud Jensen isiginnaartitsisarfinnut qiiaamminartuliortarnermik misilittagaqarpoq, ilaatigut isiginnaartitsissut Clara Sarah-lu aaqqutigalugu.
Aatsaalli siullermeerluni kalaallinut isiginnaagassiamik allappoq. Isiginnaartartut qallunaanut sanilliullutik oqaluttuatoqqanik sungiusimannittut:
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
- Maanimiut qiiaamminartumut eqqaanarsinnaasumik misigitissagukkit pikkorinnerulertariaqarlunga ingerlaannaq paasivara, Anders Glud Jensen, ”Tarrat Akornanni” Tallimanngorpat Katuami takutinneqaqqaarnissaanut misilillugu takutitsinermi AG-p naapimmani oqarpoq.
– Ingerlaannaq qiiaamminartuniissasoq paasivarput, produceri atikkersuisorlu Lisbeth Karline Poulsen isiginnaartitsissummik isumassarsiaq, Naleraq Eugenius Anders Glud Jensenilu pilersitartik pillugu oqarpoq.
Leiff Josefsen
Anders Glud Jensenip isiginnaartitsissusiaanut filmimillu takutitassiaanut siuliinut sanilliullugu oqaloqatigiinnerit kalaallit oqaasiinut, nammineq oqaluussinnaanngisaanut, nutserneqarsimanerat isiginnaagassiap uuma immikkuullareqqutigaa.
Taamaammat suleqatigiittut sapaatip akunneri marluk siulliit manusip atuarnissaanut oqaatsillu oqaloqatigiinnerillu isumaqatigiissutiginissaannut atorpaat.
- Kalaallisut torraasorisakka piviusumi isumaqarpallaanngillat. Unammilligassaqaqaaq pissanganaqalunilu, Anders Glud Jensen oqarpoq imalu nangilluni:
- Ilungersornarpoq, kalaallisulli nipit taamak tusarnertigisut tusarlugit aamma tunissutaavoq.
Isiginnaagassiaq eqqumiitsuliortoq Lisbeth Karline Poulsen isiginnaartitsinermilu teknikeri Naleraq Eugenius peqatigalugit pilerpoq. Taakku siusinnerusukkut isiginnaagassiaq 2018-meersoq ”Ukiumi Ulloriaq” suleqatigiiffigaat, taakkulu tamarmik”Tarrat Akornanni” produceriupput.
- Tarrat taamaallaat qaamanermi pinngorsinnaanerat matumani pineqarpoq. taarmiunngitsoq, Anders Glud Jensen, ilitsersuisoq
Suliniut nutaaq aallartikkamikku, kiserliorneq, maqaasineq, ersinartut taartullu sammissallugit isumaqatigiissutigaat. Tassanngaanniillu qiiaamminartut qanittuaraapput.
- Ingerlaannaq qiiaamminartuussasoq isumaqatigiissutigaarput. Taavalu kina oqaloqatigissallugu nalunarunnaarpoq, Lisbeth Karline Poulsen, Københavns Film- og Teaterskolemi ilinniartitsisumik Anders Glud Jensenimik naapitsinikoq oqarpoq.
Qiiaamminartut aamma tissinartorujussuusarnerat immikkuullarequtaavoq, isumassarsisut oqarput. Inersimasut tupallutik nillersinnaanerat immaqa isiginnaartitsisunut tissinarnersaasarpoq. Isiginnaartitsinerlu naammassigaangat isiginnaartut arlamik ernumanerpaasimanera qinngasaarutigisinnaasarpaat, ilitsersuisoq oqaluttuarpoq.
- Toqqissisimanartumi quarsaartinneqarnissaq matumani pineqarpoq. Pissanganarpoq quianarlunilu aamma. Qiiaammineq kisimi naammanngilaq. Filmit qiiaamminartut nuanniitsut quarsaartitsiniaannavinnermik imaqartarput, taanna oqarpoq.
Kiserliornermik paasiniaaneq
Isiginnaartitsissut ajunaarnersuup kingorna tujorminartumi taartumi ajortut akornanni pissasoq Anders Glud Jensenimut saqqummiunneqarpoq.
- Tarnikkut peqqissutsimut tunngassasoq ingerlaannaq isumassarsivunga. Angut silarsuarmini ajutoornermik misigisoq. Nammineq silarsuaa silarsuarluunniit avatangiisia aserorsimanersoq naluarput. Ernumanerullu tigummillugulu aquppaa, Anders Glud Jensen oqaluttuarpoq.
Isiginnaagassiami pingaarnertut takutinneqarpoq Ulloriaq, silarsuarminik aserortuulersoq, Salik Gudmundsen Lennertip inuttaaffigaa.
Leiff Josefsen
Isiginnaagassiap allannissaa qaammatinik pingasut/sisamanik sioqqullugu ilitsersuisup kiserliorneq qasusoornerlu atuarlugit paasiniaaffigai taamatullu aamma amerlasuunik oqaloqateqarlunilu apersuilluni.
