Angut ilaatigut pinngitsaaliilluni atoqateqarsimasutut eqqartuunneqartoq

Pissutsit arlallit pillugit, ukiumi ataatsimi qaammatinilu qulingiluani angut 58-inik ukiulik pineqaatissinneqarsimasunut inissiisarfimmiittussanngortinneqarpoq. Pisimasut ilaat ukiut qulit sinnerlugit matuma siorna pisimapput. 

Ilaatigut pinngitsaaliilluni atoqateqarsimanini, nakuusersimanini, sakkunut inatsimmik unioqqutitsisimanini ikiaroornartunullu inatsimmik arlalinnik unioqqutitsisimanini pillugit angut eqqartuunneqarpoq. 

Suliat ilaat 2010-mi aallartipput, tassani angut eqqartuunneqartoq maanna 58-inik ukiulik, aningaasanik hashimik tuniniaanermit pissarsiarisorineqartunik, 70.300 koruuninik inummut allamut nuussisimasutut unnerluutigineqarluni.

- Pineqartuni amerlanerni unnerluutigineqartup pisuutinneqarluni eqqartuunneqarnera Kalaallit Nunaanni Politiit ataatsimut isigalugu naammagisimaarpaat, politiit ilisimatitsipput.

Pissutsini 13-ini unnerluutigineqartoq

Pinerlunnerit katillugit 13-it pillugit angut unnerluutigineqarpoq, taakkunanngalu arfineq-pingasuni pisuutinneqarpoq. Sapaatip-akunnerata siuliani marsip 19-ianit 21-anut suliaq Sermersuup Eqqartuussivianit suliarineqarpoq.

Sakkoq, hashi 502 grammi aningaasallu 70.300 koruunit unnerluutigineqartumit aamma arsaarinnissutaapput. Ukiumi ataatsimi qaammatinilu qulingiluani pineqaatissinneqarsimasunut inissiisarfimmiittussanngortinneqarnissaa, unnerluussisussaatitaasut aamma piumasaraat.

Pinngitsaaliilluni atoqatigisaminut 100.000 koruuninik aamma taarsiisussanngortinneqarpoq.

Pissutsini tamani pinngitsuutinneqarnissani piumasaralugu Nunatta Eqqartuussivianut unnerluutigineqartoq suliassanngortitsivoq, unnerluussisussaatitaasoq eqqartuussut sukaterniarlugu suliassanngortitsisoq, Kalaallit Nunaanni Politiit ilisimatitsipput.