KL

DK

EM AAMMA VM-IMUT PIAREERSARNEQ:

Unammisartut sisamat King of Taekwon-Do-mi nunatsinnit peqataasssapput

Taekwon-do-mi nunanut allanut unammisartut, Elite Sport Greenlandimit aningaasaliiffigineqartut, una sapaatip akunnera Grækenland-imut illoqarfimmut Thessaloniki-mut angalassapput, unammersuarnermut nunanit tamalaanit peqataaffigineqartumut, King of Taekwon-Do-mik taaneqartumut peqataajartorlutik.

Jensine Berthelsen
AVISISIORTOQ
Saqqummersinneqarpoq

Unammineq tallimanngorpamit sapaat ilanngullugu ingerlanneqassaaq. Peqataaneq kattuffiup tungaanit aappaagu unammersuarnernut EM-imut aammalu VM-imut ingerlanneqartussanut piareersaatit ilagaat, Greenland Taekwon-do Federationimit tusagassiuutitigut nalunaarutigineqarpoq.

Unammersuarneq unammisartunit nunanit 15-it missaaniik aggersunik peqataaffigineqassaaq, ilaatigut nunat nukittuunik unammisartoqakkajuttartut peqataatitaqassallutik. Taamaalillutik unammisartut nunatsinnit peqataasut periarfissaqassapput misilittassallugu unammisartunut peqataasunut naleqqiullutik qanoq inissisimanerlutik, taamattaarlu aappaagu unammersuarnernut anginernut peqataanissamut piareersarnertik ingerlateqqissinnaalissallugu.

Kalaallit Nunaat sinnerlugu peqataasut King of Taekwon-Do-mi:

  • Lars Lennert Abelsen
  • Inukkuluk G. Lennert 
  • Maasi Davidsen
  • Angutinnguaq Nielsen

Sungiusaasoq: Louis Nielsen

Nunanut allanut unammisartoq, Lars Lennert Abelsen, siornatigut unammissummi tul-imi VM-imi bronz- innannikoq, aappaagu unammersuarnernut piareersaatitut aamma King of Taekwon-domi unammeqataassooq. Lars Lennert Abelsen aappaagu naggataamik inersimasuni utoqqasaanut nuunnginnermini unammeqataassooq.

- King of Taekwon-do nunanut allanut unammisartunut peqataaffigissallugu pingaaruteqarpoq. Peqataanikkut unammisartut misilittagartunerulersinnaapput, aammalu unammisartunut pikkorissunut nunanit tamalaaneersunut sanilliunnikkut imminnut misilittarsinnaallutik. Unammisartut aappaagumut EM -imut aammalu VM-imut piareersarnermi teknikkikkut aamma eqqarsartaatsikkut ataavartumik siuariartornissaat pingaartipparput, peqataanerpullu piareersarnermi pingaarutilittut inissisimavoq, Louis Nielsen, kattuffik sinnerlugu sungiusaasutut peqataasoq oqarpoq.

landshold timersorneq taekwon-do sport

ATORFIIT Se alle jobs

Powered by Labrador CMS