NIPILERSORNEQ
Nipilersortartut kujataani angalalersut
Jenseeraq Olsen aamma Malik Kleist maanna Kommune Kujallermi nipilersorlutik angalanissaminnut pilersaarusiuleruttorput. Narsarsuaq, Narsaq, Qaqortoq kiisalu Nanortalik nipilersortunit tikinneqassapput.
Jenseeraq Olsen
Jenseeraq Olsenip Malik Kleistillu suliniutaat "Aajumaaq" NunaFondenimit, Eqqumiitsuliornermut Aningaasaateqarfimmit, Tips & Lottomit kiisalu Kommune Kujallermi kujataani illoqarfinni nunaqarfinnilu angallanneqarnissaanut tapiiffigineqaqqammerpoq.
- Pilersaarusiornerit ingerlanneqaleruttorput inississorneqarlutillu angalanissammut nipilersoqattaarnissamullu. Eqqaasissutigissuarpullu turnép aaqqissuunneqarnera tusarnaariassanut akeqartussaanngimmat tamanullu ammasussaalluni imigassartaqaranilu, Jenseeraq Olsen tusagassiuutitigut taama nalunaaruteqarluni allappoq.
"Aajumaaq" kalaallit nipilersortartut angisuut peqatigalugit musikvideotut saqqummersinneqarnikuuvoq.
Angalaneq
Tusarnaartitsiartorlutik angalasut meeqqanut inuusuttunullu nipilersornermut tunngasunik takutitassaqarput, tassani Jenseeraq Olsen Malik Kleistillu rockimik nipilersornermi erinnanik nutaanik saqqummersitaminnik takutitsissallutik.
Tusarnaartitsinermi assigiinngitsunik suleqataaffigineqarluni qulliit, nipilersuutit eqqumiitsuliornerlu misigineqarsinnaassapput. Kinguaariinnut isumassarsiorfiusinnaallutik.
Jenseeraq Olsenip aamma ilisimatitsissutigaa tusarnaartitsinerit tamarmik imigassartorfiussanngitsut isernerlu tamanut akeqassanngitsoq.
Tusarnaartitsinissamut ullut suli aalajangerneqanngillat.
