Nuummi toqusut timaannik ikuallaavimmik
pilersitsinissamut ingeniørit siunnersuisartut periarfissanik
misissuisussatut Kommuneqarfik
Sermersuup atorfinitsippai. Nalunaarusiaq piareerneqalerpoq,
kommunalbestyrelsimullu ilaasortat siunnersuut 2026-mut missingersuutinut
atatillugu ukioq manna kingusinnerusukkut isummerfigissavaat.
Toqusut tamaannik ikuallaavik Kalaallit
Nunaanni siullerpaassaaq, kingornalu iliveqarfimmut ilineqarsinnaallutik
arsalluunniit pinngortitamut siaruarterneqarsinnaallutik.
ARSANIK PINNGORTITAMUT SIARUARTERINERIT 13-IT
Ukiuni sisamani
affarmilu kingullerni iliveqarfinni qummuattanik ilisinerit 32-usut arsanillu
pinngortitami siaruarterinerit 13-iusut Biskoppip allaffiata kisitsisaataasa
Sermitsiamit pisatta takutippaat.
Biskopip
Paneeraq Siegstad Munkip arsat ilisaanerani Biibilimi atuarneqarsinnaasunik
siunnersuutai tassaapput Tussiutini kapitali 90, 1-12: Inuit
pujualanngorteqqittarpatit ima oqaravit: »Uteritsi, inuit ilissi!«.
Tussiutinilu kap. 139-mi Guutip inuk uumagaluarpat toqugangaluarpalluunniit
paaraa.
Ileqqulersuut
pillugit atuakkami allassimavoq palasip toqusumik ilisineq ima naggasissagaa:
“Issumit pivutit, issunngorumaarputit, issumiillu makikkumaarputit.”
- Tassa imaappoq
toqugutta timi pinngoqqaarfimminut utertinneqassaaq. Toqusut Guutimit
puigorneqartanngillat. Uagut inuit toqusut sumiinnerat
paasisinnaanngikkaagatsigu Guutimit najorteqartuarneq eqqarsaat nuannersuuvoq,
oqarpoq.
Apustilit
upperisarsiornikkut nalunaarutaanni ima allassimavoq: “Upperaarput timip
makititaanissaa.”
- Biibilimi allassimaffinni
taakkunani tamani ileqqulersuutitsinnilu eqqaaneqareerpoq toqusussaasugut
toqusunillu makikkumaartugut. Timip qanoq innera apeqqutaanngilaq, Paneeraq
Siegstad Munk oqarpoq.
kurt@sermitsiaq.gl
Nuummi toqusut timaannik ikuallaavimmik
pilersitsinissamut ingeniørit siunnersuisartut periarfissanik
misissuisussatut Kommuneqarfik
Sermersuup atorfinitsippai. Nalunaarusiaq piareerneqalerpoq,
kommunalbestyrelsimullu ilaasortat siunnersuut 2026-mut missingersuutinut
atatillugu ukioq manna kingusinnerusukkut isummerfigissavaat.
Toqusut tamaannik ikuallaavik Kalaallit
Nunaanni siullerpaassaaq, kingornalu iliveqarfimmut ilineqarsinnaallutik
arsalluunniit pinngortitamut siaruarterneqarsinnaallutik.
Tamanna ileqqussatigut upperisarsiornikkullu
apeqqutinik arlalinnik pilersitsivoq, inatsisiliornerlu Inatsisartut inatsisaat
2016-imeersoq aamma ikuallaasarneq pillugu Namminersorlutik Oqartussat
nalunaarutaat 2019-imeersumi naammassineqareerpoq.
– Kommuneqarfik Sermersooq Nuummi ikuallaavimmi
avatangiisinut mingutsitsinnginnermut akuersissummik tunniussippat, Oqaluffimmi
ilisinermut oqartussaasut suliap aallartinnissaanut piareersimapput, biskop
Paneeraq Siegstad Munk Sermitsiamut oqarpoq.
- Teologiimut tunngatillugu Ileqqulersuutit
malippavut, tassani ilaqutaasut tarnimut tunngasut pingaarnerutillugit.
Atuakkat naapertorlugit tunngavilersuisarpugut Guutip imminut assililluni inuk
pinngortikkaa, takullugu ajunngitsorlu (1. Mosesip allagaa 1:26). Allassimaffik
taanna imatut paasivara: Inuk timaalu illernartuupput, inuugaluarutta
toqusimagaluaruttaluunniit ataqqinnittumik pissuserissaartumillu
pineqartariaqarput. Toqungasut timaannut tunngatillugu najoqqutassiaq
tunngaviusoq tamanna maleruartariaqarparput.
Nalunaarsuineq pitsaanerusoq
Danmarkimi toqusut timaat ikuallanneqartarput,
arsaallu Nunatsinnut nassiunneqartarlutik.
– Palasit siorna septembarimi
ataatsimeersuarneranni ilisimatippavut pissutsit tamarmik
nalunaarsorneqartassammata iliveqarfinni
ilivermi ilisinermut arsanillu siaruarterinermi qinnuteqartoqartariaqartoq.
