Ukiuunerani assartuineq amigaataasoq

Ukiut siulii assigalugit ukioq manna Qeqertarsuup Tunua kingusinnerusukkut sikuvoq. Sumiiffiilli ilaani suli imaatigut angalasoqarsinnaavoq. 

Oqaatsuni Ilulissaniik 15 kilometerit missaannik avannarpasinnerusumiittumi, aalisakkerivimmut Rodebay Fish ApS-imut tunisineq ukiuunerani ingerlalluarpoq. 

Aalisakkeriviup pisortaata Knud Fleischerip oqarnera naapertorlugu, ukioq manna kingusissukkut sikunera, aalisarnerup sivisunerusumik ingerlaneranik, tunisallu amerleriarnerannik kinguneqarpoq. 

Aalisakkanik suliffissuup qerititsivia 300 tonsinik imaqarsinnaavoq, Taanna siullermik januarimi ulikkaarpoq, maannakkullu ulikkaaqqilerluni. Qalerallillu tunisat Royal Arctic Line A/S-ip (RAL) umiarsuaanik maannakkut assartorneqarsinnaanngippata, aalisakkerivik qaammatit tulliuttut marluk missaanni matoqqatinneqartariaqassasoq, Knud Fleischerip oqaatigaa. 

Tunisassiorneq ataavartumik ingerlassappat, ukiuunerani sikoqanngikkaagat RAL-ip umiarsuaatai nunaqarfinnut ataavartumik angalasarnissaat pisariaqartoq, Rodebay Fish ApS-ip pisortaa isumaqarpoq. 

Kisiannili ukiumut angalanissamut pilersaarutaareersut avataasigut nunaqarfinnut angalanissaq killeqartoq, RAL-ip pisortaanera Niels Clemensen erseqqissaavoq.

Tunisat amerleriarujussuartut

Rodebay Fish ApS Ilulissani Oqaatsunilu inuttaasunit, kiisalu Polar Seafood A/S-imit pigineqartoq 2020-mi pilersinneqarmat, nunaqarfimmi inuussutissarsiorneq annertuumik siuariarfiuvoq. Aalisakkerivik maannakkut aqqanilinnik sulisoqartoq, nunaqarfimmut minnerunngitsumillu aalisarnermik inuussutissarsiuteqarnermut annertuumik pingaaruteqartoq, Knud Fleischer isumaqarpoq. 

Ukioq manna siornatigumut naleqqiullugu sikuunikinnerummat, tunisineq naliginnaasumit sivisunerusumik ammasimavoq. Tamanna peqqutigalugu qaammatit marluk affarlu kingulliit tunisat, siorna piffissamut tassani tunisanut naleqqiullugit 168 procentimik amerleriarsimasut, taassuma oqaatigaa.

Attartortariaqartut

Rodebay Fiship qerititsivia 300 tonsinik imaqarsinnaasoq siullermik januarimi ulikkaarpoq. Tunisineq tunisassiornerlu ingerlannarsinnaaqqullugit Rodebay Fish RAL-ip umiarsuaanik 13. februar attartortariaqarsimavoq, tamannalu suliffeqarfimmut 200.000 koruunit tungaanut aningaasartuutaasimasoq, Knud Fleischer oqarpoq.

- Qalerallit qerisut palletsit 180-it januarimi nassiuppagut, massakkullu aamma taamak amerlatigisut nassiuteriaannaavagut.

- Nunaqarfimmi aalisakkerivimmut angivallaanngitsumut, umiarsuarmik attartornermut 200.000 koruunit aningaasarparujussuupput, taakkulu inerisaanitsinnut atorluarsimasinnaagaluarpagut, taanna oqarpoq.

Qalerallit Ilulissat Kangerluaneersut Rodebay Fishimut tuninerini kilomut 31 koruuni, Torsukattammeersunullu kilomut 32 koruuni akigitinneqartarpoq. 

Nalunaaqutarlu apeqqutaatinnagu qaleralinnik tunisisinnaaneq, tunisat amerleriarnerannut ilaatigut peqquteqartoq, pisortaq oqarpoq.

Qerititsivik ulikkaaqqilersoq

Knud Fleischerip naatsorsuutigaa piffissami qanittumi aalisakkanut suliffissuup qerititsivia ulikkaaqqissasoq. Kisiannili RAL-ip angalanissamut pilersaarutai naapertorlugit, umiarsuaq nunaqarfinnut pajuttaat 16. maj Oqaatsunut aatsaat tikissaaq.

- RAL maannakkut Oqaatsunukarsinnaanngippat, aalisakkerivik maajip tungaanut matoqqatittariaqalissavarput.

- Soorunami tamanna kissaatiginngilarput, tunisassiornerlu uneqattaarani ingerlaannassappat, sulisullu ukioq kaajallallugu suliffissaqartissagutsigit, periarfissaqartillugu umiarsuarmik tikinneqartarnissarput pisariaqarpoq.

- Taamaattumik sikuunikinnerusalernera najoqqutaralugu RAL-ip nunaqarfinnut assartuutai angalatinneqartariaqarput. Assartuinikkulli pissutsit maannakkutut itsillugit naallerneqartussanngorpugut. Tamannalu soorunami ajuusaarnarpoq, aalisakkeriviup pisortaa oqarpoq.

RAL pisortanit tamakkiisumik pigineqarpoq, silaannaallu allanngoriartornera najoqqutaralugu assartuinerup pilersaarusiorneqartarnissaa piginnittut eqqarsaatigisariaqaleraat, Knud Fleischer isumaqarpoq.

Tunisat amerliartornerat ilutigalugu Rodebay Fish ApS-ip qerititsiviisa marloriaatinngortinneqarnissaat maanna nalilersuiffigineqartoq, pisortaq paasissutissiivoq.

Silaannaap allanngoriartorneranut tulluussakkamik assartuinerup aaqqissuunneqarnissaa pingaaruteqartoq, Oqaatsuni nunaqarfimmi aqutsisuni ilaasortaq Steen Gabrielsen, Naleraq, tapersiilluni oqarpoq.

Nalilersuineq pisariaqartoq

RAL qulinik umiarsuaateqarpoq, taakkuli ilai ukiuunerani aserfallatsaalineqartartut, taamaattumillu ukiuunerani sikoqartinnagu nunaqarfinnut tamakkiisumik angalatinneqarnissaat ajornakusoortoq, RAL-ip pisortaanera Niels Clemensen oqarpoq.

Aammali sumiiffiit ukiuunerani sikuusartumiittut, pilersaarutaareersut malillugit ukiup naannginnerani ukiumut naammattussanik nioqqutissanik pilersorneqartartut, taassuma erseqqissaatigaa. Taamaattumillu pilersaarutaareersut avataasigut umiarsuarnik immikkut pajuttussanik nassatanilluunniit aallertussanik angalatitsinissaq pilersaarutaanngitsoq, Niels Clemensen oqarpoq.

- Nunaqarfinnut assartuineq Naalakkersuisunut sullissinissamik isumaqatigiissut naapertorlugu ingerlanneqarpoq. Sikup qanoq innera malittareqqissaartarparput, periarfissaqaruttalu tikissinnaasarpugut.

- Ukioq manna sikunera kingusippoq, aappaaguli aamma taamaassanersoq naluarput. Taamaattumik ukiumiit ukiumut nalilersuisariaqartarpugut, pisortaaneq oqarpoq.

Angalanissamut pilersaarutaareersut saniatigut imaq sikoqanngippat imaluunniit sikuugaluarluni angallaviusinnaappat, RAL-ip umiarsuai attartorneqarsinnaasut, Niels Clemensen oqarpoq.