INATSISISSATUT SIUNNERSUUSIULERSUT
Innarluutilinnut qanigisaasut atugarissaarnerusariaqarput
Inuit innarluutillit ilaqutaasalu atugaat pitsanngorsarneqassasut Naalakkersuisut ilisimatitsipput, inuit innarluutillit immikkut unammilligassaqartut aammalu ikiorneqarnerunissamik tapersersorneqarnerunissamillu kissaateqartut tapersersorneqarnissaat pillugu inatsisissatut siunnersuut nutaaq ukiakkut ataatsimiinnermi saqqummiunneqassalluni.
Innarluutillit qanigisaasa innarluutilinnik isumassuisutut atorfinitsinneqarsinnaanerat inatsisissatut siunnersuutip nutaap qulakkeerumaaraa, Aqqaluaq B. Egedep ilisimatitsissutigaa.
Assiliisoq: Leiff Josefsen
Oqilisaanneqarnissamut periarfissanik pitsaanerusunik
kissaateqarneq aamma aningaasaqarnikkut tapiissuteqarneq qitiutillugu qanigisamik paarsaqartarnissaq Naalakkersuisunit tusaatissatut tiguneqarsimasoq, Naalakkersuisut ilisimatitsipput.
Qanigisaasoq suliffeqarfeqarfimmut atassutilik, innarluutillip angerlarsimaffimmi isumassornissaanut qanigisaasup kommunimit atorfinitsinneqarsinnaaneranut inatsisissatut siunnersuutip periarfississavaa.
- Ilaquttaminnik innarluutilimmik tapersersuinissamut tunngatillugu qanigisaasut isumalluutitut pingaarutilittut naleqartutullu Naalakkersuisunit isigineqarput, taamaattumik qanigisaasunik aamma tapersersuinissarput inissaminiippoq, Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisup Aqqaluaq B. Egedep Anna Wangenheimip Demokraatineersup aalajangiiffigisassatut siunnersuutaanut akissuteqaataani taama allassimavoq.
Siunnersuutip itigartitsissutaanissaa inassutigigaat
Anna Wangenheimip siunnersuutigaa "Inatsisartunut aalajangigassatut siunnersuut Naalakkersuisut peqquneqassasut inatsimmik pilersitseqqullugit, angajoqqaaq/oqartussaassusermik tigummiartoq meeqqamut ataatsimik arlalinnilluunniit innarluuteqartumut imaluunniit arlalinnik innarluuteqartumut akissarsiatigut taarsiivigineqarnissamik, pineqartoq meeqqap innarluuteqarnerata malitsigisaanik sivikinnerusumik suliguni. Tamanna pissaaq meerarisaq angerlarsimaffimmi najugaqartoq qassinilluunniit ukioqaraluarpat."
Inatsisartut ataatsimiittarfiannut maajip aappaani siullermeerneqartussatut siunnersuut tunniunneqassappat itigartitsissutigineqassasoq, inatsisissatut siunnersuut pillugu paasissutissiinermi akissummilu Naalakkersuisut isumaqarput.
