Kalaallit immikkoortortaqarfianni toqutsisimasutut nassuerpoq — aneqqanermini savimmik pisisimavoq
Angut kalaaleq 46-nik ukiulik Aarhus Universitetshospitalimi tarnimikkut napparsimasut immikkoortortaqarfianni napparsimasumik allamik toqutsisimanerminik nassuerpoq.
Angut kalaaleq 46-nik ukiulik pingasunngormat eqqartuussivimmi killisiorneqarnermini, angut kalaaleq alla 41-nik ukiulik toqussimallugu, nassuerpoq.
Aarhusimi eqqartuussivimmi angut 46-nik ukiulik tunngaviusumik inatsisit tunngavigalugit killisiorneqarnerani najuuttoq TV2 Østjylland taama allappoq.
Toqutsineq marlunngormat unnukkut Aarhus Universitetshospitalimi tarnimikkut napparsimasut immikkoortortaqarfianni pivoq, tassani angutip 46-nik ukiullip angut 41-nik ukiulik arlaleriarluni savimmik kapivaa.
TV2 Østjylland naapertorlugu marlunngormat ualikkut unnerluutigineqartoq ingiallorteqarani anisimalluni nassuiaasoq, politiinit killisiuinermit atuarneqarpoq:
- Tassani Skejby Centerimiippoq pujortarluni, kebab-itorluni Føtex-imilu savimmik pisilluni. Tamanna toqutaasup toqunnissaanut pilersaarutinut ilaasimavoq, TV2 Østjylland allappoq.
Napparsimasup taassuma napparsimaqatini 41-nik ukiulik toqunniarlugu pilersaarusiorsimavoq. Tamannali isumaluutigisimavaa, TV 2 Østjylland allappoq.
46-nik ukiulik siusinnerusukkut toqutsisimasutut toqutseriarsimasutullu Kalaallit Nunaanni pineqaatissinneqarsimavoq. Sermitsiap paasissutissaatai naapertorlugit 46-nik ukiulik 2021-mi arnamik toqutsisimasutut, panianillu toqutseriarsimasutut pineqaatissinneqarsimavoq.
Juunip 21-ani 2020-mi Nuummi tamanna pivoq.
Saassussinermi sulisut marluk najuuttut
Tarnimikkut nappaatillit immikkoortortaqarfianni uninngavimmi 3-mi, kalaallinut napparsimasunut immikkoortortaqarfimmi, sngut 41-nik ukiulik marlunngormat toqutaavoq.
Savimmik saassussisoqarnerani napparsimmavimmi sulisut marluk najuupput.
Pisoq „sakkortuutut alianartutullu“ Region Midtjyllandimi tarnikkut nappaatillit napparsimmavianni pisortap eqqartorpaa.
- Isumannaallisaanikkut iliuuserisassat sukatertariaqarnersut misissuinivut politiillu misissuineri iluaqutigalugit paasissavarput, napparsimmavimmi pisortaq Tina Ebler oqarpoq.
Tarnimikkut nappaatillit pinerluttuliornermik unnerluutigineqarsimasut eqqartuunneqarsimasulluunniit, tarnimikkut nappaatilinnut eqqartuussaasimasunut immikkoortortaqarfimmi Skejbymi misissorneqartarput katsorsarneqarlutillu.
TV 2 Østjylland naapertorlugu pingasunngormat eqqartuussineq naammassimmat pasisaq sapaatip-akunnerini sisamani tigummigallarneqartussanngortinneqassasoq, eqqartuussisup aalajangerpaa.