- Katsorsaasut, psykologit inuillu kiserliornermik uannit sakkortunermik misigisimasut oqaloqatigaakka. Kiserliornerli tamatta nalunngilarput, taamaammallu oqaluttuaq tamatsinnik ataatsimuulersitsisuuvoq, Anders Glud Jensen oqarpoq.
- Silarsuarmi sumiluunniit kiserliortoqartarpoq, Lisbeth Karline Poulsen ilassusiivoq.
Ataatsimoorfiuneralu pingaaruteqarpoq.
- Isiginnaagassiaq nunatsinni kiserliornermut tunnganngilaq, silarsuarli tamakkerlugu attuumassuteqarfigalugu, Anders Glud Jensen, isiginnaagassiamik sianiutinik qasusoortarnerup qanoq ineriartortarnera malillugu allanniarsimasoq erseqqissaavoq.
- Taaq aggersoq, pujorlu uatsinnik matusillunilu tigusisartoq pivarput. Ersinartut iisarpaatigut. Qasusoortarneq taamaapporlusooq, immitsinnut matutilluta mattuttarpaatigut, ilitsersuisoq nassuiaavoq.
Isiginnaagassiami Ulloriaq inimini imminut mattuteqqasoq naapipparput. Raatiu inuinnaallu nittartakkakkut naapeqatigiittarfianni allanneq taamaallaat silarsuarmut avatangiisiminut attaveqaatigaa. Tarranik ungusimaneqarpoq iluminilu taarnersuaq akiortariaqarlugu.
- Inuuvoq kiserliortoq, anniaatilik uummatigissoq. Ernumanerli uummataaniippoq. Tamannalu ilisarnaatigaa oqaluttuassartaralugulu, Anders Glud Jensen isiginnaartitsissutigineqartoq Ulloriaq, Salik Gudmundsen Lennertip, Nunatta Isiginnaartitsisarnermik Ilinniarfiani siorna naammaassisup inuttaaffigisaa pillugu oqarpoq.
Kiserliorneq pillugu qiiaamminartumik isiginnaagassiap isiginnaartuni misigissutsinik sunik pilersitsisinnaaneranut tunngatillugu Anders Glud Jensen Lisbeth Karline Poulsenilu Tusaanngamik Katuamiittussamik suleqateqarlutik oqarput.
Isiginnaartitsissut pingasoriarlugu takutinneqassaaq – taakkulu tamarmik akeqanngillat – arfininngornermi nalunaaqutaq sisamanut persuarsiornartumik kiisalu sapaammi ataatsinut sisamanullu.
Taarsuaq qaammartiguk
Isiginnaartitsissut nammineq sukkassuseqarlunilu nammineq iluseqarpoq, ilitsersuisoq Anders Glud Jensen nassuiaavoq.
Taamaammat isiginnaariartussat silarsuarmik piunngitsumik allaanerusumik, ilisarnartumilli misigisassamik piareersarpai.
Qaamaneqartillugu tarrat aatsaat piusinnaasarput. Taaq qaammartittariaqaripput isiginnaartitsissutip”Tarrat Akornanni” oqariartuutigaa.
Leiff Josefsen
- Qulequtaata oqaatigisaatulli taaq tarrallu atorpavut. Tarrat taarnermiunngitsoq taamaallaalli qaamanermi piusinnaanerat pineqarpoq. Tassa tarrat takusinnaagutsigit ersigalugillu, tamanna aamma qaamaneqarnerannik patsiseqarpoq. Oqaaseqatigiit: Taarneq qaammarsaruk. Tarrat ersigisatta immaqa uatsinnut malersuisunut ilaanerat, ilitsersuisoq oqarpoq.
Imminoornikkut annaasimasavut, qanorluunniit imminoortut qanitsigisimagaluartillugit, taakku tarraasa malersortaraatigut isiginnaartitsisummi aamma oqariartuutaasoq, taassuma ilanngullugu nassuiaatigaa. Taakkuli malinnagit maaniiginnarnissarput kissaatigaat. Taakkulu kiserliornermit aniguiumallutik aqqutissaminnik nassaarsimasinnaannginnerat, uagut nammineq aqqutissatsinnik nassaarnissatsinnik piumassuseqalersitsisinnaavoq.
Uagummi kisitta aqqut taanna ingerlaffigisinnaavarput, Anders Glud Jensen tikkuaavoq:
- Uatsinneertussaavoq. Qaamanermik inunnillu avatangiiseqarnissarput iluaqutissaraarput. Uagulli kisitta nammineq aqqut taanna tummarsinnaavarput. Neriuppungalu inuit tamanna sakkussatut tigullugu atussagaat: Tassa aqqut taanna namminneerlutik ingerlaffissaralugu. Allatut ajornartumik kisimiillutik aqqut taanna ingerlaffigisariaqarpaat, taanna oqarpoq.