Suleqatigiinnerulissasut

DBU-p siulittaasua Jesper Møller KAK-mut tikeraaqqammerpoq, tassa kattuffiit taakku marluk suleqatigiinnerulernerannut atatillugu. Tikeraarnermi suleqatigiinnissamut isumaqatigiissummik pilersitsisoqarnissaa siunertaralugu suleriaqqinnissamut pilersaarusiortoqarpoq, aaqqissuussaanerusumik suleqatigiinnissamut isumaqatigiissusiornissaq siunertarineqarluni.

Nunatsinni meeqqat inuusuttuaqqallu arsaattarnerisa nukittorsarneqarnissaat, suliniutit qitiusut ilagaat. KAK-p, meeqqat inuusuttuaqqallu akornanni arsaannerup siuarsarnissaa aamma siamasissumik sinaakkutinik nukittuunik pilersitsisoqarnissaa ersarissumik kissaatigaa. Jesper Møllerip oqaatigaa, Kalaallit Nunaanni ataatsimiinnertik ammasumik aaqqiissutissanillu ujartuilluni oqaloqatigiinnermik ilisarnaateqartoq.

- KAK oqaloqatigiilluarnitsinnut qujaffigerusupparput. Ataatsimoorluta immitsinnullu ataqqilluta suleqatigiinnissamut isumaqatigiissummik pilersitsiniarluta suliniuteqarpugut, tamanna Kalaallit Nunaanni arsaannerup ineriartortinneqarneranut nukittorsaataasinnaavoq – pingaartumik meeqqat inuusuttuaqqallu akornanni, Jesper Møller oqarpoq.

Kattuffiit taakku marluk suliassap ataatsimut kivinnissaanut piumassuseqarluarput, tikeraarnermilu erseqqissarneqarpoq qanittumik oqaloqatigiittarnikkut suleqatigiinnikkullu arsaanneq pitsaasumik ineriartortinneqassasoq.