Angutit nunatsinni isikkammik arsarlutik pissartanngorniunnissaannut anngunniuttoqassanngitsoq
Ukioq manna anngunniunnerit aningaasatigut klubbinut akisuallaassammata, KAK-mi unammiuaartitsinermut ataatsimiititaliaq aalajangerpoq ukioq manna anngunniuttoqassanngitsoq.
Foto: Saalamiit Møller Lorentzen.
Aggustip aappaanit aqqarngata tungaanut nunatsinni silami arsaannermi angutini pissartanngorniunnissaq ukioq manna allaalaartumik pissapput.
Iligiit peqataasussatut nalunaartut tamarmik anngunniunnertaqanngittumik pissartanngorniunnissamut Qeqertarsuarmi G44-up aaqqissugaannik peqataassapput.
Vivi Fleischer Motzfeldt Kalaallit Arsaattartut Kattuffianneersoq nassuiaavoq anngunniunnerit peqataaffiginiarlugit angalanissaq aningaasatigut klubbinut akisuallaassasoq, taamaammat KAK-mi unammiuaartitsinermut ataatsimiititaliap ukioq manna anngunniuttoqassanngitsoq aalajangerpaa.
Nunat tamalaaniit tikeraartut
Arsartartut kisimik Qeqertarsualiassanngillat, KAK-ip paasissutissiissutigaa nunanut allanut unammisartut sungiusaasua Qeqertarsuarnut tikikkumaartoq, kiisalu aatsaat taama nunanit allanit isiginnaariartoqartigissasoq.
- Aatsaat taama nunanit allanit isiginnaariartoqartigissaaq. Piffissaq kingulleq Nunarput allanit eqqumaffiginerulerneqarpoq, tamannalu kingunerivaa soqutiginninneq allanit annertoorujussuanngorsimasoq. Nutaarsiassalerisut nunanit allanit arlalinnit tikerassapput unammersuarneq malinnaaffigiartorlugu, Vivi Fleischer Motzfeldt oqarpoq.
Iligiit uku GM-imut peqataassapput:
- G-44
- UB-83
- FC Malamuk
- N-48
- FC Aqisseq
- SAK
- IT-79
- NÛK
- B-67
- Nagtoralik
- N-85
