MOTOORI
Biilertut imminnut qanippallaarlutik biilertarput – tamannalu ajutoornernik kinguneqartarluni
Ukiuunerani assakaasut pitsaasut biilertunullu siulerisanut qanillivallaannginnikkut apornissamut pinngitsoortitsisinnaasut, politiit oqaatigaat aamma inuit apitillugu sakkortuumillu anorlertillugu biiliminnik atuisannginnissaat kajumissaarutigaat.
Aqquserngit quasattut mianersuaalliornerlu aqqusinermi apornermik kinguneqarsinnaasarput, soorlu upernaaq manna arlaleriarluni taama pisoqarsimasoq, Kalaallit Nunaanni Politiit oqaatigaat.
Assi: Leiff Josefsen
Nunatsinni
aqqusinertigut angallannermi inatsisitigut unioqqutitsinerit katillugit 842-t, 2024-mi
nalunaarsorneqarsimapput. Ukiut siuliinut sanilliullugit ikilerialaarsimapput. Politiit
ukiumoortumik kisitsisaataasa saqqummiunneqaqqammersut tamanna takutippaat.
Imigassartorsimalluni
biilernerit suli unioqqutitsiffiunerpaasut aamma atuarneqarsinnaavoq.
Taamaalillunimi
inuit 150-it aalakoorpallaarlutik biilersimasutut 2024-mi unnerluutigineqarput.
Ukiunut siuliinut naleqqiullugit ikinnerulaarput. 2023-mi 229-t
unnerluutigineqarput, 2022-milu 250-it unnerluutigineqarlutik.
Inuit imigassartorsimallutik
biilertut inunnik ajoqusiinertallit arfineq-marluk tigusarineqarput, 35-llu
imigassartorsimallutik biilertut atortunik innarliinernik taamaallaat
kinguneqarsimallutik.
Aqqusinikkut angallannermi inatsisinik unioqqutitsinerit 842-t 2024-mi nalunaarsorneqarput. Unioqqutitsinerit amerlanersaat imigassartorsimalluni biilernernut tunngassuteqarput.
Illustration: Grønlands Politi
Qitequt puigorneqartartoq
Inuit 141-t
biilersinnaanermut allagartaqaratik biilertut politiinit tigusarineqarput,
84-illu aqqusinertigut angallannermi ajoqusernernut atortunik ajoqusernernut
akuusimasut kisitsisit takutippaat. Aqqusinertigut angallannermi
ajoqusersimasut qujanartumik 34-nnaapput.
Aammattaaq
inuppassuit biilimi isumannaallisaanermut qiteqummik atuisanngillat aamma
meeqqat issiaviini assigisaanillu qitequtinik atuisaratik. 55-it 2024-mi taama unnerluutigineqarput.
Taakku
saniatigut suli arlalissuit biilertillutik oqarasuaammik angallattakkamik
atuisarput. Taamaaliorsimasut 25-t 2024-mi akiligassinneqarput, 2023-mitulli
amerlatigalutik.
Biilit aporaattut
Aqqusinikkut
angallannermi 2025-mi qaammatini siullerni arlalinni ajutoornernik annertuunik
pisoqarsimavoq, tamannalu Kalaallit Nunaanni Politiinit uppernarsarneqarluni.
Pissutsit atuuttut naapertorlugit biilertoqartariaqarpoq, politiillu inunnut siunnersuutigaat aperujussuartillugu biiliminnik uninngatitsiinnartaqqullugit, aqqusernit angallannissamut isumannaannerulernissaasa qulakkeerneqarnissaasa tungaanut.
Assi: Leiff Josefsen
– Suliaq ataaseq marsip aallartinnerani pisimasoq misissorpara, tassani suliassat
sisamat pineqarput. Pineqartut aqqusinikkut angallannermi unioqqutitsinernik
assigiinngitsunik unnerluutigineqarput, ilaatigut qajassuussinnginnermik
il.il.. Atortunik ajoqusiinerit pineqartut sillimmasiisarfiinut
innersuunneqartut, Johan Westenip Nuummi politiineersup oqaatigaa, inunnik
ajoqusertoqarsimatinnagu aqqusinikkoorutit qassit aporaassimanersut
kisitsisaatigineqartanngitsut. Taama pisoqartillugu tamakkua sillimmasiisarfinnut
innersuunneqartarmata.
Biilertut imminnut qanippallaarlutik
ingerlasartut
Johan
Westenilli oqaatigaa, ajutoornerit amerlanerpaartaat aqqusinermi quasattumi
biilertunit imminnut qanippallaarlutik biilertartunit pissuteqartartut.
– Issileriasaarnerani
apeqqaarneranilu ajutoornerit amerlanerusarput. Biilit assakaasui
quaannaveeqqutillit pitsaasut atornissaat siornatungaanilu biilertumut naleqquttumik
ungasissuseqarnissaq innuttaasunut siunnersuutigisinnaavarput, taamaalilluni
biili piffissaq eqqorlugu unitsinneqarsinnaaniassammat. Aamma pissutsit naapertorlugit
biilertoqartariaqarpoq. Takusartakkatsitut aperujussuarnerani anorlileruttorneranilu
biilertut biilimik siornatungaani biilertup tunuaniiginnartarput, taamaalilluni
uneriasaarnissamut piffissaq sivikippallaalertarluni, taamalu aportoqarsinnaasarluni.
Taamaattumik aperujussuartillugu inuit kajumissaartarpavut biiliminnik
uninngatitsiinnartaqqullugit, aqqusernit isumannaatsumik ingerlavigineqarsinnaalernissaasa
tungaanut. Biilit assakaasui quaannaveeqqutillit Johan Westenip oqaatigaa nalugaluarlugu inuit aportarnerinut biilit assakaasuinik
quaannaveeqquteqanngitsunik atuisarnerat pissutaasinnaanersoq,
taamaattoqarsinnaavorli.
– Aqqusernit
quatserujussuaraangata assakaasut quaannaveeqqutillit pitsaasarput. Taakku
saniatigut, qitequtit eqqaamasariaqarput, aamma meeqqat qitequt atortariaqarpaat
angajoqqaaminnillu sarliarneqaratik, Johan Westen taama siunnersuivoq.
Allaaserisaq Motoorimi
saqqummersinneqarpoq. Motoori uani atuarneqarsinnaavoq
