SIK-p siulittaasua: Nunarput siunissarput pillugu ataatsimoortariaqarpoq
Sulisartut ulluannut atatillugu sulisartut kattuffiata SIK-p siulittaasua Kommune Kujallermi aningaasaqarnikkut unammilligassat aamma Kalaallit Nunaata siunissami namminiilivinnissaa pillugu Kalaallit Nunaanni sulisartunut politikerinullu kaammattuuteqarpoq.
Assi toqqorsivimmiit
Assi: Leiff Josefsen
- Ataqqinartut sulisartut, nunarsuarmi sulisartut ulluanni qamannga pisumik pilluangaaritsit.
Taama SIK-p siulittaasua sulisartut ulluannut tunngatillugu oqalugiarluni aallartippoq.
- Nalunngilarsi manna Nuna ilisseqartinnagu ingerlanneqar-sinnaanngitsoq, taamaammat aamma ulloq manna ilissi sulisartutut ilissinnut ataq-qingaarlusi nalliussissavarsi. Pilluangaaritsilu.
Oqalugiaammi ilaatigut siulittaasup Kommune Kujallermi aningaasanik ajornartorsiorneq tikippaa, politikkikkullu akisussaassuseq ujartorlugu:
- Tamatuma kingunerisaanik ilaasortagut Kommuunip suliffeqarfiutaanit soraarsinneqaqattaar-put, allaat sulisut ilaat sapaatip akunneranut taamaallaat 20 tiimit sulisinneqaler-lutik. Arraa! Kia sapaatip akunneranut 20 tiimit sulisinneqarluni inuussutigisin-naammagit? Inissiamulluunniit akiliinissamut naammanngilaq.
- Apeqqutiniarpara Kommuuni Kujalleq taamatut inissinnera kiap akisussaaffigaa?
Siulittaasup aatsitassarsiorneq aningaasarsiutaasinnaasoq suliffissanillu pilersitsisinnaasoq aammaarluni qaqeqqippaa.
- Qangali SIK-p oqariartuutigiuarpaa aatsitassarsiorneq ingerlanneqarniarli, aatsitas-sat uranimik akoqarpata akoqanngippataluunniit. Kisianni politikerit ilaatigut oqa-riartorput: “Naamerluinnaq, uranimik akoqassanngilaq”. Politikerit taakkoqqissaaq taamatut oqariartortut, qinigaagamik Naalakkersuisunngorlutillu namminneq aku-eraat aatsitassat piiarneqartut uranimik akoqarsinnaasut.
Isertitassanik periarfissiigitsi
Kalaallit ikiliartuinnarput, tamannalu siulittaasumut ernumalersitsivoq, taassumalu neriuutiga Naalakkersuisut isertitassanik periarfissiissasut.
- Taamaattumik nerioqaanga Naalakkersuisut ilungersorlutik aningaasanik amerla-nerusunik, isertitassanillu nutaanik pilersitsiumaartut. Taamatummi iliunngikkutta aningaasanillu amerlanerusunik isertitaqalinngikkutta, taava aningaasat kaasarfitta aappaaniik aappaanut massakkutuulli nooqattaaginnassavagut.
- Aningaasarsiulin-ngikkuttalu Kalaallit ikiliartornerput illuanut saatinniarnissaanut tunngavissaqan-ngilagut. Inuiaqatigiillu Nunaminni asaqisaminni atugarissaarnerulernissaat angu-niaruminarnerulernavianngilaq, Jess G. Berthelsen oqarpoq.
Europa isiginiarneqarli
SIK-p siulittaasuata USA-p nunatsinnik tiguaarusunnera aqutserusunneralu oqalugiaammini tikippaa. Tamanna pillugu Danmarkimik suleqateqarneq nukittorsarneqartariaqarsoraa:
- Isumaqarpunga maannakkut Danmarkilu suleqatigiinnerput ataqqeqatigiittoq naligiittoq nukittorsartariaqaripput. Tamatumanilu Europamut isiginerulerluta, allaat EU arlaatigut suleqatigsinnaanera misissorneqartariaqartoq, kiisalu isumaqarpunga Nunani Avannarliit aamma qaninnerusumik suleqatigisariaqarigut
- Asasakka Sulisartoqatikka, asasakka Nunaqqatikka. Tamatta ikoqatigiilluta massu-ma Nunatta asasatta, Kalaallit Nunaattut atajuaannarnissaa sulissutigisigu.
- Asasakka Sulisartoqartikka, asasakka Nunaqqatikka, tamatta assatsigut tigulluta neriorsoqatigiitta manna Nuna, Kalaallit Nunarput, Kalaallinit nunagiuarneqarnissaa sulissutigiuassallugu. Immitsinnut pisussaaffilerta tamatta illersoqatigiilluta, suna tamaat atorlugu Nunatta avataanit tiguneqannginnissaa isumagissallutigu.
- Suminngaanneeraluaruttaluunniit maani Nunami najugaqartugut Kalaallit Nunarput asasarput ataatsimoorfigitigu, sulissutigisigullu ulluinnarni inuuffigiuminartunngortillugu.
- Nikuilluta assatsigut tigulluta Nunarput inuummersoqqutigu pingasoriarluta hurraarutigalugu, Jess G. Berthelsen oqalugiarluni naggasiigami taama oqarpoq.
