Nutserisitsinermut aningaasaateqarfiup atuakkiortut tusaamaneqarnerulersissavai

Eqqumiitsuliornermut inatsimmik, atuakkat, filmit nipilersuutillu inatsimmut ilaasut pillugit nalunaarutinik malitseqartinniagaq, 2016-imiilli politikkikkut suliaqartoqalersimavoq, tamannali unittooqqavoq.

Eqqumiitsuliornermut aningaasaateqarfik 2022-mi pilersinneqarpoq, aningaasallu siusinnerusukkut kalaallisut atuakkianik saqqummersitsisarnermut tapiissutigineqartartut aningaasaateqarfimmi katersorneqarput.

- Suli tusarniaaffigineqanngilagut. Inatsit kalaallisut atuakkianik saqqummersitsisarnermik siuarsaasussaq unittooqqavoq, Kalaallit Atuakkiortut siulittaasuat Juaaka Lyberth oqarpoq.

Taanna Kalaallit Atuakkiortut peqatigiiffiani ataatsimeersuartoqarmat siulittaasutut qinigaaqqeqqammerpoq.

Siulersuisunut ilaasortanngortut tassaapput Katti Frederiksen, Viktoria Joelsen, Naasunnguaq Lyberth, Kelly Berthelsen, Markus E. Olsen aamma Mikkel Jeremiassen.

Ataatsimeersuarneq Nuummi isumasioqatigiinnerup aamma Arctic-Nordic Small Languages Festivalip kingorna ingerlanneqarpoq. Tassani kalaallisut atuakkianik saqqummersitsisarnissamut periarfissat, saqqummersitsisarnissamik pisariaqartitsineq kalaallisullu atuakkianik niuernermut nutserisoqartariaqarnera oqaluuserineqarput. 

Saqqummersitsivimmik pisariaqartitsineq

Kalaallit Atuakkiortut siulersuisuisa atuakkiortut atugaat pitsaanerulersinniarlugit politikkerit oqaloqatigisarnissaat, assersuutigalugu atuakkiortut piginneqqaartussaatitaanerannut pisinnaatitaaffiit nutarterneqarnissaat sulissutigissavaat.

- Siullermik atuakkiortunngorusuttut aaqqissuulluakkamik sullinneqarlutillu ilinniartinneqarnissaat qulakkeerneqassaaq.

- Aappassaanik nutaamik atuakkiorfeqarlernissaq pisariaqarpoq. Atuakkiorfimmik pisariaqartitsineq eqqarsaatigeqqittariaqarlugulu atuakkanik saqqummersitsisarnermut aningaasanik qulakkeerinnittariaqarpugut. Taamani Atuakkiorfik kalaallisut atuakkanik saqqummersitsisarallarmat pitsaassuseq qularnaarniarlugu aaqqissuisut arfinillit atuakkiortut suliaannik aaqqissuisuupput. Maannakkut naqiterisitsisarfiit ataasiakkaaginnaagamik aaqqissuisunik atorfinitsitsisinnaanatilluunniit ataatsikkut atuakkanut qulinut aaqqissuisuusinnaasanngillat, Juaaka Lyberth oqarpoq nassuiarlugulu Ilinniusiorfik ingerlalluartoq, namminersortumilli naqiterisitsisartunut unammillertartoq.

- Taamaammat atuakkiorfeqarneq eqqarsaatigeqqissallugulu aaqqissuuteqqittariaqarparput, Juaaka Lyberth oqarpoq. 

Nutserisitsinermut aningaasaateqarfik

Kalaallit Atuakkiortut Inatsisartut kulturimut ataatsimiititaliaat ataatsimeeqatigisimavaat, tassanilu nutserinermut aningaasaateqarfik pilersinneqassasoq aallaqqaammut 300.000 koruuninik aningaasalerneqarluni atuakkanik kalaallisut allataasunik nutserisartussaq atuakkiorfillu piginneqqaartussaatitaaffilik, atuakkanik nunani allani niueruteqaarsinnaasoq, kissaatigineqarput.

- Ataatsimiititaliap siunertaq tapersersorpaa, 2025-mullu aningaasanut inatsisissaq pillugu isumaqatiginninniarnerni nutserinermut aningaasaateqarfik ilanngunneqassaaq. Maannamut Kalaallit Nunaanni nutserinermut aningaasaateqarfeqanngilaq, Juaaka Lyberth oqarpoq.

Atuakkat kalaallisut saqqummersinneqartut ilisimatusarfinnit niuertarfinnillu soqutigineqarluarput.

- Kalaallit atuakkiaannik soqutiginninneq Frankfurtimi oktobarimi atuakkanik saqqummersitsinermut aappaagulu Parisimi atuakkianik saqqummersitsinermut peqataanitsinnut atatillugu malugisinnaavarput. Taamaammat Kalaallit Nunaanni nutserinermut aningaasaateqarfiup nunani allani kalaallit atuakkiaannik saqqummersitsisalernerisigut tusaamaneqarnerulersissavai, Juaaka Lyberth oqarpoq.