Doris Jakobsen Jensenip Avannaata Qimussersua USA-mik taperneqarmat politikkimut tunngatinneqarnissaanut mianersoqquaa
Inatsisartunut ilaasortaasimasoq, Doris Jakobsen Jensen nammineq kajumissutsiminik Avannaata Qimussersuanut tapersersuisuunermini USA Avannaata Qimussersuanut aningaasamik tapiinera politikkimut tunngatinneqaratarsinnaaneranut kattuffik mianersoqqusimallugu, Sermitsiamut oqaluttuarpoq. Taassuma nassuiaataa naapertorlugu USA-p aningaasanik tapiinera politikkimut tunngasussaanngilaq.
Doris Jakobsen Jensen.
Assi: Leiff Josefsen
Avannaata Qimussersua USA-p Nuummi konsulia aqqutigalugu aningaasatigut tapiiffigineqarsimavoq. Tamanna siulersuisuni siulittaasup Mikkel Jeremiassenip Sermitsiamut uppernarsarpaa.
Peqatigiiffiulli qanoq pissarsitigisimanera oqaatigiumanngilaa.
- Isumaqatigiissut malillugu oqaatigisinnaanngilakka, kisianni annertulaarput, Mikkel Jeremiassen oqarpoq.
Isumaqatigiissut naapertorlugu USA-p aningaasatigut tapersersuinera politikkimut attuumassuteqassanngilaq.
Politikkikkulli akuliunniarneqalermat Doris Jakobsen Jensenip siulersuisut mianersoqqusimanerarpai.
Doris Jakobsen Jensen Sermitsiamut nassuiaavoq Avannaata Qimussersuani nammineq piumassutsiminik tapersersuisutut siulersuisut kajumissutsiminik ikiortarpai, ilaatigut nutserinermik, tapiissuteqarnissamut qinnuteqaatinik aningaasanullu inatsisissatut isumaqatiginninniarnernik.
KNQK Qimussersuaq USA-mit aningaasanik pissarsimmat Doris Jakobsen Jensen attavigineqarpoq amerikami politikerit Avannaata Qimussersuanut qaaqquneqartariaqartut. Taama attavigineqarami siulersuisut politikkikkut akuliuttoqarnialeqinammat mianersoqquai.
Aningaasameernerat paasisinnaalluaraa
Doris Jakobsen Jensen Sermitsiamut oqaluttuarpoq KNQK Qimussersuaq aningaasameernera paasisinnaalluarlugu. Soorlu ukiut tamaasa aningaasarpassuarnik atuisariaqartarnerannut, imaatigut sikukkut assartuinermi angallatit ajoqusernerannut.
- Paasisinnaalluarpakka aningaasatigut inissisimanerat oqimaammat. Assersuutigalugu ukiut tamaasa angallannikkut eqqugaasarput. Sikusimatillugu angallatit attartukkat aserortarput. Taamaalisoqartillugu KNQK-mut akisoorujussuanngortarpoq. Aamma unammiat unnuineri, nerisaqarneri amma sivitsortarput, akiligassallu qaffattarlutik.
- Taamani KNQK Naalakkersuisunut immikkut ikiorserneqarnissamik qinnuteqarpoq. Taamani Naalakkersuisut akuersipput, kisianni Inatsisartut aningaasaqarnermut ataatsimiititaliaat itigartitsivoq.
Taamaattumik nammineq paasisinnaanerarpaa Avannaata Qimussersua amerikap aningaasanik tapeerusunneranut akuersisimappat. Isumaqatigiissulli malillugu politikkimut tunngasussaanngilaq.
- USA-mi politikkerit qaaqqusaanissaat piumasarineqalermat siulersuisut allaffigaakka mianersoqqullugit suleqatigiinneq politikkimut tunnganialeqinammat.
