Kalaallit uninngasut immikkoortortaqarfiani napparsimmavimmi toqutsineq pivoq

Aarhus Universitetshospitalimi tarnimikkut nappaatillit immikkoortortaqarfianni angut 41-nik ukiulik arlaleriarluni savimmik kapineqareerluni marlunngormat unnukkut toquvoq.

Taama Østjyllands Politi tusagassiuutinut nalunaarummi allappoq.

Angut 46-nik ukiulik saassussinerup kinguninngua tigusarineqartoq, toqutsisutut unnerluutigineqarluni Aarhusimi eqqartuussivimmi pingasunngorpat nalunaaqutaq 13.00 killisiorneqassaaq.

Angut 41-nik ukiulik assigalugu angut 46-nik ukiulik tarnimikkut nappaatillit immikkoortortaqarfianni inissitaavoq, taamaattumillu taakku marluk imminnut ilisarisimareerput.

Nutaarsiassaqartitsivik TV2 Østjylland naapertorlugu kalaallit uninngasut immikkoortortaqarfianni, Kalaallit Nunaanninngaanneersunut uninngavimmi, toqutsineq pivoq. Tarnimikkut nappaatilinnut eqqartuussaasimasunut immikkoortortaqarfik taama tusagassiorfimmut nalunaaruteqarpoq.

- Toqutaasoq angullu 46-nik ukiulik toqutsisimasutut unnerluutigineqartoq taamaalillutik kalaaliupput. Danmarkimi Kalaallit Nunaanniluunniit pinerlussimanertik pissutigalugu uninngatinneqarnersut tarnimikkut nappaatilinnut eqqartuussaasimasunut immikkoortortaqarfiup ilisimatitsissutigisinnaanngilaa, TV2 Østjylland allappoq.

Marlunngormat unnukkut nal. 19.46 saassussineq pillugu politiit nalunaarfigineqarput.

- Politiit sumiiffimmut apuukkamik angut 41-nik ukiulik saassunneqarsimasoq ikiueqqaarfigisimavaat, inuunerali annaanneqarsinnaasimanngilaq. 41-nik ukiulik savimmik kapineqarnini pissutigalugu nalunaaqutaq 20.08 toqusutut nalunaarutigineqarpoq, politiit allapput.

Politiit apuunnissaat 46-nillu ukiulimmik tigusarinninnissaat tikillugu tarnimikkut nappaatilinnut eqqartuussaasimasunut immikkoortortaqarfimmi sulisut tigummigallarsimavaat.

Sakku toqutsinermut atorneqarunartoq nassaarineqarsimaneragaavoq.

- Ippassaq unnukkut nalunaarutigineqarmalli pinerluffiusumi Aarhus Universitets Hospitalillu Skejbymiittup eqqaani takussaasumik angalaarpugut, unnuaq naallugu ilaatigut takunnissimasunik apersuisarluta, videokkut nakkutilliinermit immiussanik pissarsisarluta pinerluffiusumilu misissuisarluta, politiinspektøriugallartoq Anders Uhrskov, tusagassiuutinut nalunaarummi oqarpoq

Pinerlunnerup nalaani qanoq pisoqarsimanera paasilluarsinnaalllugu politiit naliliipput.

Tarnimikkut nappaatillit pinerluttuliornermik unnerluutigineqarsimasut eqqartuunneqarsimasulluunniit, tarnimikkut nappaatilinnut eqqartuussaasimasunut immikkoortortaqarfimmi misissorneqartarput katsorsarneqarlutillu.