Quiasaarisartut nuannarineqarluartut

»Nuuk silagisseruttorpoq« Facebookimi ikkussaanni allassimavoq. 

Arnat marluk aappaa kalaallit erfalasuannik tigummisoq Nuummi timmisartoqarfimmiittut takusinnaavatit.Siallerlunilu anorlingaatsiarpoq. Timmisartup minnissaa akunnerit arfineq-marluk utaqqisimallugulu silagittoq eqqartorpaat. Erfalasoq pappiliaasoq alittoraluttuinnarpoq, silamilu issiavimmut ingimmata erfalasup ilamernga anorimit tinngussaavoq.

Tusagassiortoq quiasaarusiaq taanna pillugu KNR-TV-mi inuusuttunut aallakaatitassiami Unneqqarissaasuni pingaarnertut inuttat saaffigai. Tassami quianarlunilu illarnarami Nuummi mittarfissuaq pillugu ilaasut, ilaqutaasut isornartorsiuisullu naammaginninnginnerat eqqoqqissaarpaa.

39-nik ukiulik Sikkerneq Olsen aamma 28-nik ukiulik Nini Berthelsen, aasareerpat KNR-TV-mi aallakaatitseqqilernissaminnut piareersarlutik quiasaarusiaq taanna pilersippaat.

- Quiasaarusiaq taanna piareersarneqarani immiussaavoq. Timmisartoqarfimmi akunnerpaaluit utaqqinermut tunngassasoq isumaqatigiissutigiinnarnikuuaarput, Sikkerneq Olsen, 2024-mi novembarimi meeqqanut inuusuttunullu aallakaatitsinermi aaqqissuisunngortoq, oqaluttuarpoq.

Aallakaatitassioqatini Nini Berthelsen, marsimi sulilersoq, issiaqatigaa.

Toqqaannartumik oqaatigineqassaaq

Taava quiasaarusiami tulliuttumi „Mannalumi sila“-mik qulequtalimmi arnat marluk sissami nalunnguffatilerlutik issiasut tarngummik seqinermut illersuummik tanipput. Qulisimavoq, anorlerlunilu siallerpoq – aasit. Amerikamiut takornariat siniffissaqanngimmata angerlaqatiginiarlugit eqqartorpaat, naggataatigullu kaffisorniartarfiup silataani softicetorput, aasaavormi.

Inuusuttunut aallakaatitassiami „Unneqqarissaasut“-ni paqumigineqartut oqallisigiuminaatsullu saqqummiunnissaat siunertaasoq Sikkerneq Olsen nassuiaavoq.

- Arlaannik ajornartorsiuteqaraangatta unneqqarilluta ammasumik oqaatigisariaqarpagut. Sallussanngilagut, ilaannakortumik oqaluttuartarnatalu tunuarsimaartassanngilagut. Qanoq innerput oqaatigisariaqarparput. Annillugu. Tamanna pikkoriffiginerulertariaqarparput. Unneqqarilluta oqaluttarutta ajornartorsiutivut aaqqinneqarsinnaapput. Tamanna Unneqqarissaasut siunertaraat, Sikkerneq Olsen nassuiaavoq.

Aallaqqaammut sulilernermini kingornussani ingerlateqqikkuminaatsippaa. Trumpilu pillugu ajornartorsiuteqalermat allaanerulluinnartumik pisariaqartitsisoqalersimasoq misigivoq.

- Unneqqarissaasut oqitsumik nuannersumillu periuseqarlutik nutaarsiassanik sapaatip-akunneri tamaasa saqqummiussisarput, ilaatigut Trump silarsuarmilu nalorninartorsiorneq pillugit, taanna oqarpoq.

Sikkerneq Ninilu Issortarfimmi KNR-ip illorsuata naqqani Møbelmagasinakumi quiasaarusiaminnut sammisassanik isumassarsiortarput.

- Ullumikkut sammineqartut nunamilu susoqarnera tunngavigalugit isumassarsiortarpugut. Inuusuttunummi aallakaatitassiaammat taakkua isiginnittaasiannit isiginnittaaseqarnissarput sulissutigaarput. Taamanikkut qanoq eqqarsartarsimanerput inuusuttuullutalu sunik unammillernartitaqarsimanerluta, ullumikkullu ajornartorsiutit taakkua allanngorsimanersut eqqarsaatigisarpavut.

- Aallakaatitseqqilernissatsinnut piareersarnerit ingerlanneqaleruttorput. Sammisat soorlu isumapiloqarneq tunngavigalugu tatiginnilersitsiniaaneq, nittartakkatigut naapittarfinni allaasuusaarneq allasiornerlu sammineqartussat ilagaat, Sikkerneq Olsen nassuiaavoq.

