Meeqqanut sungiusaasunik nuna tamakkerlugu pikkorissaasoqaleruttorpoq

Assammik arsartarneq siuariartortorujussuuvoq. 

Ilaasortat ukiuni kingullerni amerliartupiloornerat pissutigalugu, Nunatsinni sumi tamaani assammik arsartarneq sukkasuumik ineriartorfiuvoq. Soqutiginninnerulerneq tamanna malinnaaffiginiarlugu Timersoqatigiiffiit Assammik Arsartartut Kattuffiat maanna angisuumik alloriarpoq: sungiusaasutut angusaqarfiulluartumik ilinniartitsinikkut, assammik arsartartut amerlaneruliinnaratik, timersornerulli pitsaanerusumik ineriartornissaanik qulakkeerinnittoqassalluni – piginnaasaqarluartunut aammali tamakkiisumik.

Tamanna kalaallit assammik arsartarneranni piffissap nutaap aallartinneranut takussutissaavoq. Anguniagaq tamanna anguniarlugu TAAK-p – Timersoqatigiiffiit Assammik Arsartartut Kattuffiata Dansk Håndbold suleqatigilerpaa, taakkulu Nunatsinni maannakkorpiaq angalapput meeqqanillu sungiusaasartunik pikkorissartitsillutik. Siunertarineqartoq? Nunatsinni sungiusaasartut meeqqanik inuusuttuaqqanillu nukittorsaanissaminnut periaatsinik atorsinnaasaminnik pitsaanerpaanik tunineqarnissaat, tamatumani – Nuummi, Ilulissani Qaqortumiluunniit assamik arsartartuunerat apeqqutaatinnagu.

Qallunaat ikinngutit

Sungiusaasoqatigiit Katrine Thoe Nielsen aamma Simon Guldager Christensen, Dansk Håndboldimeersut illoqarfinnilu arlalinni angalareerlutik Nuummut oktobarip 13-ianni tikipput. Siullermik Sisimiuniissimapput, tassani sungiusaasut Sisimiuneersut Maniitsumeersullu pikkorissartinneqarlutik. Tamanna sioqqullugu Ilulissaniissimapput, taavani sungiusaasut Ilulissaneersut Aasianneersullu ulluni arlalinni pikkorissartinneqarlutik. Maannakkut Nuummiipput, tassani sungiusaasut Nuummeersut Paamiuneersullu pikkorissartinneqarlutik, Nuummiillu Qaqortumut ingerlaqqissallutik. TAAK-mit oqaatigineqartut naapertorlugit angalaneq pikkorissaanerinnaanngilaq. Tassami Nunatsinni assammik arsartarnerup nukittorsarneqarnissaanut ataatsimoorluni suliniutaavoq nukittuumik iliuuseqarnikkut ingerlanneqartoq. Peqqissutsimut, timersornermut ataatsimoornermullu aningaasaliineq, unammisarfinni ukiorpassuarni maluginiarneqartussaq.

- TAAK-p sungiusaasut amerlasuut ilinniartinneqarlutillu uppernarsaatitaartikkusuppai, taakkulu pitsaanerpaamik aallartipput – meeqqanut inuusuttuaqqanullu sungiusaasunik pikkorissaallutik. Taakkua tunngaviusumik naqqaniit ineriartortitsipput, tamannalu silatusaarnerujussuuvoq, Katrine Thoe Nielsen oqarpoq, taannalu Dansk Håndboldimi meeqqat assammik arsartarnerannut akisussaasuuvoq.

Simon Guldager Christensen, Dansk Håndbold sinnerlugu aamma peqataasoq, ulluinnarni peqatigiiffinnut siunnersortitut sulisarpoq. Klubini qanimut suleqataasarneq sungiusimavaa peqatigiiffinnilu pissutsit qanimut ilisimallugit. Sungiusaasunut pikkorissartitsinermi ilitsersuisarnermi saniatigut peqatigiiffinnik ineriartortitsineq pillugu ilisimasaminik siunnersuisarpoq – tamannalu najukkami assammik arsarnermi nukittorsaaniarnermut pingaaruteqarluni.

