TIMERSORNEQ
2031-mi VM-mut piareersarneq: Angutit assammik arsarlutik nunanut allanut unammisartut anguniagaat oqallisigineqarput
Angutit assammik arsarlutik 2031-mi nunarsuarmi pissartanngorniunnissaat Danmarkip Islandillu aaqqissueqataaffigissagaat nalunaarutigineqarnerata kingorna, Kalaallit Nunaanni angutit nunanut allanut unammisartut siunissaat pillugu TAAK eqqartuivoq.
Leiff Josefsen
2031-mi VM-ertoqarnerani angutit nunanut allanut unammisartut nunatsinneersut unammeqataasut takujumaarpavut?
Immaqa.
Danmarki ukiuni tulliuttuni marloriarluni angutit assammik arsarlutik nunarsuaq tamakkerlugu unammersuarneranni aaqqissuusseqataassaaq. Danmark Norge Kroatialu peqatigalugit VM-ertoqarnissaanut aaqqissuusseqataassaaq. Nunarsuarmi assammik arsartartut pitsaanerpaat Danmarkimut VM-eriarlutik tikeraassasut maanna uppernarsarneqarpoq.
Tamanna nunatsinnut pissanganartuusoq, TAAK-imi siulersuisunut ilaasortaq elitesportsudvalgimilu ilaasortaq, Eqalunnguaq Abel Kristiansen, oqarpoq:
- Pissanganarpoq Danmarkip aaqqissueqataasussanngornera. Taannaannaanngilaq Island aamma aaqqissueqataassaaq. Pilersaarusiornissamut strategiliornissamullu periarfissaqalerpugut. Maanna angutit nunanut allanut unammisartuisa siunissami anguniagassaat takorloorsinnaalerparput.
2031-imi VM-ertoqarnissaanut anguniagassat oqaluuserineqartut
- VM-mut anngunnissaq kissaatigisuaannarnikuuarput. 2031-mut angorusutat anguniarsinnaalerpagut, soorlu arnat anguniagaaq aamma pilersaarusiornikkut anguniarneqarnikuusoq. Angutit nunanut allanut unammisartut siunissami angorusutaat kattuffik sungiusaasullu peqatigalugit anguniarsinnaalerpagut, Eqalunnguaq Abel Kristiansen Sermitsiamut oqarpoq.
Angutit nunanut allanut unammisartut siunissami anguniagaat sungiusaasut peqatigalugu piginnaasanik inerisaanissamut tunngatillugu Jakob Larsen peqatigalugu oqaluuserineqassapput.
- Sungiusaasoqatigut Jakob Larsen peqatigalugu ataatsimiissaagut. Tassani siunissami angorusutagut qanoq anguniarsinnaanerlugit oqaluuserissallutigu.
