ULLORMUT NALUNAARUSIAQ
Takornariat aqqanillit angallammit qimarngunneqartut
Ilulissat eqqaanni angallat takornarianik aqqanilinnik angallassitilluni pujuliorpallaalermat ilaasui qimagussortinneqarput.
Assi: Oscar Scott Carl
Aalisariut Ilulissat eqqaanni ikuallattoq politiit sapaammi ualikkut nalunaaqutaq 17.07 nalunaarfigineqarput.
Aalisariut takornarianik angallassinerani angallatip motooriata iluani pujuliortoqarnera pissutigalugu ajunaalernermik kalerrisaarineq "mayday" nalunaarutigineqartoq, pigaartut pisortaat Thomas Jeppesen oqarpoq.
Aalisartut angallassisullu sumiiffiup qanitaaniittut ajunaalernermi kalerrisaarut ingerlaannaq qisuariarfigaat, takornariallu aqqanillit angallammit pujuliortumit qimagussorneqarlutik.
Angallat ikuallassimanngitsoq misissuinermi paasineqartoq, akerlianilli motoorimi slange qaarsimasoq, imerpalasorlu motoorip ilaanut kissartunut anngussimammat taanna pissutaagunarluni pujuliulersimasoq, pigaartut pisortaat oqarpoq.
Inuit marluk angallammiiginnarput, taannalu Ilulissanut kalinneqarluni. Pisumi inunnik ajoqusertoqanngilaq.
Australiamiu umiarsuarmi takornariartaammiittoq ikiorneqartoq
Sapaammi ualikkut nalunaaqutaq 16.30 politiit alla pillugu nalunaarfigineqarput, tassa takornariaq umiarsuarmut takornariartaammut ilaasoq Nuup eqqaani qaqqami pisuttuartilluni nakkarsimavoq.
Arnaq Australiamiu 64-inik ukiulik qitimigut paffimmigut annersimavoq.
Politiit upalungaarsimasullu sumiiffimmukarput arnarlu nakorsiartarfimmukaallugu.
Tasiilami imigassartorsimalluni ATV-toq angullu utoqqaq Nuuk Centerimut qimanneqartoq
Tasiilami angut sapaatiummat aalakoorluni biilertoq unitsinneqartoq pigaartut pisortaata aamma eqqaavaa.
Angut ATV-nik ingerlaartoq aalakoornartumut uuttuummik suputinneqarmat 1,68 promillemik aalakoornartoqartoq paasineqarpoq.
Angutip biilersinnaanermut allagartaa politiit arsaarinnissutigaat, taassumalu aavata aalakoornartumik qanorpiaq annertutigisumik akoqarnera paasiniarlugu aaversinneqarpoq.
Angut utoqqaq Nuuk Centerimi issiavimini kaassuartakkaniittoq qimanneqaqqasoq pillugu nalunaarut qaqutigoortoq politiit ullormut nalunaarusiaanni aamma allassimavoq.
Politiit angutip najugaanut utoqqaat illuannut attaveqarniaraluarput, iluatsinngitsumilli. Nalunaarutiginnittulli angut utoqqaq naakkigalugu nammineerluni utoqqaat angerlasimaffiannukaappaa.
