Qeqqata Kommuniani qinersiartortut ikinnerusut

Sisimiuni sila nillikujulluni nuiavoq. Apriilip aallaqqaataa aallartippoq, tamannalu isumaqarpoq kommunimut qinersiffissanngortoq.

Ukioq mannali kommunimut qinersiartortut kingullermik qinersinermut 2021-mut sanilliullugit ikinnerupput.

Qeqqata Kommuniani qinersinermut aqutsisoq, Karl Berthelsen, Sermitsiamut oqarpoq ukioq manna soqutiginninneq annikinnerusoq.

- Ullaaq nal. 09.00 ammarmat Inatsisartunut qinersinermut sanilliullugu inukinneerakasiuvoq. Aamma qinersiartortut manna tikillugu ikinneerakasiupput. 

- Qinersinerup akulikippallaarsimanissa apeqqutaasinnaavoq. Neriuppunga inuit aggialluarumaartut, sulimi unnugu arfineq-pingasut tungaanut periarfissaqarput. 

Taseraliup silataanut appakaakkaanni aamma inoqarujussuanngilaq.

Unnugu nalunaaqutaq arfineq-pingasut tungaanut taasiartornissaq periarfissaavoq.

Taasiartortut ima isikkoqarput:

• Kl. 10.00: taasinerit 190-it. Qinersisinnaasut  4,7%-ii.

• Kl. 11.00: taasinerit 386-it taasisinnaasut 9,5%-ii.

• Kl. 12.00: taasinerit 541-it taasisinnaasut 13,3%-ii.

Kommunimut kingullermik 2021-imi qinersigatta nal. 12.00 taasiartortut 665-upput.