Milliardikkaanik isumaqatigiissut: Danmark Nunatsinni mittarfiliornissamut, sissiugaliornissamut peqqinnissaqarfimmullu aningaasaliissaaq
Ministeriunerup Mette Frederiksenip Naalakkersuisullu siulittaasuata Jens-Frederik Nielsenip Kalaallit Nunaanni suliniutit aningaasaliinerillu nutaat pillugit sinaakkutissatut isumaqatigiissut ullumi atsiorpaat.
Assi: Mads Claus Rasmussen/Ritzau Scanpix
Danmarki Kalaallit Nunaanni suliniutinik aningaasaliissutinillu 2026-miit 2029-mut katillugit 1,6 milliardit koruuninik immikkoortitsisoqarsimasoq, Danskit naalakkersuisuisa 2026-mut aningaasanut inatsisissatut siunnersuummut atatillugu qanittukkut saqqummiunneqarpoq.
Aningaasat taakku sumut atorneqarnissaat pillugit maanna nutaarsiassaqarpoq.
Tunumi Ittoqqortoormiini nunap immikkoortuani nutaamik mittarfiliornissamut aamma Kujataani Qaqortumi itisuumik sissiugaliornissamut Danmarkip tamakkiisumik aningaasaliisuunissaa isumaqatigiissutaasoq Naalakkersuisut paasissutissiipput.
Danmarkip attaveqaqatigiinnermut suliniutit taakku marluk tamakkiisumik aningaasaliiffigissagai isumaqatigiissummi allaqqavoq. Taakku marluk sooq toqqarneqarsimanersut itisilerneqanngilaq.
Danmarkimi katsorsartittunut aningasartuutit akilerneqartalissasut
Kalaallit Danmarkimi napparsimmavinni katsorsarneqartarnerannut aningaasartuutit Danmarkip siunissami akilertalissagai aamma isumaqatigiissutigineqartoq Naalakkersuisut allapput.
Kalaallit Danmarkimi katsorsartikkiartortarnerannut ukiumut 140 millionit koruunit missaanniittut aningaasartuutigineqartarput. Aningaasartuutit Danmarkip akilertassagai Naalakkersuisuniit kissaataajuarsimavoq, taamaalilluni aningaasat nunatsinni peqqinnissaqarfiup ajornartorsiortup oqilisaaffiginissaanut pitsanngorsaaffiginissaanullu atorneqarsinnaaniassammata.
Isumaqatigiissut atuutilertinnagu Folketingimit akuerineqaqqaartussaavoq.
Danmarkimi katsorsartikkiartornissamik innersuussisarnissat
ilusissavia Peqqissutsimut Inunnullu Innarluutilinnut Naalakkersuisoqarfiup Danmarkimilu nunami
namminermi peqqinnissamullu ministereqarfimmit suleqatigiissutigalugu suliarineqassasoq isumaqatigiissummi allassimavoq.
- Peqqinnissaqarfimmut tunngatillugu annertunerusumik ikiorseeqqissinnaaneq suleqatigiissinnaanissallu misissorneqarnissaat isumaqatigiissutigineqarpoq, isumaqatigiissummi allassimavoq.
Naalakkersuisut nalunaarusiaanni naapertorlugu, suliniutit nutaat aningaasaliissutinillu isumaqatigiissut siunertarivaa Kalaallit Nunaanni atugarissaarnermik qaffassaasoqassasoq, nunattalu aningaasaqarnerata nammassinnaanerulernissaanut tapertaasoqassalluni.
Jens-Frederik: Kalaallit Nunaata aningaasaqarnikkut imminnut napatittup pilersinnissaa ilaatigut siunertaavoq
Isumaqatigiissut Kalaallit Nunaanni kikkunnut tamanut iluaqutaanissaa ataatsimut anguniagaasoq ministeriuneq Mette Frederiksen oqarpoq:
- Ataatsimoorluta peqqinnissaqarfik pitsanngorsaaffigissavarput attaveqaasersuutinillu nunatta ataqatigiilluarneruneranik kinguneqartussamik ineriartortitseqatigiissalluta. Ilaatigut Ittoqqortoormiini nutaamik mittarfiliornikkut Qaqortumilu itisuumik talittarfiliornikkut. Kalaallit Nunaata nukittunerusup pilersinnissaanut Naalakkersuisunik qanimut suleqateqarnissara qilanaaraara, Mette Frederiksen oqarpoq.
Isumaqatigiissut qaammatini arlalinni oqaloqatigiissutigineqareerluni inissinneqartoq aamma Namminersorneq pillugit inatsimmi siunertanut tapersersuisoq, Naalakkersuisut siulittaasuat Jens-Frederik Nielsen (D) oqarpoq:
- Isumaqatigiissut aqqutigalugu ilaatigut siunissaq ungasissoq isigalugu aningaasaliissuteqarnitsigut Kalaallit Nunaata aningaasaqarnikkut imminnut napatittup pilersinnissaa ilaatigut siunertaavoq. Pingaarnerpaavorli isumaqatigiissut una nunatsinni innuttaasunut tamanut iluaqutaasussaassammat. Peqqinnissaq inissaqarniarnerlu eqqarsaatigalugit unammilligassavut annertoqaat sinaakkutitullu isumaqatigiissut una aqqutigalugu ineriartortitsineq kissaatigisatsitut ilaatigut ingerlassinnaalissavarput, Jens-Frederik Nielsen oqarpoq.
