Kalaallit Nunaanni timmisartortitseqatigiiffiit nukittorsarneqarnissaat pillugu ministerip pilersaarutit nassuiarai
Angallannermut ministerip Thomas Danielsenip EU-mi siulittaasuuneq atorluarlugu EU-mi ilaasut pisinnaatitaaffii allanngortinniarpai. Ilaasut pisinnaatitaaffiisa ilaat annikillissapput. Tamanna aamma Kalaallit Nunaanni timmisartukkut angallannermut sunniuteqarsinnaavoq.
Allaffiani takuneqarsinnaasutut Danmarkimi angallannermut ministeri aamma piniartarpoq.
Assi: Mathias Svold/Ritzau Scanpix
Danmarki EU-mi ilaasut pisinnaatitaaffiisa naleqqussaanissaannut tapersersuinissamut piareersimasoq angallannermut ministeri Thomas Danielsen (V) qanittukkut nalunaarpoq.
Siunissami ilaasut taarsiiffigitinneqartassappata kinguaattoorfiusoq sivisunerusariaqartoq Danmarkimi naalakkersuisut ilaatigut EU-Kommissioni isumaqatigalugu aalajangerput. Suliumajunnaarnerit ullumikkutulli aningaasanik kinguneqartitsisinnaajunnaartussaapput, malittarisassallu paasiuminarnerusariaqarput, ministeri isumaqarpoq.
Assartuinermut ministerip Sermitsiamut allakkatigut akissummini oqaaseqaatini nassuiarpai:
– Eqqartuussivinni aalajangiinerit paatsiveerusimaarnerillu, inatsisinut tunngatillugu erseqqissumik malittarisassaqannginnermik kinguneqartut, iluarsaanneqarnissaat pingaaruteqarpoq. Taamaammat Polen siulittaasuujunnaarpat nangillugu Danmarkip siulittaasuunerani siunnersuutip isumaqatiginninniutigineqarnissaa aamma pimoorutissallugu naatsorsuutigaarput, Thomas Danielsen oqaluttuarpoq.
Aamma Kalaallit Nunaannut pingaaruteqartoq
Danmark 2025-p affaani kingullermi EU-mi siulittaasuussaaq, tamannalu Air Greenlandimut, SAS-imut timmisartortitseqatigiiffinnullu allanut Kalaallit Nunaata Europallu akornanni timmisartuussisunut nutaarsiassatsialaavoq.
TIMMISARTUMI ILAASUT PILLUGIT EU-P MALITTARISASSAI NAATSUMIK
EU-p iluani imaluunniit avataani timmisartoruit malittarisassat atuupput. Aamma nunap EU-miittup timmisartortitseqatigiiffianik EU-mut timmisartoruit maleruagassat taakku atuupput.
malittarisassat naapertorlugit nerisassanut unnuiffissanullu tunngatillugu pisinnaatitaaffeqarputit.
Aamma kinguaattoornersuaqarpat, timmisartuussinerit taamaatiinnarneqarpata imaluunniit timmisartut inniminnerneqarpallaarpata 600 eurot tikillugit taarsiiffigineqarsinnaavutit.
Timmisartortitseqatigiiffilli piffissaq eqqorlugu taamaatitsippat, imaluunniit „pissutsit immikkut ittut“ pissutigalugit taamaatitsippat, akiliiffigineqassanngilatit. Aamma timmisartortitseqatigiiffik piffissaq sioqqulluarlugu taamaatitsiinnarpat.
Timmisartumi ilaasut EU-mi pisinnaatitaaffii pillugit flypassager.dk-mi (qallunaatut tuluttullu) paasisaqarnerusinnaavutit.
– Kalaallit soqutigisaannik qulakkeerinninneq Issittumilu pissutsit immikkut ittut pissutigalugit Kalaallit Nunaanni timmisartukkut angalanermi unammillernartut immikkut ittut aaqqiissutissaannik nassaarnissara immikkut ittumik soqutigivara, ministeri erseqqissaavoq.
Tassami ilaasut allaat Kalaallit Nunaanni timmisartuussinermi, Danmarkimit imaluunniit EU-mi nunamit allamit sivisunerusumik angalanermut ilaatillugu EU-mi malittarisassat naapertorlugit maannakkorpiaq taarsiiffigitinnissamik allanillu iluaqutissanik piumasaqarsinnaapput. Tamanna ajornartorsiutaavoq, ministeri isumaqarpoq.
– Aaqqiissutissarpassuit eqqarsaatigineqarsinnaapput, periarfissalli ilagaat Kalaallit Nunaanni akunninnermi taarsiiffigitinnissamut maleruagassanit mininneqarnissaa. Aammattaaq immikut ittumik pisoqartillugu assersuutigalugu ulluni pingasuni unnuinissamut nerisaqartinneqarsinnaanerup inissaqartinneqarsinnaanerullu killilersornissaata misissornissaa naapertuuppoq.
Ministeri naapertorlugu oqaloqatigiilluartoqartoq
Danmarkimi naalakkersuisoqarfini Kalaallit Nunaanni oqartussaasunut attaveqartuartoq angallannermut ministeri nangilluni oqarpoq:
– Kalaallit Nunaanni attaveqaasersuutinut naalakkersuisoqarfik oqaloqatigilluartarparput, soorunami malittarisassat nutaat pillugit isumaqatiginninniarnerit qanoq ingerlanersut pillugit ilisimatittuassavara, Thomas Danielsen oqarpoq.
Europami isumaqatigiinniarnerit aallartinnginneranni assartuinermut ministerip Folketingimi amerlanerussuteqartut ministerip isumaannut tapersersuinissaat angusimavaa. Ilaasulli pisinnaatitaaffii annikillineqassammata partiit arlallit isumaqataanngillat.
Folketingimut ilaasortap Aaja Chemnitzip (IA) suliami Naalakkersuisunik qanoq tusarniaatigisoqartiginersoq ministeri aamma apeqqarissaarfigaa. Thomas Danielsen Folketingimut akissuteqaammik suli utertitsisimanngilaq
