Meeqqat oqaaseqartartuat ukiut qulit sulereerluni soraarpoq
Fredag den 16. maj er Aviâja Egede Lynges sidste dag som grønlandsk børnetalsmand, og hun får venlige hilsener med på vejen.
Aviâja meeqqanut uummateqartorujussuuvoq, meeqqanik oqaloqateqallaqqittorujussuuvoq meeqqallu takuneqarsinnaasutut tusaaneqarsinnaasutullu misigitissinnaallugit, MIO-mi siunnersortaaneq, Ditte Sølbeck oqarpoq.
Foto: MIO
Aviâja Egede Lynge 2015-imi Meeqqanut oqaaseqartartutut atorfinippoq, tassani atorfinikkami sulinini aallartillugu nunatta avannaani illoqarfiit nunaqarfiillu tikeraarpai. Ukiut qulit ingerlaneranni nunatsinnit sumiiffiit 40-ut tikippai.
Aviâja Egede Lynge tussiarfissuarmi meeqqat oqaaseqartartutut atorfini qujaffigalugulu inuulluaqqussavaa. Meeqqanut, Inuusuttunut Ilaqutariinnullu Naalakkersuisoqarfimmit nuannersumik oqaaseqarfigineqarluni inuulluaqquneqarpoq:
- Aviâja Kalaallit Nunaata meerartaannut oqaaseqartartuusimavoq pikkorissorujussuaq. Immikkuullarilluinnartumik tunniusimavoq aammalu meeqqat pisinnaatitaaffii, pillugit itinerusumik ilisimasaqarsimavoq, meeqqallu pisinnaatitaaffimminnik ilisimasaqarnissaannut anguniagaqarnini iluatsilluarsimavaa.
- Aviâjap suleriaasima maqaasissavarput, taamaakkaluartoq neriuppugut Aviâja nunatta innuttaasuinut minnernut atugassarititaasut pitsanngorsarnissaannut suliniuteqaannarumaartoq. Aviâja ajunnginnerpaamik kissaapparput, minnerunngitsumillu MIO-mi ineriartortitsisimaneranut annertoorujussuarmut aammalu nuna tamakkerlugu meeqqat pisinnaatitaaffiisa siammartersimanerinut qujarusuppugut, pisortaq Heidi Lindholm taama oqaaseqarpoq.
MIO-mittaaq suleqataasimasut meeqqat illersuisuattut soraalersumut suliarisimasaannullu nersualaarinnipput:
- Aviâja meeqqanut uummateqartorujussuuvoq, meeqqanik oqaloqateqallaqqittorujussuuvoq meeqqallu takuneqarsinnaasutut tusaaneqarsinnaasutullu misigitissinnaallugit, MIO-mi siunnersortaaneq, Ditte Sølbeck, taama oqarpoq.
Aviâja Egede Lyngep qaammat kingulleq AG-mut oqaluttuaraa siunnersortitut namminersulernissani eqqarsaatigalugu. Taassuma inuiaqatigiilerinermi ilisimatuussutsimik ilinniakkani inuiaqatigiinnillu ilisimasani atorusuppai.
Naak arlaleriarluni kajumissaarneqaraluarluni politikkimut sassarnianani oqaluttaraa, uani atuarsinnaavat.
Naalakkersuisut maanna meeqqat oqaaseqartartussamik nutaamik aggustip aallaqqaataani atorfinittussamik ujaasipput.