Isumaqarpunga juuni 2024 sioqqullugu nalunaarsorneqanngitsumik
ilisisoqartarsimasoq arsanillu siaruarterisoqartarsimasoq. Maannali palasit,
ulluinnarni ilisinermi oqartussaasut, pisussaaffitsik paasivaat. Tamatuma
kinguneranik Kalaallit Nunaanni arsanik ilisinerit nalunaarsorneqarsimasut
amerliartupallassimapput, Paneeraq Siegstad Munk oqarpoq. (Takussutissaq
takuuk).
Oqaluffik ilagiinnut ilaasortaagaanni
ilaasortaanngikkaluaraanniluunniit inunngortunik toqusunillu nalunaarsuisarpoq.
– Nunamut uternitsinnik eqqarsaat aamma inuit
kulturiannut assinguvoq. Iliveqarfiit kommunit akisussaaffigaat, kommuninullu
iliveqarfinnik kusanartumi immamut isikkiveqartumi sanaartortassasut
innersuussutigisarparput. Sassuma arnaa pillugu oqaluttuami uumasut tamarmik
imaaneersuupput, siuaasavullu imaanut immalluunniit eqqaani
ilineqarusuttarsimapput, Paneeraq Siegstad Munk oqarpoq.
Pinngortitamut uteqqinneq
Qupanuk Olsenip, 40-nik ukiulik, Kalaallit Nunaanni inuit nittartakkatigut
naapittarfiini nalunnginneqarnerpaap, YouTubemi kanalimi Q’s Greenlandimi
malinnaasuni 487.000-iusut inuit anersaakkut silarsuaat pillugu
oqaluttuuttarpai.
- Inuup arsai pinngortitamut siaruaannerat silarsuarmut tassunga qanoq
sunniuteqarpa?
– Itsaq toqusut timaat ujaqqanut ilineqartarput, sinerissamilu umiatsiamik
angalagaangatta ilivitoqqanik nassaartarpugut. Kristumiussuseq atulermat
toqusut nunamut qisummut poorlugit ilineqartalerput, tamannali
akueriuminaatsittuaannarsimavara. Taamaattumik toqusut timaannik ikuallaavik
tikilluaqquara, iliveqarfimmut ilineqartuaannarnermut taarsiullugu allamik
periarfissaqalersitsimmat, Qupanuk Olsen Sermitsiamut oqarpoq.
Qupanuk Olsen 2023-p naalernerani ilagiinnit anivoq.
– Uanga isumaga malillugu timip arsaanik pinngortitamut siaruarterineq
pinngortitamut uteqqinnertut ippoq, pinngortitamut siuaasatsinnullu
ataasiussuseqaqqilerneq. Takorloorsimagaluarpara naggammik angalanera
oqaluffimmiit iliveqarfimmut, ilaqutariit ikinngutillu
inuulluaqqusiffigisaanniit, pissasoq. Maanna kommuni ikuallaavimmik
pilersaaruteqarpoq, eqqarsaatigerusupparalu arsanik sumiiffinnut
nuannersorpassuarnik misigisaqarfiusimasunut siaruarterisoqarsinnaanera.
Tamanna naggataarutaasumik nuannersumik misigisaqarfiussaaq, Qupanuk Olsen
oqarpoq.
Qupanuk Olsen marsip 11-ani 202-nit qinerneqarluni Naleraq sinnerlugu
Inatsisartunut qinigaavoq.
Suna siulliussava: Sullorsuaq imaluunniit toqusut timaannik ikuallaavik
Nuummi illoqarfiup immikkoortuani Siorarsiorfimmi oqaluffiliortoqarnissaa
pillugu kommunimut pilersaarummut tapiliussaq Kommuneqarfik Sermersuup 2018-imi
akuersissutigaa. Nunaminertaq 1,5 hektarimik angissusilik Siorarsiorfiup
kujataatungaaniippoq, qaqqajunnaap qaavatigut, illoqarfiullu immikkoortuata
nutaap Kangerluarsunnguullu kangianiittup akornanniilluni. Sumiiffimmi
kulturikkut ingerlatsiviit soorlu oqaluffik, toqusut inaat, toqusup timaanik
ikuallaavik kiisalu katersugaasivik, takornarialeriffik saqqummersitsivillu sananeqarsinnaapput.
Aqqusinniortoqaqqaartariaqarporli.
Qinngutsinniit Siorarsiorfimmut sullorsuup misissorneqarnerata
nutarternissaa Kommunalbestyrelsimit aalajangerneqarpoq; suliaq ukiap
ingerlanerani aallartinnissaa naatsorsuutigineqarpoq, Søren Sohn Krog Pedersen,
Sanarfinermut Avatangiisinullu Ingerlatsivimmi pisortaq, ilisimatitsivoq.
Misissuinerup inernera 2027-mut missingersuutit pillugit
isumaqatigiinniarnerni atorneqarsinnaagunarpoq.
2026-mulli missingersuutit suliarineqarnerannut atatillugu Nuummi toqusut
timaannik ikuallaavimmik misissuinissaq kommunalbestyrelsimi ilaasortanut
saqqummiunneqareersimavoq.
– Politikerit toqusut
timaannik ikuallaavimmik pilersitsiniarlutik aalajangerpata Siorarsiorfiup
eqqaaniinngitsumik sumiiffimmik allamik ujaasisussanngussaagut, Søren Sohn Krog
Pedersen naliliivoq.
