Kommuneqarfik Sermersooq meeqqanut atuarfeqarnermullu pisortartaartoq

Tina Evaldsen Meeqqanut Atuarfeqarnermullu Ingerlatsivimmut pisortassatut Kommuneqarfik Sermersuumi atorfinitsinneqarpoq. Atorfinitsitsineq qinnuteqartut piukkunnartorpassuit akornanni toqqaasoqareernerani pivoq, atorfinitsitsinnissamut ataatsimiititaliami ilaasortat tamarmiusut Tina Evaldsen atorfimmut piukkunnartutut nalileereernerisigut.

Tamanna Kommuneqarfik Sermersuup nittartakkamini ilisimatitsissutigaa.

Atorfinitsinneqarneratigut misilittagalimmik allannguerusussuseqartumillu kommune pisortartaarpoq, isumaginninnermut peqqissutsimullu tunngasuni aqutsinermik misilittagaqarluartoq.

Tina Evaldsen Isumaginninnermut aqutsisoqarfimmi pisortatut atorfeqaqqammerpoq, Paarisamilu immikkoortortami aqutsisutut atorfeqarnikuulluni. Tassani peqqissutsimut pitsaaliuinermullu tunngasunik anguniagalimmik suliaqartarsimavoq, suliassaqarfiillu assigiinngitsut akornanni suleqatigiinnermik misilittagaqarluarsimalluni.

- Tina Evaldsen sulinermini aqutsinermik, suleqatigiinnermik ineriartortitsinermillu suliaqarnikkut pikkorissuseqarluarnini takutittarsimavaa. Atugarissaarnerup, pitsaaliuinerup aamma meeqqanik ineriartortitsinerup imminnut ataqatigiinnerat pillugu pingaarutilimmik paasisimasaqassuseqarpoq, aamma meerartatta inuusuttortattalu suliniuteqarfigineqarnerini misilittagaanik atorluaanissaq qilanaaraarput, kommunaldirektør Ole Jakobsen tusagassiutitugt nalunaarummi oqarpoq.

Suliaqarfik pingaarutilik

Pisortanngorlaaq aamma qilanaarpoq.

- Kommuneqarfik Sermersuumiilernissannut aamma meeqqanut atuarfeqarnermullu tunngasunik suliaqalernissannut qilanaarpunga. Suliassaqarfik siunissaq eqqarsaatigalugu annertuumik pingaaruteqarpoq, aqutsisut, suleqataasut suleqatigisartakkallu qanimut suleqatigalugit inerisaanermi sunniuteqaqataanissannut qilanaarpunga, taanna oqarpoq.

Tina Evaldsen 49-nik ukioqarpoq, Nuummilu Kommuneqarfik Sermersuumi sulisutut misilittagaqarami allamik atorfeqarluni uteqqinnissaminut qilanaarpoq.

Tina 2026-mi maajip aallaqqaataani atorfinissaaq.