Arsaattartut Nuummi pissartanngorniutivinnissamut piareertut

B-67 kuultinnaqqissava, imaluunniit illoqarfeqataat unammillertigiuartagaat IT-79 isikkamik arsaannermik Nunatsinni pissartanngussappat?

Nuup arsaattarfissuani ualeru tamanna paasinarsissaaq. Isikkamik arsaattartut iligiit tamarmik Nuummeersut pissartanngorniutivinnissamut anngunniunnermi ingerlalluareerlutik maanna kuultinnanniutissapput.

B-67-ip G-44 7-0-mik arfininngornermi ajugaaffigaa. Qeqertarsuarmeersut unammiuaarnermi ingerlalluaraluarput semifinalimili ajorsarlutik.

Semifinalimi IT-79 N-45-mut Paamiuneersunut 6-0-mik aamma ajugaapput.

Pissartat B-67-imeersut pissartanngorniutivinnermi ajugaanissaat ilimagineqaraluarpoq, IT-79-imulli pingasunngormat unammigamik ajorsarput. Taamaattumik kuultinnanniunnissaat pissanganarsinnaalluni.

Arsaannermik soqutigisallit Nuup avataaniittut KNR-ikkut nalunaaqutaq 13.50-imiit malinnaasinnaapput.

Semifinalimi ajorsartut bronzennanniuteqqaassaput, kingornalu ajugaaniutivinneq nalunaaqutaq sisamanut aallartissalluni.