Angutit assammik arsarlutik nunanut allanut unammisartuini misilittagaqarnerpaaq arnaavoq
Timikkut katsorsaasartoq Berit Duus ukiut 20-t matuma siorna siullerpaamik nunanut allanut unammisartunut Amerika kujallermut ilaavoq. Unammisartut immap qaavanit 2200 meterinik qutsitsigisumi unamminissartik sapaatip-akunnerata naanerani matumani sulissutigigaat Mexicomiit taanna oqaluttuarpoq.
Berit Duus nunanut allanut unammisartut sungiusartut akornanni.
Assiliisoq: Knud Fl. Larsen
Berit Duusip naluaa nunanut allanut unammisartut ilagalugit Københavnimiit Amerikami nunap ilaanut qanoq amerlatigisunik timmisartoqataasarsimanerluni. Argentina, Brasilien, Uruguay, Chile, Mexico, Puerto Rico USA-lu maannamu angalaqataaffigisimavai.
Berit Duusip uini, nunanut allanut unammisartuusimasoq sungiusaasumullu ikiortaasimasoq Rasmus Larsen, meerartaanngikkallaramik ilagalugu Amerika Kujallermut angalanikuupput. Chilemi assammik arsartartut tikeraarlugit aammalu Galápagosip qeqertaani uumasut tupinnartut takullugit.
Misilittagaqarluartoq
Berit Duus 47-nik ukiulik timersortartunut tangiartuisartutut timersortartunik pikkorissunik sullissisarnerminik misilittagaqarluarpoq. Odensemi tangiartuisarfinni nuimanerit ilaanni sulivoq. Arnat Odense Håndbold-imeersut, marloriarluni Danmarkimi pissartanngoqatigisimasani, ilaatigut sullitarai.
Kalaallit arnat assammik arsarlutik nunanut allanut unammisartui Berit Duusip misilittagartuujuneranik piffissap ilaani aamma iluaqutigisimavaat. 2017-imi siullermeerlutik.
Amerika Kujalleq pingaartillugu minnerunngitsumillu inuit ukiorpassuarni naapissimasani nuannaralugit Berit Duusip Mexico Citymiit nittartakkami aviisi Sermitsiamut oqarasuaatikkut WhatsApp-ikkut attaveqarnermigut oqaatigaa.
- Inuit assigiinngitsut assigiinnerarlugit oqaatigisinnaanngilarput, inuilli naapittakkavulli tamatigut ilakkuminartuullutillu inussiarnersuupput.
- Suut tamarmik eqqissisimanarlutillu toqqissisimanarput. Angumerissaqqaarpavut, taama eqqarsartariaaseqarpugut, Berit Duus nuannaarpalulluni oqaluttuarpoq.
Ilaqutariittut ippugut
- Nunanut allanut unammisartut ilaqutariissuartut ippugut. Tamaasa ilisarisimalluarpakka aamma ilaqutaat ilisarisimalluarlugit. Taakkualu ilaquttakka ilisarisimalluarpaat. Suli akuuninnut peqqutaaqataavoq.
- Maani Mexicomi immap qaavanit 2200 meterinik qutsitsigisumi unamminissatinnut sapaatip-akunnerata naanerani sungiussiniartarpugut. Silaannaq allaaneruvoq, imertorluarnissarpullu eqqaamaniartariaqarparput, Berit Duus naggasiivoq.
Angutit nunanut allanut unammisartut ataasinngornermi unnukkut siullermik Canadamut unammissapput, unamminerlu aallartissaaq Kalaallit Nunaata nalunaaqutaa malillugu unnukkut qulingiluanut.
