Nordatlantisk Hus silap pissusiata allanngutsaaliornissaanut iliuuseqartunut ilannguppoq
Silap pissusiata allanngoriartornerata nunarsuarmut sunniutai pillugit, Odensemi Nordatlantisk Hus silap pissusaata allanngoriartornerata eqqumaffigineqarnerunissaanut siunissami suliniuteqartalerniarpoq.
Friederike Gründger saqqummersitsinermi nivinngaavinnissaa pillugu.
Knud Fl. Larsen
Siunissaq ungasinnerusoq eqqarsaatigalugu Odensemi umiarsualiviup eqqaani Nordatlantisk Husip ilaani silap pissusianik misissuisarfimmik ineriartortitsinissaq takorluugaavoq, tassani Atlantikup avannaani Issittumilu silap pissusiata allanngoriartornera sammineqassaaq.
Odense Kommunemi Silap Pissusianik Avatangiisinillu Ingerlatsivimmit 500.000 koruuninik aningaasaliiffigineqarnikkut suliniummik suliaqartoq atorfinitsinneqarpoq, taassuma soqutiginnittut assigiinngitsorpassuit suleqatigalugit isumassarsiat allaaserinissaat piffissallu ingerlanerani piviusunngortinnissaat sulissutigissavaa, Nordatlantisk Husip atuarfimmi sammisassaqartitsinerani nuannarineqarluartumi silap pissusaa ilanngunneqarsinnaasalissaaq.
Arctic Terrain
Nordatlantisk Husimi Kalaallit Illuannilu pisortap Annette Lyberthip nuannaarutigeqaa isumassarsiat ukiualuit matuma siorna eqqarsaatigineqartut maanna ima siuariartigilersimasut allaat silaannaap allanngoriartornera pillugu saqqummersitsineq angisooq siulleq saqqummiunneqarsinnaanngorsimalluni.
- Saqqummersitsineq Arctic Terrain-imik taaguuteqarpoq, Kalaallit Nunaat minnerunngitsumillu Ilulissat Kangerluata eqqaa isumassarsiorfiuvoq, neriuppungalu saqqummersitsineq ukiunilu tulliuttuni suliniutissarpassuit ataatsimut isigalugit siunissamut piujuartitsinerusumut ilisimannilersitsissasut, Annette Lyberth Sermitsiamut oqarpoq.
Pinngortitaq pingaaruteqarpoq
Saqqummersitsineq eqqumiitsuliortunit ilisimatusartunillu Friederike Gründerimit, taaguutini “Girl in the Tangerine” atorlugu, aamma Mark Hutchisonimit pilersinneqarpoq. Taakkua Kalaallit Nunaanni pinngortitaq isumassarsiorfigisimavaat, tamannalu saqqummersitsinermi suliani assigiinngitsuni takuneqarsinnaavoq.
Marluullutik Issittoq pillugu ilisimasaqarluarput ukiorpassuarni ilisimatusartutut eqqumiitsuliortutullu sulinerminni paasisaqarfigisaramikku. Saqqummersitsineq taakkua ukiuni tallimani suleqatigiinnerisigut pivoq, assigiinngitsunillu sammisaqarfiuvoq, inuit avatangiisillu imminnut ataqatigiinnerat ersersinniarlugu.
Eqqumiitsuliortut taakkua marluk nunap assingi, akrylimik qalipakkat assillu assigiinngitsut atortarpaat.
Saqqummersitani silap pissusianut sunniuteqartartut arlallit sammineqarput: Inuit avatangiisinullu attaveqarnerat, nunap qanoq uagutsinnut sunniuteqartarnera, uagut inuit nunamut qanoq sunniuteqartarnersugut, minnerunngitsumillu ilisimatusarnerup, eqqumiitsuliornerup pinngortitallu ataqatigiinnerisa kinguneri.
Saqqummersitseqatigiinnerput siulleq
Saqqummersutassat nivinngartorneqarneranni eqqumiitsuliortut marluk oqaloqatigivagut:
- Neriuutigaarput inuit pinngortitami qanoq pisoqartarneranik eqqarsalersissinnaallugit. Ilisimatuussutsikkut ilisimasat assigiinngitsut akulerukkaanni, suut tamarmik imminnut ataqatigiinnerannik paasinninnissap ajornakusoorsinnaanera nalunngilarput.
- Inuit avatangiisillu imminnut ataqatigiilluinnarnerat, suullu tamarmik naleqartarnerat takutitassanngorlugu sulisimavugut.
- Assersuutigalugu nunap assingi sermersuup qanoq annikitsigisimaneranik takutitsisarput, Friederike Gründger aamma Mark Hutchison oqarput.
Eqqumiitsuliortut taakku marluk aatsaat ataatsimoorlutik saqqummersitsipput.
Ilasseqatigiinneq
Sisamanngornermi ualikkut ilassinnittoqarmat oqalugiartussaasut oqalugiarput, ilaatigut Nordatlantisk Hus-imi siulittaasoq Claus Hovden, naggataatigullu Josepha Lauth Thomsen uaajeerluni takutitsilluni.
Saqqummersitat Nordatlantisk Husimi silataanilu aggustip 14-iata tungaanut takuneqarsinnaapput.
