Atuagassiap
Ingeniørip februaarimi 2014-mi kalaallini aatsitassarsiornermi ingeniøri
siulleq, mannalu tikillugu kisiartaq, Qupanuk Olsen apersorpaa.
– Nammineq aatsitassarsiorfiuteqarusuppunga, qulequtaavoq.
Qupanuk Olsen, Naleraq sinnerlugu marsimi qinersinermi Inatsisartunut
qinigaasoq, kisiartaalluni aatsitassarsiorfiuteqarusulluni takorluugaqanngilaq,
nunatsinnili aatsitassarsiornissarsuaq utaqqititsiuarsinnarpoq.
Atuagassiap
Ingeniørip februaarimi 2014-mi kalaallini aatsitassarsiornermi ingeniøri
siulleq, mannalu tikillugu kisiartaq, Qupanuk Olsen apersorpaa.
– Nammineq aatsitassarsiorfiuteqarusuppunga, qulequtaavoq.
Qupanuk Olsen, Naleraq sinnerlugu marsimi qinersinermi Inatsisartunut
qinigaasoq, kisiartaalluni aatsitassarsiorfiuteqarusulluni takorluugaqanngilaq,
nunatsinnili aatsitassarsiornissarsuaq utaqqititsiuarsinnarpoq.
Kalaallit Nunaata nunataa taama pisuujutigitillugu, sooq amerlanerusunik
aatsitassarsiorfeqanngila?
– Kalaallit Nunaanni aatsitassarsiornermi aningaasartuutit attaveqaatigut
pissutigalugit akisoorujussuuvoq. Piffinni allani aatsitassarsiorfinnik
ammaaneq akikinneruvoq, naak Nuup Kangerluani saviminissamik,
Citronen-fjordimilu zinkimik annertuumik peqarnera uppernarsarneqareeraluartoq.
Nunarsuarmili aatsitassat akiisa nunatsinnilu aningaasartuutit imminnut
qanillineranni, aatsitassanik pissakilliulertoqarpat nunarput
tullinnguukkumaarpoq. Nunatsinni aatsitassat siunissami pissamaatitsitut
isigaakka, Qupanuk Olsen Sermitsiamut oqarpoq.
Peqatigisaanillu aporfiit marluk allat tikkuarpai:
– Inatsisit sukannerpallaarput, allaffissortullu aatsitassarsiornermik
ingerlatsinermi misilittagakippallaarput. Sunalumi oqaluuserinerlugu
ilisimavaa, namminermi ukiut tallimat affarlu Aatsitassanut Aqutsisoqarfimmi
teknikimut nakkutilliinermullu immikkoortumi pisortaanermini ujarlernissamik
qalluinissamillu akuersissutinik suleqataasarpoq.
– Aatsitassarsiornermi ingeniøritut suleqatinni kisiartaallunga
aatsitassarsiornermit misilittagaqartuuvunga. Inuussutissarsiut nunarsuarmi
tamani atuuttuuvoq, inuillu nunanit allaneersut pilerilersittariaqarpagut.
Aatsitassarsiorfimmi sulinermit misilittakkat atorlugit nunatsinni
aatsitassarsiornermik kulturi, ullumikkut pigineqanngitsoq sanarfisinnaavarput. Qupanuk Olsen Inatsisartuni inussutissarsiornermut aatsitassarsiornermullu
ataatsimiititaliami siulittaasumut tulliuvoq.
Aatsitassarsiornermi ingeniøritut misilittakkatik politikimi sulinerni
atussavigit?
– Aap, soorunami. Misilittagaqarneq suni tamani pingaaruteqartuaannarpoq,
Qupanuk Olsen oqarpoq.
Qupanuk Olsenip saniatigut
siulittaasoq Mariane Paviasen Jensen, Inuit Ataqatigiit, Hans Erik Enoksen,
Demokraatit Lars Poulsenilu, Siumut ataatsimiititaliami ilaasortaapput.
2021-mi uranisioqqusiunnaarneq
Ingeniøren naapertorlugu Qupanuk Olsenip ukiut aqqanillit matuma siorna
aatsitassarsiorfeqarusunnera marlunnik aallaaveqarpoq:
- Siulleq tassaavoq
aatsitassarsiorfinnik alutorisaqarneq, tamatuma aatsitassarsiornermik
ilisimasanik paasinninnermillu siammarterineq. Aappaa tassaavoq Kalaallit
Nunaata namminiilivinnissaanut annertusiartortumut ilapittueqataanissaq.
2021-mi Inatsisartut ukiaanerani ataatsimiinneranni Naleqqap Inuit
Ataqatigiillu saniatigooralugu uranimik qalluisinnaaneq
amerlanerussuteqaqqatarlutik inerteqqutaalersippaat. Siumut Demokraatillu
eqqusseqqinnissamut sakkortuumik akerliupput, Atassutikkulli nunatsinni
uranisiorneq pillugu innuttaasut taasitinneqarnissaat piumasaraat. Sulinermik inuussutissarsiortut kattuffiata SIK-p siulittaasua Jess G.
Berthelsen taamanikkulli uranisiunnginnissamik akerliulluni saqqummertarpoq,
tamatumalu aallaqqaammut Narsap eqqaani Kuannersuarni suliffissarpassuarnik
pilersitsinissamut pilersaarutit eqqorpai.
Uranisiunnginnissamut qanoq isumaqarput?
– Qalluineq avatangiisinut killiliussat nunarsuarmioqatigiillu
isumaqatigiissutaat, uranip nunatsinneersup atomimik qaartartorsuarnut
atorneqarnani nukissiornermi atorneqarnissaanik qulakkeerinnittoq,
malinneqartillugit, uranip saniatigooralugu qallorneqarnissaa ajorinngilara,
Qupanuk Olsen oqarpoq.
Taamaalillutit partiit akerlilerpiuk?
– Isumannaatsumik aatsitassarsiorneq anguniagaraara. Namminiilivinnissaq
kissaatigaara, anguniakkallu tamatuma anguneqarnissaa siunertaralugu,
aalisarnerup takornariartitsinerullu avataanit isertitassaqartariaqarpugut.
Aatsitassarsiorneq Kalaallit Nunaanni namminersortumi imminut napatittumik
aningaasarsiornermi nukittuumik periarfissaasutut isigaara,
taamaattoqarneranilu kingunissaasa inooqataaffiginissaat
ilinniartariaqarparput.
