Tusagassiorfik: Tusass Starlinkimik isumaqatiginninniarpoq
Tusass „Starlinkip teknologiata Kalaallit Nunaanni atorneqarsinnaanera pillugu“ Starlinkimik, Elon Muskip pigisaanik, isumaqatiginninniarpoq.
Qaammataasanik ingerlatseqatigiiffik Starlink, Elon Muskip pigisaa, isumaqatigiinniutigineqartoq Tusassip pisortaanera Toke Binzer TV2-mut oqarpoq.
Assi: Tusass
Kalaallit Nunaanni attaveqatigiinnermut suliffeqarfiup Tusassip Amerikamiut suliffeqarfiutaat Starlink, niuertumit Elon Muskimit pigineqartoq, decembarimiilli isumaqatigiinniarfigaa.
“Starlinkip teknologiata Kalaallit Nunaanni atorneqarsinnaanera” isumaqatigiinniutigineqarpoq.
Taama pisortaaneq Toke Binzer TV 2-mut oqarpoq.
- Starlinkip iluaqutissartai erseqqissut takusinnaavakka, kisianni aamma unammillernartoqarnera ersarippoq, tusagassiorfimmut oqarpoq.
Sivisuumik oqaloqatigiittoqartoq
Starlink qaammataasanut attaveqaataavoq Amerikamiut suliffeqarfiannit SpaceX-imit ineriartortinneqarsimallunilu aallartinneqarsimasoq. Tusass Starlinkimik oqaloqateqarsimasoq siorna apriilimi Sermitsiap allaaseraa, tamatumali saniatigut Namminersorlutik Oqartussat attaveqatigiinnermut suliffeqarfiutaata qaammataasanut tuniniaanermi ingerlatsisut allat oqaloqatigigai ilisimatitsissutigineqarpoq.
Aamma atuaruk: Tusass Starlinkimik oqaloqateqarnerarpoq
Starlink atorlugu Kalaallit Nunaanni isorliunerusuni oqarasuaatit internettilu attaveqatigiinnerulersinneqarsinnaapput.
Kalaallit Nunaanni attaveqaatit qanoq annertutigisut Tusassip Starlinkillu isumaqatigiinniutigineraat ilisimaneqanngilaq.
Toke Binzer Starlinkilu tatigeqatigiinnermut uppernarsaammik atsiorsimasut TV 2 allappoq. Taamaammallu isumaqatigiinniarnerit qanoq ittuunersut oqaatigisinnaanngilai.
Taamaakkaluartoq Kalaallit Nunaanni attaveqaatit pingaarutillit pigiuaannarnissaat attaveqatigiinnermut ingerlatsivimmut „pingaaruteqangaartoq“ oqaatigineqarpoq.
