Sisimiuni nukappiaraq ajutoornermi kingorna toqusoq
Sisimiuni nukappiaraq sikkilerfimmi nakkarnermi kingorna toqukkut qimaguppoq.
Sisimiuni sikkilertarfik, ajutoorfimmi naneruutit.
Assi: Tôrtia Reimer-Johansen
OBS: Allaaserisaq nutarterneqarpoq kommunip ilassuteqareernerata kingorna.
Qeqqata Kommunia ilisimatitsivoq suliaq misissorlugu. Aalajangerpullu rampe angineq/portuneq peerneqassasoq. Sikkilertarfimmilu niaqorornaveequteqaqqusissummik allagartalersuiniarlutik.
Sisimiuni sikkilertarfimmi skateboardertarfimmilu alianartumik pisoqarpoq.
Nukappiaqqap ajutoornermi kingorna inuunini annaavaa.
Kommuni misiginneqataasoq
Qeqqata Kommuniata nukappiaqqap ilaqutaanut qanigisaanullu misiginneqataangaarnertik ersersippaat.
- Siullermik ilaqutai qanigisaalu ulluni makkunani artornangaartuni qamannga pisumik misiginneqaagut.
- Pissutsit oqaaseqarfigisinnaanngilavut, kikkulli tamarmik illersuutinik soorlu niaqorornaveeqqummik atuinissaannut kajumissaarusuppugut. Sikkilernermi/skaternermi silamiluunniit sikkilernermi, løbehjulinik atuinermi, kommunimi pisortaq Hans Christian Sværd Sermitsiamut oqarpoq.
Politiit kommuni oqaloqatigerusukkaa
Sisimiuni politiit ilisimatitsipput kommunip pinnguartarfiini isumannaallisaanerit pillugit kommuni oqaloqatigerusullugu.
- Kommuni naapissavarput, piumaffigerusupparpullu kommunip pinnguartarfiit pigisai sillimaniarnermut sukateriffigineqassasut. Sikkilertarfimmi pinnguartilluni qangatasoqartarpoq, ajutoornissamullu tamanna qanitsuararsuuvoq. Sikkilertarfimmi niaqorornaveequteqarnissamik allagartaqarnissaa piumasarissavarput, politikommissæri, Karl Jørgen Lennert oqarpoq.
Taassuma aamma ilanngullugu oqaatigaa sikkilertarfimmiinnaanngitsoq, aqqusinerni allanilu sikkilertilluni allanilluunniit assakaasunillinik atuitilluni niaqorornaveequteqarnissaq innersuussaasoq.
- Ingammik meeqqat, illoqarfimmi sikkilertillutik hjelmeqartariaqarput.
Sikkilertarfimmi skateboardertarfimmilu inissisimagaanni allagartat mianersoqqussutit takussaanngillat. Politiillu neriuutigaat siunissami ajutoornissat pinaveersaartinniarlugit mianersoqquteqassasoq.
