Metap silassorissuusiaata assinik atuinissamut sungiusarneqarnera Kalaallit Nunaanni atorunnaarsinneqarsinnaanngitsoq
Metap malittarisassiai nutaat app-inik atuinerup misissornissaanut pissutissaalluarput, Signe Ravn-Højgaard oqarpoq.
Taamaappoq, Kalaallit Nunaanni Meta-p assit atornissaat itigartitsissallugu misilittaraanni.
Ataasinngorneq maajip 26-at tassaavoq Metap silassorissuusiaminik sungiusaanerminut illit assiutiinnik atuinnginnissaanik nalunaarnissamut piffissaliussaq.
Kalaallit Nunaanni taamaaliorniarlutit misiliisimaguit immersugassap pissarsiarineqarsinnaannginnerarlugu nalunaarutigineqartarsimanera ajornartorsiutaaginnarpoq.
Taamaattoqarnissaanullu pissutissaqarluarpoq, Signe Ravn-Højgaard, Tænketanken Digital Infrastrukturimi, tassa digitalimik atassuteqaasersuutit pillugit isumalioqatigiissitami, pisortaasoq Ilisimatusarfimmilu adjunktiusimasoq oqarpoq.
- Kalaallit Nunaat EU-mut ilaasortaanngilaq, nunanilu EU-mi ilaasortaasuni atuisut paasissutissaatitik Metap silassorissuusiamut sungiusaaneranut atorneqarnissaat kissaatiginngikkunikku namminneq itigartitsinermik ersersitsinissamut periarfissinneqarput, taanna oqarpoq.
Signe Ravn-Højgaard naapertorlugu Meta atuisut Europamiuunngitsut - Kalaallit Nunaanni atuisut ilanngullugit - paasissutissaataat atorlugit siornali sungiusaalerpoq.
EU-mi atuisut maannamut ilaanikuunngillat, inatsisillu peqqutigalugit kisiartaallutik taamaaliornissamut itigartitsisinnaapput.
Meta Facebookimik Instagramimillu piginnittouugami assit atorlugit silassorissuusiani assinik piviusorpalaarnerusunik sanasinnaaniassammat sungiusarniarpaa.
App-uitit misissukkit
Metap Facebookimi Instagramimilu assit atorlugit silassorissuusiaminik sungiusaanissamik pilersaaruteqarnera iliuuseqarfigineqarpallaarsinnaanngilaq. Facebookimi quppernerisamik atorunnaarsitsinerluunniit imaassinnaavoq iluaqutaanngitsoq.
Taamaakkaluartorli app-it atukkagut misissoqqullugit Signe Ravn-Højgaardip kajumissaarivoq.
- App-inik atuinerput eqqarsaatigeqqissaartariaqaripput isumaqarpunga, atuinngisagut pisariaqanngitsumik paasissutissanik katersueqqunagit peertariaqarpagut, taanna oqarpoq.
Aamma qarasaasianni programmit assigiinngitsut paasissutissanik katersuinissamut illersuutit atorsinnaallugillu paasissutissanik katersisinnaanissamut itigartitsisarsinnaavutit.
Sermitsiap Kalaallit Nunaanni innuttaasut ajornartorsiummut qanoq isiginnittaaseqassanersut Digitalimik Sullissinermut Aqutsisoqarfik apeqquteqarfigigaluarpaa. Piffissaliunneqartoq nallertinnagu akissuteqanngilaq.
Sermitsiap aamma Meta oqaaseqaqquaa. Taakkuli aamma akinngillat.
