INATSI NUTAAQ AKUERINEQARTOQ
Grooming aamma sextortion nunatsinni inerteqqutaalersut
Inatsit nutaaq isumaqarpoq inersimasoq meeqqamut inuusuttuaqqamulluunniit kinguaassiuutitigut innarliinissaq siunertaralugu tatigineqarnissaminik ineriartortitsisoq, meeqqalluunniit inuusuttulluunniit tamataqarani assiminik imaluunniit assinik kinguaassiuutitigut iliuutsinik innarliinerusutut pissusilinnik nassitseqqullugu ussiippat pineqaatissinneqarsinnaasoq.
Annonse
Kinguaassiuutitigut innarliinerit taamaallaat timikkut innarliineruinnaassammata, kisiannili annertuumik digitaliusumik aamma innarliinerusarmata, taamaaliornerup erseqqissaavigissavaa, taama Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik tusagassiuutitigut nalunaaruteqarpoq.
Naalakkersuisut noqqaassuteqarnerisigut pinerluttulerinermi inatsisip allanngortinneqarnera Folketingip akuersissutigaa.
Inatsimmi allannguinermi timikkut aamma digitaliusumik kinguaassiuutitigut innarliinerit imaritinneqarput, siunissamilu isumapiloqarneq tunngavigalugu tatiginnilersitsiniaaneq, grooming, aamma sextortion pinerluttulerinermi inatsimmi namminneq aalajangersakkatut ilaalissapput.
Pinngitsaaliinertut isigineqassaaq
Tassa imaappoq, inuk 22-inik ukioqalereersimasoq meeqqamik 15-it inorlugit ukiulimmik atoqateqarpat, tamanna pinngitsaaliinertut isigineqassaaq.
Grooming tassaavoq kinguaassiuutitigut innarliinissaq siunertaralugu meeqqamik inuusuttumilluunniit tatigineqarnissaminik ineriartortitsinera, imaluunniit meeqqap inuusuttulluunniit tamataqarani assiminik assinilluunniit kinguaassiuutitigut iliuutsinik innarliinerusutut pissusilinnik nassitseqqullugu ussiineq.
Sextortion tassaavoq assersuutigalugu tamataqarani assit imaluunniit atortussat kinguaassiuutinut tunngassuteqartut allat siammarterneqarnissaanik qunusaarinikkut, kinguaassiuutitigut iliuutsit, pinerluttuliortup eqqunngitsuliorfigineqartumut pinngitsaaliilluni imminut iliuuserititai.
Inatsisit Atuutsinneqarnerannut Naalakkersuisup, Naaja H. Nathanielsenip inatsip nutaap atuutilersinneqarnera nuannaarutigaa:
- Piffissaq malinnaavigissagatsigu aamma kinguaassiuutitigut innarliinerit innarliiffinni tamani akiussagatsigit pingaaruteqarpoq. Isumapiloqarneq tunngavigalugu tatiginnilersitsiniaaneq, grooming, atorlugu meeqqat tatiginninnerannik atornerluineq iliuusiuvoq aserorterisoq. Inuup allap kinguaassiuutaasa assiinik imaluunniit nammineq pilluni videolianik nasseqqulluni qunusaarineq pinngitsaaliiniarnerlu killeqanngitsumik ajortuliornerupput.
- Taamaammat massakkut pinerluttulerinermi inatsimmi aalajangersakkat amerlineqarmata, taamaalilluni aamma innarliinernut ilutsit nutaanerusut ilanngunneqarmata, nuannaarutissaavoq, Naaja H. Nathanielsen naggasiivoq.
Inatsimmik allannguinerit ulloq 1. juli 2024 atuutilissapput.
