KL

DK

PIFFISSAMIK AALAJANGERSAANEQ

Inatsisinut Atuutsitsinermut Ataatsimiititaliaq mumeriarpoq: Aasaanerani nalunaaqutaq atuutiinnarli

Piffissamik aalajangersaaneq Inatsisartuni oqaluuserineqaqqinnissaa pisussanngorpoq. Inatsisinut Atuutsitsinermut Ataatsimiisitaliap maanna isumaliutissiissummi isummani allanngortippaa.

Piffissap aalajangersarniarnerata uterteqqinneqarnissaanut tunngavilersuutit ilaat tassaavoq seqernup siusinnerusukkut nuisalernissaa, ilutigisaanillu aalisartut piniartullu siusinaartumik aallarsinnaanerat.
Hanna Hviid Hanna Hviid Tusagassiortoq
Saqqummersinneqarpoq

Ukiukkut nalunaaquttap akunnerinik sisamanik aasakkullu nalunaaquttap akunnerinik tallimanik Danmarkimut nikingasarnera, politikerit akueriuminaatsippaat.

Inatsisinut Atuutsitsinermut Ataatsimiititaliami amerlanerussuteqartut, tassa Demokraatit, Inuit Ataqatigiit aamma Atassut, Siumup piffissap aalajangersarneqarnerata allanngortinnissaanut aasaaneranilu nalunaaquttamik atorunnaarsitsinissamik siunnersuutaata pingajussaaneerneqarnissaanut allannguutissatut siunnersuummik saqqummiussipput.

Inatsisit pillugit ataatsimiititaliap maanna siunnersuutigaa piffissaq UTC-3-mut oktobarimi 2027-mi utertinneqassasoq, aasaaneranili nalunaaqutaq EU-mi atuutsillugu attatiinnarneqassaaq.

Tamanna akuerineqarpat Europap kitaanut nalunaaquttap-akunnerinik sisamanik aappaagu oktobarip naaneranit nikingalissaaq. Taamatullu seqineq akunnermik ataatsimik sioqqutsilluni nuisalissaaq.

Naak allannguutissatut siunnersuut naapertorlugu Naalakkersuisut aasaanerani nalunaaqutaq pillugu malittarisassaliorsinnaagaluartut, ataatsimiititaliap inassutigaa EU-mi maleruagassat malillugit aasaanerani nalunaaquttap akunnerinik tallimanik nikingassutaanngitsumik piffissaqartitsisoqartassasoq.

Ataatsimiititaliap aappassaaneerneqarnissaanut isumaliutissiissutaani siunnersuutigineqarpoq aasaanerani nalunaaqutaq januaarip aallaqqaataanit 2027-mi atorunnaarsinneqarnissaa, piffissallu immikkoortui aatsaat 2028-mi allanngortinneqartassasut.

Tamanna sisamanngornermi novembarip aqqaneq-aappaanni pingajussaaneerneqassaaq, tassanilu piffissap aalajangersarneqarnerata qanoq isikkoqarnissaa inaarutaasumik aalajangiiffigineqassaaq.

Inatsisissatut siunnersuut akuersissutigineqarpat, tamanna isumaqassaaq 2027-mi oktobarip 31-anni unnuap qeqqanut nalunaaqutaq akunnernik marlunnik kinguartinneqassasoq. Tamanna ukiuunerani nalunaaquttap akunnermik ataatsimik kinguartinneqartarneranut naleqqiunneqarsinnaavoq.

KALAALLIT NUNAANNI NALUNAAQUTTAT INGERLAAQATIGIIFFII

Kalaallit Nunaanni nalunaaquttap ingerlaaqatigiiffii assigiinngitsut pingasuupput.

Nunap annersaani UTC-2-uvoq.

Pituffimmi sakkutooqarfik Amerikap kangiata nalunaaqutaa malillugu UTC -4-miippoq.

Tunumi Nationalparkimi silasiorfik Danmarkshavn UTC +0-miippoq.

Kitaani Tunumilu nalunaaquttap ingerlaaqatigiiffia UTC -3-mit UTC -2-mut 2023-mi oktobarimi allanngortinneqarpoq.

Ittoqqortoormiit 2024-mi marsimi UTC-1-imit UTC-2-mut aamma nuuppoq.

Danmarkshavni Pituffillu Space Baselu kisimik pinnatik nunap sinnerani aasaanerani nalunaaqutaq atorneqarpoq.

aasaanerani nalunaaqutaq utc-3 inatsisartut inuiaqatigiit inatsisinut atuutsitsinermut ataatsimiititaliaq piffissamik aalajangersaaneq

Atorfiit tamaasa takukkit

PODCASTI

Powered by Labrador CMS