Inissiamut 1000 procentinik akiiliinerusalerpoq

Nikolaj Heinrich inissiami najukkamini ukiut qulikkuutaat tallimat sinnerlugit najugaqarpoq. Piffissami tamatumani inissiamik attartornerminut akiliutai 1000 procentit pallillugit qaffassimapput. Tamanna ingasappallaartoq, oqarpoq. Taamani 1972-imi qaammammut 825 koruuninik ineqarnermut akiliisarpoq. Ullumikkut qaammammut 8.314 koruuninik akiliisarpoq. Tamanna qaffariarnerujussuartut, tassa 1000 procentingajannik qaffariarnertut taaneqartariaqarpoq.

- Tamanna ingasappallaaqaaq. Ineqarnermut politikki allanngortinneqassasoq neriuutigaara, soraarnerussutisialik 86-inik ukiulik Nikolaj Heinrich oqarpoq.

AG-p inissiamut najugaqarfianut Qapiarfiusaamiittumut alakkarpaa. Tamaani nulianilu Cecilie ”Arnaq” Heinrichilu najugaqarput. Inissiami pingasunik quleriinnik initalimmi kalaallit kaagiat qalarlaaq aamma medova tiit naamaneqarsinnaapput.

Nikolaj Heinrich nulianilu INI A/S pilersinneqanngikkallarmalli inissiami najugaqarput. Taamaalillutik kingusinnerusukkut INI-p inissiaataanut attartortunngorlutik. Inissiaq ullutsinni Illuut A/S-imit pigineqarpoq, taannalu Namminersorlutik Oqartussanit pigineqarluni.

- Inissiaq attartugarput ukiut 30-t qaangiunneranni nammineq pigilissagipput, taamani paasitinneqarpugut. Taamaalilluta ineqarnermut akiliuteqartarunnaassalluta. Namminersornerullunili Oqartussaaneq eqqunneqarmat taamaalisoqarani. Suli qallunaat naalagaaffianniissimasuugutta 2002-mili inissiaq najugarput pigilersimassagaluarparput, Nikolaj Heinrich oqarpoq, soorunami ugguarluni.

Tassami nulianilu maanna ukiuni 52-ini inissiami aalajangersimasumi najugaqarput, inissiamullu akiliutigisartagaat qaffakkiartortuarlutik.

- Inissiaq taanna maanna 1000 procentimik akisuneruvoq, oqarpoq.

Taamanikkut 1972-imi aggustip 25-anni Nikolaj Heinrich nulianilu naartusoq inissiamut nutaarluinnarmut nuupput.

- Taamanikkut utaqqisunut allattorsimaffeqanngilaq. Inissiamik piumasoq ingerlaannangajattumik pissarsisarpoq. Nuliara inissiamut nuukkusukkami, taava aqaguani qinnuteqaateqarama ingerlaannarlunga tunineqarpunga, Nikolaj Heinrich oqaluttuarpoq.

Taamanikkut Nuuk allaanerulluinnarpoq, taamanikkummi inissaqarniarneq taama ajortiginngilaq, naak inissiat ikinnerugaluartut.

Nikolaj Heinrich 1950-imi taamanikkut aqqaneq-marlunnik ukioqarluni Nuummut nuuppoq. Qeqertarsuatsiaat eqqaanni nunaqarfeerannguamit Kangillermeersuuvoq. Nikkulaat taamanikkut atuarfimmit soraaraangami aqisserniartarpoq. Tassa nuliariit inissiap maanna najugaqarfiata nalaani.

Inissiaq pisoqaq, akiliutissat nutaat

Nikolaj Heinrichip nuliatalu inissiaq pisiariniarlugu 2013-imi aalajangerput, piffissanngortutut isigigamikku. Taassuma oqaatigisaatut inissiaq 3 millionit koruuningajannik naleqartutut nalilerneqarpoq.

Inissiaq ukiut 30-t sinnerlugit pisoqaassuseqarpoq. 3 millionit koruuninik akilerlugu pisiarissavarput? Naak ukiorpassuarni inissiamik attartornitsinnut akiliisaraluarluta? Tamanna akuerisinnaanngilara, oqarpoq.

Taamaattumik nuliariit Heinrichikkut ullutsinni suli attartortuupput.

Nikolaj Heinrichip inissiamut akiligassani taamaallaat soraarnerussutisiani kisiisa atorlugit akilersinnaanngilai.

- Utoqqaat atugaat imaannaanngillat. Ilungersunartorujussuupput. Qularnanngilluinnarpormi uagut kisitta taama atugaqanngitsugut. Arlaannaatsigulluunniit ineqarnitsinnut tapiiffigineqarneq ajorpugut, inissiami najugaqartunut init amerlavallaarmata, oqarpoq.

Inissiaq marlunnik sinittarfilik aappariit kisimik najugaqarfigivaat, meeraammi arfineq-marluk inersimasunngoreerput namminnerlu angerlarsimaffeqarlutik.

Nikolaj Heinrichip oqaatigaa, nammineq 5000 koruunit missaannik utoqqalinerussutisiaqarluni. Inissiamut akiliutaat 8.000 koruunit missaanniipput, innaallagissamut allanullu aningaasartuutit ilanngunnagit, taamaalilluni utoqqalinersiai naammanngillat. Sulili piumassuseqarluarpoq.

- Naammagittaalliuutissaqanngilanga. Suna tamaat akisussaaffigigatsigu nuannaraara. Nammineerluta nammatassaraarput. Piumasaraarali – kissaatigalugulu ineqarnermut tunngasuni allanngortitsisoqarumaartoq. Namminersornerulluni Oqartussaanerup atuutilersinneqarnerata kingorna ineqarnermut tunngasut 'aningaasarsiorfinngortinneqaramik', Nikolaj Heinrich oqarpoq, nangillunilu:

- Akisussaasunut arlaleriarlunga saaffiginnittarnikuuvunga, akineqarnangali. Aap, ukiut marlussuit matuma siorna qinersinerup kingorna iliuuseqartoqarsinnaanngitsoq akineqarpunga. Tupinnanngilaq Nunarpummi aningaasaateqarpallaanngimmat, Nikolaj Heinrich nammaqataarusuttoq oqarpoq.