- Dansk Håndboldimi ilisimasavut avitseqatigiissutigiumavavut ineriartortitsinermilu suliniutinik tapersersuerusulluta. Kalaallinik ikinngutitsinnik naapitsinitsinni illuatungeriinnut pingaarutilinnik ilikkagassarpassuaqartoq upperaarput, Simon Guldager Christensen oqarpoq.

Oqaatsit assigiinngitsut marluk — timersuut ataaseq

Soorunami pikkorissartitsinermi oqaatsit atorneqartut ilungersunartorsiortitsisimapput, pikkorissartinneqartulli tunniusimanerat pingaaruteqarnersaalluni.

- Atuagassiissutit ilaat nutserneqarsimapput, taamaattorli qallunaatuinnaq oqaaseqartuuvugut, pikkorissaqataasullu ilaat qallunaatut paasisinnaanngillat. Taamaakkaluartoq pikkorissartut ilinniarusussuseqarluaramik ilaat qallunaatut oqalussinnaasut namminneq kajumissutsiminnik ilaminnut nutserisarput. Tamanna ataatsimoornermik nakussatsitsiinnarpoq peqataanerulersitsisarlunilu, Katrine qungujulluni oqaluttuarpoq.

Oqaatsit unammillernartut akornutaaginnanngillat — aammali qanoq pitsaanerpaamik attaveqatigiittoqarsinnaaneranik ilinniartitsisoqarsinnaaneranillu eqqarsaatiginnilersitsisarput, ingammik meeqqat pineqaraangata.

„Oqaatsit atorlugit oqalunnermi maluginiarpara ingerlaannaq arriinnerulersartoqartarlunilu timi atornerusoqartarluni isikkullu attavissarsiortoqalertarluni.

- Oqaatsitigut akimmiffeqarneq annerpaaleraangat, ingerlaannartumik arriinnerulersoqartarlunilu timi atorneqarnerulersartoq isikkullu attavissarsiortoqarnerulersartoq maluginiarpara. Tamannarpiaavorlumi meeqqanik ilinniartitsinermi aamma periaaserineqartussaq. Taamaalilluni ilinniartitsissutigineqartunik piviusunngortitsinertut ippoq, Simon qungujulluni oqarpoq.

Meeqqat assammik arsartartut peqatigalugit

Sungiusaasunik ilinniartitsinerni tamani pikkorissartut kisimik pineqartanngillat - aammali meeqqat najukkamiittut pingaarutilimmik peqataatinneqartarput. Pikkorissartut taamaalillutik ilikkakkatik ingerlaannarlutik piviusumi misilissinnaavaat, taamalu sungiusarnernik meeqqanillu sungiusaaneq misilissinnaallugu. Illoqarfinni arlalinni meeqqat aalajangersimasut takkuttuartarput, nukissaqarluarlutik assammillu arsarlutik nuannisarluartarlutik.

- Sisimiuni ullormi siullermi niviarsiaqqat assammik arsartartut nuannisaqataagamik, ulloq naammassimmat aperigamik aqaguani takkuteqqissinnaanerlutik. Taamaalillutik ullut pingasut tulleriissiinnarlugit takkuttarput, Ilulissanilu aamma taamaalluni. Tamanna nuanneqaaq – tassami ilisimasavut sungiusaasunut tunniussavut sungiusaasunuinnaq iluaqutaanatik aammali arsartartunut iluaqutaapput, Simon qungujulluni oqarpoq.

Tamanna sungiusaasunngortussat qanoq piumassuseqartiginerannut takussutissaannaanngilaq – aammali meeqqat assammik arsartarnermik qanoq soqutiginnitsiginerannut takussutissaalluni. Pinnguarusupput, ilinniarusupput aamma arsarusupput. Tamatumalu sungiusaasutut ilinniagaqarneq suli siunertaqarnerulersippaa: Kinguaariit tulliuttut tamarmiusut piareersimapput utaqqiinnarlutillu. Katrine aamma Simon sungiusaasarnermut aaqqissuussinermik aamma pamersaanermullu atugassat saniatigut kortbanemik aamma minibanemik – Danmarkimi U9-mi aamma U11-mi atorneqartartunik – ilitsersuipput. Tamanna pivoq kalaallit kattuffiata kissaateqarnerata kingorna, taakkumi meeqqat arsarnermut pitsaanerusumik akulerutsinneqarnissaat kissaatigaat.

