KAK-p qinnuteqaataa Sermersuumit qularutigineqartoq
Kalaallit Arsaattartut Kattuffiat (KAK) futsalimik nunanut allanut unammisartunut Danmarkimit, Norgemit Estlandimiillu peqataaffigineqartumik Nuummi unammiuaartitserusulluni Kommuneqarfik Sermersuumut 800.000 koruuninik tapiissutinik qinnuteqarpoq.
Toqqorsivimmit assilisaq: Leiff Josefsen
Kommuneqarfik Sermersuumi aningaasaqarnermut ataatsimiititaliap ullumi ataatsimiinnerani KAK-mut tapiissuteqartoqassanersoq politikkerit aalajangiiffigissavaat, taamaalilluni angutit Nordic/Baltic Cup-ernissaat septembarip 24-annit 29-annut piviusunngortinneqarsinnaaniassammat.
KAK 800.000 koruuninik qinnuteqarpoq, taakkuli illoqarfiit pingaarnersaata kommuniata missingersuusiornermut ilanngussimanngilai, taamaattumillu aningaasat ingerlatsinermut immikkoortumiit immikkut aningaasaliissutitigut pissarsiarineqassapput.
Missingersuutit pillugit nalornissuteqarneq
Ataatsimiititaliami politikerinut saqqummiunneqartumi KAK-p missingersuusiaa apeqquserneqarpoq.
- Matumunnga aaqqissuussamut tapiissutinik qinnuteqaat kingusissorujussuakkut takkuppoq.
Peqatigitillugu missingersuummut siunnersuut aatsaat apeqqutigineqarneratigut nassiunneqarpoq.
Tamanna ingerlatsivimmit missingersuut piviusorsiorpalaarnersoq taamatuttaaq missingersuut
malinneqassanersoq ernumanartinneqarpoq, kommunimi pisortaaneq Ole Jakobsen oqarpoq.
Missingersuusiap nalornissutigineqarnera pissutigalugu “ingerlatsivimmit innersuussutigineqarpoq Nordic Cup-imik ingerlatsinissamut
aningaasaliisoqassappat Namminersorlutik Oqartussat taamaaqataanik tapiissuteqarnissaa
piumasaqaatigineqassasoq pissutigalugu Nuna tamakkerlugu aaqqissuussaammat kiisalu KAK-mut piumasaqaatigineqassasoq aaqqissuussap naammassereernerani naatsorsuineq
nassiunneqassasoq”.
Unammiuaartitsineq Kalaallit Nunaanni timersornermik siuarsaallunilu siammarterissasoq, kiisalu Kalaallit Nunaanni angutit futsalimi nunanut allanut unammisartut nukittorsarlugillu ineriartortissagai KAK isumaqarpoq. Aammattaaq unammiuaarneq Concacafimut Fifamullu ilaasortanngornissamut aqqutissiuussisinnaavoq, tamatumalu saniatigut Nuuk Kalaallit Nunaallu nittarsaanneqassapput. Futsalimi kattuffiup qinnuteqaataani ilaatigut taamatut allassimavoq, KAK-p siulittaasuanit Kenneth Kleistimit juunip qulingani nassiunneqartumi.
Aningaasartuutit 3,5 mio. kr.
Aningaasanut missingersuummi aningaasartuutit 3,5 millionit koruunit sinnerlugit amerlassuseqarnissaat naatsorsuutigineqarpoq. Ilaatigut isertitat 755.000 koruunit iserniarnermit isertinneqarsinnaanissaat naatsorsuutigineqarpoq, nerisassanillu tuniniaanermiillu 250.000 koruunit missaat isertinneqarsinnaassallutik.
Qinnuteqaat naapertorlugu KAK-p siulersuisuisa "GIF oqaloqatigisimavaat, Namminersorlutillu Oqartussat aamma Kommuneqarfik Sermersooq Nordic Cup-imik unammiuaartitsinissamut aningaasatigut tapersersuissappata GIF-illu KAK tapersersorniarlugu aalajangerpoq".
Kenneth Kleistip qinnuteqaammini aningaasat qanoq amerlatigisut Namminersorlutik Oqartussanut qinnutigisimanersut paasissutissiissutiginngilai. Missingersuutini isertitat aningaasartuutillu assigiinngissutaat 1,3 millionit koruunit sinnilaarlugit amigartooruteqarput.
