Aningaasaqarnermut atatillugu misigisapilunnit kingunerluutitit suliarikkit

38-nik ukiulik Tupaarnaq Kopeck aningaasaqarnermut atatillugu misigisapilunnit kingutsitsisimanerit pillugit nittartakkatigut pikkorissaaqqammerpoq.

- Kingunerlutsitsinerit pikkorissarnermi oqaluuserisupilussuuagut. Tamanna amerlasuunit qisuariarfigineqartussaammat, sianiutit qanoq eqqissisarsinnaanerlugit pikkorissarnermi ilinniarparput, taanna oqarpoq.

Tupaarnaq namminersortuuvoq, suliffeqarfimmillu Kalaallit Nunaanni Canadamilu arnat aningaasaqarnermik aqutsilluarsinnaalernissaannik ilitsersuiffiusumik Money Masterlabsimik piginnittuulluni.

Taassuma aningaaserivinnut tunngasumik ilinniagaqarnissani inuusuttuunermini eqqarsaatiginngilluinnaraluarpaa, atuarfimmilu matematikki nuannarinngikkaluarlugu. Inunnulli attaveqarnissani nuannarisupilussuuaa, eqqarsaateqarujussuanngikkaluarlunilu sullitanut inuinnarnut siunnersortitut taamanikkut aningaasaateqarfimmi Sparbank Vestimi ilinniagaqarpoq.

Nuummi ilinniakkaminik naammassinnereerluni inuussutissarsiornermi aningaasaqarnermut tarnillu pissusaanik immikkut ilisimasalinngornissamut Københavnimi Copenhagen Business Schoolimi bacheloritut ilinniarnini naammassivaa. Kingullertigullu aningaasaqarnermik paasinninnissamut nittartakkatigut Canadami pikkorissarpoq. Taassuma uini canadamiu meeqqatillu Canadami maanna najugaqatigai.

Taanna aningaasaqarnermi misigisapilunnit kingunerluutit aningaasaqarnikkullu artorsaateqarunnaarnissaq pillugit saqqummiiartorluni meeraanermini najuagaqarfigisamineeqqammerpoq.

Youtubekkut nammineq kanalimigut kalaallinut saaffiginnittukkut ukiut marluk matuma siorna saqqummersitsisalerpoq.

Missingersuusiornermut, aningaasaliinermut ileqqaagaqarnermullu oqaatsit ilitsoqqussat atorlugit ilinniartitsinissaq tassani anguniagaraa. Taamani ilaatigut ima oqarpoq.

- Aningaasaqarnerup inunnut soqutiginarsarnissaa ilungersunarpoq. Aningaasat ernumassutiginagit inuunissaq qanoq pingaaruteqartiginersoq namminneq takusinnaassagaat neriuppunga.

Anguniagaq taanna allanngorujussuarnikuunngilaq, maannali misilittagaqarneruvoq, piginnaasareriikkaminullu ilinniagaqarsimanerminik allagartaqalersimalluni Canadalu suliaqarfimminut ilanngussimallugu.

- Kalaallit taamaallaat missingersuusiornissamik, aningaasaliinermik ileqqaarinissamillu ilinniagaqarnissaat eqqarsaraluarpunga. Aningaasaatilli nakkutigineqarluarsinnaaniassammata, misigisapilunnit kingunerluutit siullermik suliarisariaqarput, taanna oqarpoq.

Nammineq kingunerluutini suliariniarlugit nillertumi kinisimaartarpoq, eqqarsaqqissaartarluni yogartarlunilu.

Naleqqutivittut

Tupaarnaq Kopeckip bachelorinngoreerluni allami sulileraluarpoq, tassa yogamik ilitsersuisartutut USA-mi ilinniagaqariarluni yogamik ukiuni arlalinni ilinniartitsisarpoq. Tamannali aamma ajornakusoortoq taanna nassuiaavoq.

- Aningaasat inuussutissarsiuteqarnerlu soqutigisannut akuliupput, taanna oqarpoq.

Aningaasat pillugit suliaqaqqilernera pisuusutut misigisimanermit aallaaveqarpoq. Angerlariarluni ilinniakkaminik atuinissaminik aalajangernani Canadamut nuunnissaminik aalajangerpoq.

- Nunatsinni najugaqanngikkaluarlunga tassani qanoq ilanngussisinnaanerlunga ukiut marluk matuma siorna eqqarsaatigaara, taanna oqaluttuarpoq.

Inuinnaat aningaasaqarnerannut kanalini taamani aallartippaa. Aammali taanna iluatsivinngilaq. Aningaasaqarnermili misigisapilunnit kingunerluutinut nittartakkakkut pikkorissaanissamut maanna uppernarsaateqarpoq, pikkorissaasarnissaalu iluatsilluarpoq.

Aningaasaqarnikkullu misigisapilunnit kingunerluutit pillugit pikkorissaasarnera yogamillu ilitsersuisartutut tunuliaquteqarnera tapertariittut paasinarsivoq.

- Assigiinngippasikkaluaqalutik naleqqutivipput, taanna oqarpoq.

Tupaarnaq Kopeck Nuummiinnermini arlalinnik siunertaqarpoq. Filmiliani ilitsersuisartup Aka Hansenip sumi inunngorsimaneq tunngavigalugu akissaasersuinermut piviusulersaarusiaanut peqataajartorluni aamma illoqarfimmiippoq. Tupaarnap ilaatigut aningaasat nagguiillu pillugit misigissutsit oqaluuserai.

Aningaasaqarnermut atatillugu kanngusuttoqartarunnaartitsiniarpoq. Aningaasaanik angajoqqaaminit inuusuttuaraalluni tillittarsimanini nammineq kanngusuutigaa.

- Naammattoortippunga, taarsertussanngorlugillu. Taamaaliorpunga. Aningaasat tamaasa taarserpakka, mianersortumik illaatigaluni oqarpoq.

Tamanna kanngusuutigalugu inersimasuulluni katereerlunilu paasivaa. Allat inuusuttuaraanerminni kukkussutit soqutigivallaarneq ajorpaat.

Aammali akissarsiorluarneq aningaasaqarnermut atatillugu kanngusuutinut ilaasinnaasoq, Tupaarnaq Kobeck nassuiaavoq.

- Akissarsiorluarusukkutta akissarsiorluarnissarput aamma naleqquppoq. Tamanna kissaatigigutsigu kanngusuutigissanngilarput, qungujuutigaluni oqarpoq.