- Assammik arsarneq tamakkiisoq pisariungaatsiarami, taamaattumik naleqqussaanikkut meeqqanut paasiuminarnerulersillugulu ersarinnerulersipparput – taamaalilluta kikkut tamarmik assammik arsarnermi nuannersumik misigisaqarnissaannik pitsaanerusumik qulakkeerinnilluta, Katrine nassuiaavoq.

Meeqqat taamaalillutik assammik arsarnermik nuannarinninnerminnik piginnaanerminnillu ineriartortitsisinnaapput.

Assammik arsarneq ataatsimoortitsisutut

Assammik arsarneq arsartarfimmi unammiuaarnerinnaanngilaq, aammali ataatsimoornermut tunngaviuvoq.

- Assammik arsarneq kiffaanngissuseqarfiusutut, meeqqanit inersimasunillu toqqarneqartartoq misigisarpara. Timersortartut peqatigisarneri nammineerluta ujartortarpavut, iligiillu timersorneranni namminermit annerusumut ilaasoqartarluni, Katrine oqarpoq.

Pikkorissartut ilinniartitsisullu isumaat assigiipput: Assammik arsarnermi periaatsit sungiusarnerillu kisimik apeqqutaanngillat – pingaarnerpaamik inuit naligiittut naapittarput.

- Allanik suleqateqarnikkut arlaannik sammisaqarneq iluatsilluartumillu naammassisaqarneq immikkut ittuuvoq. Suminngaanneernerput angerlarsimaffitsinniluunniit qanoq inissisimanerput apeqqutaanngillat. Timersortarfimmut iseraangatta meeqqat tamarmik naligiilersarput. Kiffaanngissuseqarfiuvoq, ataatsimoorfiulluni nuannaarfiullunilu assigiinngissutinit annerungaartoq. Tamannalu pikkorissartunut tamatigut paasitinniartarparput, Simon qungujulaqaluni oqarpoq.

Tamanut ammasumik akuutitsinermik ataatsimoornermillu isiginnittaaseqarneq assammik arsarnermi nukittoqutaavoq — assammik arsarneq kikkut tamarmik tikilluaqqusaaffigisaat, ataatsimoornerlu qitiutinneqartuaannarluni.

Siunissami ataavartitsinissaq siunnerfigineqartoq

TAAK-p assammik arsarnermik kivitsiniarnera nuna tamakkerlugu tusaamaneqaqaaq. Katrinep Simonillu meeqqanut sungiusaasunut pikkorissaanertik naammassippassuk, Nunatsinni meeqqanut sungiusaasortaat nutaat 50-it sinnillit allagartartaarsimassapput. Iliuuserisassaq tulliuttoq tassaassaaq, kalaallinik ilitsersuisunik ilinniartitsinissaq, taamaalilluni siunissami sungiusaasunik ilinniartitsineq najukkami aallaaveqalissammat. Ineriartornerup ataavartuunerulernissaa aamma Timersoqatigiiffiit Assammik Arsartartut Kattuffiata piffissaq ungasinnerusoq eqqarsaatigalugu nammineersinnaanerata qulakkeerneqarnissaa anguniarneqarpoq. Namminersorluni ingerlatsinissamut periarfissat ersaripput – nunamilu tamarmi tamatumunnga tunngatillugu aamma taama inissisimasoqarluni.

- Kalaallit Nunaata meeqqanik sungiusaanermi siunissami imminut napatissinnaanerulernissaanut peqataasinnaassagutta nuannaarutigissaqaarput, soorunami aamma suli tikeraartarsinnaanissarput neriuutigaarput, Katrine oqarpoq.

- Aap, tikeraaqqikkusulluinnarpugut. Misigisaq nuannerluinnarpoq, aamma Kalaallit Nunaanni kattuffik suleqatigalugu nuanneqaaq, Simon qungujulluni tapersiivoq.