Suleqatigiilluartut

Quiasaarusiami »Solcreme eqqaamallugu«-mi suleqatigiit aneerasaartarfimmi seqinnisaarput. Miseqqamut kajorsaammik tanissimagamik kajorujuttuinaallutillu nillataartumik imigaqarput. Nuummi ulluni marlunni seqinnermat qanoq kiatsigisoq eqqartorlugulu inuit timmisartup Atlantikoq qulaallugu timmisartuussisartup tikittup assingi oqaaseqarfigisarpaat. Oqaloqatigiinneq oqitsuullunilu eqqorluarpoq.

- Suleqatigiilluarsinnaanerput tassanngaannaq malunnarsimmat soorlu ukiorpassuarni immitsinnut ilisarisimasimasugut, Nini Berthelsen oqarpoq, Sikkerneq Olsenillu tamanna ima oqaatigaa:

- Qanorpiaq piumasaqarnerlunga sukumiisumik oqaluttuarisariaqannginnakku aamma iluaqutigaara. Pisumiittarlungalu najoqqutassiorneq ajorpunga. Isuma qarasanneereertarpoq, pissutsillu qanoq innersut naapertorlugit iliuuseqartarpunga. Taassuma (Ninip) ingerlaannaq akortarpaa.

Sikkerneq Olsen meeraalluni sapiitsunik pinnguaqateqarnissaminik amigaateqartarsimalluni, maannakkulli aatsaat pinnguaqatissarsisimalluni nangilluni oqaluttuarpoq.

- Soorlu meeraaninnut utiinnarluni. Meeraaninni kammalaatima sapiissuseqarnatik iliuuserisinnaanngisaat iliuusererusuttarkkit pinnguaqatissaaleqisarpunga. Aatsaat inersimasunngoratta pinnguaqatissarsisimalluta ippassaq quiasaarluta oqaatigaarput, Sikkerneq oqaluttuarpoq.

Mittarfik erfalasorlu pappiaraasoq pillugit quiasaarusiaq tigulluarneqarpoq. 100.000-init amerlanerusoriarluni takuneqarsimasoq suleqatigiit oqaluttuarput.  

Allat sinnerlugit peqqusiileqiummertoq

Quiasaarusiami kingullermi „Illoqarfinnguatsinni takornarialaaq“ - illoqarfitsinni nuannersumi takornariaq - malinnaavigigatsigu suleqatigiit Nuup illoqarfiata qeqqani atuarfissap nutaap eqqaani pisuttuarput. Atuarfik ukioq ataaseq atorneqannginnami eqqaassutissanngorsimasoq eqqartorpaat.

Arnat taakku marluk Nini Berthelsenip ukioq manna marsimi aallakaatitsivimmi sulilerneraniilli suleqatigiissimapput, aallakaatitassialli naggataatungaani aatsaat aallakaatitassiani kingullerni marlunni suleqatigiittut nuisalerput.

- Maannamut suleqatigut allat immikkut marlooqatigalugit suleqatigiittarpugut, tassanngaannarli immitsinnut naapeqatigiippugut. Soorlulusooq ataasiussuseqalertugut, Nini Berthelsen oqarpoq.

Ninip ullut ilaanni Sikkerneq qanoq angitiginersoq saaffigigamiuk saariasaariarlugu ima aperaluni oqaluttuarpoq:

- Takisuutut isigisarikkit, qanoq takitigivit?

Sikkerneq akivoq:

Uanga 174-iuvunga, illimmi?

Nini:

- Uangattaaq.

Illarlutik Ninip suleqatini takinerusutut isigisarsimagaa eqqartorpaat. Silaannaq oqillunilu illarasaarpaluttoqartarpoq. Aasami qulisimasarnera puigoruminarpoq.

- Ukiut qulit nikingavugut, isumagulli assigiittarput, Sikkerneq oqarpoq, Ninilu isumaqataavoq:

- Ullut ilaanni allanik suliffittaarluta allaluunniit pissutigalugu avissaarnissatsinnut suleqatigiittarnerput maqaasilereerpara.

Sikkerneq isumaqataavoq oqarlunilu:

- Aap, suleqatigiittarnitta siuarsarnissaa qularnanngilaq. Allat sinnerlugit peqqusiileqilereerpunga, Sikkerneq oqarpoq inilu illarpalaaqqilerpoq.

KNR-TV-mi inuusuttunut aallakaatitassiaq »Unneqqarissaasut« 2025-mi februaarip 26-ani aallakaateqqaarneqarpoq, maannamullu aallakaatitassiat 18-it suliarineqarsimalereerput.